കോംഗോ മതിൽ പൊളിച്ച് കൊളംബിയ; ജയത്തോടെ നോക്കൗട്ടിലേക്ക്

ഹൂസ്‌റ്റൺ: ക്രിസ്‌റ്റ്യാനോ റൊണാൾഡോയുടെ പോർച്ചുഗലിനെ സമനിലയിൽ തളച്ച കോംഗോയുടെ വൻമതിൽ പൊളിച്ച് കൊളംബിയ. ഏകപക്ഷീയമായ ഒരു​ഗോളിനാണ് ജയം. 76-ാം മിനിറ്റിൽ ഡാനിയേൽ മുനോസ് നേടിയ ​ഗോളാണ് ടീമിന് ജയമൊരുക്കിയത്. ​ഗ്രൂപ്പ് കെ യിൽ രണ്ട് ജയവുമായി കൊളംബിയ നോക്കൗട്ടിലേക്ക് കുതിച്ചു.

ആദ്യ മത്സരത്തില്‍ നേടിയ സമനിലയുടെ കരുത്തിൽ കളത്തിലിറങ്ങിയ കോംഗോ മികച്ച പ്രകടനമാണ് കാഴ്ചവെച്ചത്. തുടക്കത്തിൽ തന്നെ കൊളംബിയ ആക്രമിച്ച് കളിച്ചെങ്കിലും കോം​ഗോ ​ഗോളി ലയണൽ എം‌പാസിയെ മറികടക്കാനായില്ല. ​ഗോളെന്നുറപ്പിച്ച ആറോളം ഷോട്ടുകൾ എം‌പാസി തട്ടിയകറ്റി.

രണ്ടാം പകുതിയിൽ ​ഗോളിനായി കൊളംബിയ നടത്തിയ ശ്രമങ്ങൾ 76-ാം മിനിറ്റിൽ ​ഗോളായി മാറി. ബോക്സിനുള്ളിൽ നിന്ന് ലഭിച്ച പന്ത് ​ഗോളിക്ക് അവസരം നൽകാതെ ഡാനിയേൽ മുനോസ് വലയിലെത്തിക്കുകയായിരുന്നു. പിന്നാലെ സൂപ്പർതാരം ലൂയിസ് ഡയസ് രണ്ട് തവണ ​ഗോൾ നേടിയെങ്കിലും രണ്ടും നിഷേധിക്കപ്പെട്ടു. ഓഫ്സൈഡും ഫൗളുമാണ് താരത്തിന് തിരിച്ചടിയായത്.

കൊളംബോ ആക്രമണങ്ങൾക്കിടയിലും അവസാന നിമിഷം സമനിലയ്ക്കായി കനത്ത പോരാട്ടമാണ് കോം​ഗോ നടത്തിയത്. കളിയുടെ 90-ാം മിനിറ്റിൽ കോം​ഗോയുടെ ​ഗോളെന്നുറപ്പിച്ച ഷോട്ട് കൊളംബിയൻ ​ഗോളി തട്ടിയകറ്റി. പോസ്റ്റിന് മുന്നിൽ പിന്നീടും കൂട്ടപ്പൊരിച്ചിലുകൾ ഉണ്ടായെങ്കിലും ഒന്നും ​ഗോളായി മാറിയില്ല.

52 വർഷത്തെ ഇടവേളയ്‌ക്കുശേഷം ലോകകപ്പ്‌ വേദിയിലെത്തിയ കോം​ഗോ ഫുട്ബോൾ ആരാധകരുടെ മനംകവരുന്ന പ്രകടനമാണ് കാഴ്ചവെച്ചത്. 1974 ലോകകപ്പിൽ ഗ്രൂപ്പ്‌ ഘട്ടത്തിൽ മൂന്ന്‌ കളിയും തോറ്റായിരുന്നു കോംഗോയുടെ മടക്കം. 14 ഗോളും വഴങ്ങി. ഇത്തവണ രണ്ട് കളിയിൽ നിന്ന് രണ്ട് ​ഗോൾ മാത്രമാണ് വഴങ്ങിയത്. പോർച്ചുഗലിനെ 1-1 സമനിലയിൽ തളച്ച്‌ ലോകകപ്പ്‌ ഫുട്‌ബോൾ ചരിത്രത്തിൽ ആദ്യ പോയിന്റ്‌ സ്വന്തമാക്കി.