ബോൺമൗത്ത് വിറപ്പിച്ചു; ഇഞ്ചുറി ടൈമിൽ സിറ്റിക്ക് ജയം

ഇത്തിഹാദ്: ഇംഗ്ലീഷ് പ്രീമിയർ ലീഗിലെ ആദ്യ മത്സരത്തിൽ മാഞ്ചസ്റ്റർ സിറ്റിയെ വിറപ്പിച്ച് ബോൺമൗത്ത്. ഇഞ്ചുറി ടൈമിൽ നേടിയ ​ഗോളിന്റെ കരുത്തിലാണ് സിറ്റി സീസണിലെ ആദ്യ ജയം സ്വന്തമാക്കിയത്. ഒന്നിനെതിരെ രണ്ട് ​ഗോളുകൾക്കാണ് ജയം. കളിയുടെ 80 മിനിറ്റ് വരെ ഒരു ​ഗോളിന് മുന്നിട്ട ശേഷമാണ് ബോൺമൗത്ത് കീഴടങ്ങിയത്.

കളിയുടെ തുടക്കത്തിൽ തന്നെ ആക്രമിച്ച കളിച്ച സിറ്റിക്ക് മികച്ച അവസരങ്ങൾ ​ഗോളാക്കാൻ കഴിഞ്ഞില്ല. എന്നാൽ 26-ാം മിനിറ്റിൽ മാർക്കസ് ടാവെർനിയറിലൂടെ ബോൺമൗത്ത് ലീഡ് നേടി. ബോക്സിൽ വെച്ച് ഇവാനിൽസൺ നൽകിയ പന്ത് മാർക്കസ് ടാവെർനിയർ ലക്ഷ്യത്തിലെത്തിക്കുകയായിരുന്നു.

80 മിനിറ്റുവരെ സിറ്റിയെ ​ഗോൾ മടക്കാൻ ടീം അനുവദിച്ചില്ല. എന്നാൽ മത്സരത്തിന്റെ അവസാന നിമിഷം മാഞ്ചസ്റ്റർ സിറ്റി ഒപ്പമെത്തി. 84-ാം മിനിറ്റിലാണ് സിറ്റി സമനില ​ഗോൾ നേടുന്നത്. സെൻ്റർ ബാക്കായ മാർക്ക് ഗ്വയ്ഹിയിലൂടെയായിരുന്നു മടങ്ങി വരവ്. പിന്നാലെ ഇഞ്ചുറി ടൈമിൽ (90+2) ജോസ് കോ ഗ്വാർഡിയോൾ ടീമിന് വിജയ ​ഗോൾ സമ്മാനിച്ചു. പെനാൽറ്റി ബോക്സിൽ നിന്ന് ലഭിച്ച പന്ത് ഗ്വാർഡിയോൾ, വലതുകാൽ കൊണ്ട് വലയുടെ മൂലയിലെത്തിക്കുയായിരുന്നു.

അതേസമയം ടോട്ടനം ഹോട്സ്പർ കനത്ത തോൽവിയോടെയാണ് പ്രീമിയർ ലീ​ഗ് തുടങ്ങിയത്. ടോട്ടനത്തിന് കഴിഞ്ഞ സീസണിലെ മോശം ഫോമിൽ നിന്ന് മോചനമായിട്ടില്ലെന്ന് ഈ സീസണിലെ കന്നി മത്സരത്തിലും തെളിഞ്ഞു. എതിരില്ലാത്ത മൂന്ന് ഗോളിന് ബ്രന്റ്ഫോഡാണ് ടോട്ടനത്തെ വീഴ്ത്തിയത് (3-0). മറ്റു മത്സരങ്ങളിൽ ഇപ്സ്വിച് സിറ്റി സണ്ടർലന്റിനെയും (2-1), എവർട്ടൺ ക്രിസ്റ്റൽ പാലസിനെയും (2-0), ലീഡ്സ് നോട്ടിങ്ങ്ഹാം ഫോറസ്റ്റിനെയും (1-0) കീഴടക്കി.