അമ്മാവനെ കാണാൻ ഓസ്ട്രേലിയയിലെത്തി; ഒടുവിൽ ദേശീയ ടീമിൽ, ഇംഗ്ലണ്ടിനെതിരെ നിഖിൽ ചൗധരി ഓൾറൗണ്ട് മികവിൽ പ്ലെയർ ഓഫ് ദ മാച്ച്

നിഖിൽ ചൗധരി
ഡൽഹി : അമ്മാവനെ കാണാൻ ഓസ്ട്രേലിയയിലെത്തിയ യുവാവ്, പിന്നീട് ആ രാജ്യത്തിന്റെ ദേശീയ ക്രിക്കറ്റ് ടീമിൽ ഇടംപിടിച്ച് താരമായി. ഇംഗ്ലണ്ടിനെതിരായ ആദ്യ ട്വന്റി20 മത്സരത്തിൽ ബാറ്റിങ്ങിലും ബൗളിങ്ങിലും തിളങ്ങി പ്ലെയർ ഓഫ് ദ മാച്ച് പുരസ്കാരം സ്വന്തമാക്കിയ നിഖിൽ ചൗധരിയുടെ ജീവിതയാത്ര സിനിമാക്കഥയെ വെല്ലുന്നതാണ്.
1996 മേയ് നാലിന് ഡൽഹിയിൽ ജനിച്ച നിഖിൽ 2017 ജനുവരി 29നാണ് പഞ്ചാബിനായി ഇന്റർ സ്റ്റേറ്റ് ട്വന്റി20 ടൂർണമെന്റിലൂടെ അരങ്ങേറ്റം കുറിച്ചത്. അന്ന് ശുഭ്മാൻ ഗിൽ, അഭിഷേക് ശർമ തുടങ്ങിയ താരങ്ങൾക്കൊപ്പമായിരുന്നു ഡ്രസ്സിങ് റൂം പങ്കിട്ടിരുന്നത്.
2020ൽ ബ്രിസ്ബേനിലുള്ള അമ്മാവനെ സന്ദർശിക്കാനാണ് നിഖിൽ ഓസ്ട്രേലിയയിലെത്തിയത്. എന്നാൽ കോവിഡ് മഹാമാരിയെ തുടർന്ന് അന്താരാഷ്ട്ര അതിർത്തികൾ അടച്ചതോടെ ഇന്ത്യയിലേക്ക് മടങ്ങാനായില്ല. ഓസ്ട്രേലിയയിൽ തുടരേണ്ടിവന്നതോടെ ജീവിതച്ചെലവിനായി മിനിമം വേതനത്തിലുള്ള ജോലികൾ ചെയ്തു. ഇതിനൊപ്പം ഡിസ്ട്രിക്ട് ക്രിക്കറ്റിലും സജീവമായി.
പിന്നീട് ഓസ്ട്രേലിയയിൽ സ്ഥിരതാമസത്തിനുള്ള പെർമനന്റ് റെസിഡൻസി ലഭിച്ചതോടെ ദേശീയ ടീമിനായി കളിക്കാനുള്ള വഴിയും തുറന്നു. 2026 ജൂൺ 17ന് ബംഗ്ലാദേശിനെതിരെയായിരുന്നു ഓസ്ട്രേലിയൻ ജേഴ്സിയിലെ ട്വന്റി20 രാജ്യാന്തര അരങ്ങേറ്റം.
ആറ് പതിറ്റാണ്ടിനിടെ ഓസ്ട്രേലിയൻ പുരുഷ ക്രിക്കറ്റ് ടീമിനെ പ്രതിനിധീകരിക്കുന്ന ആദ്യ ഇന്ത്യൻ വംശജനെന്ന നേട്ടവും നിഖിലിന് സ്വന്തമാണ്.
ഇംഗ്ലണ്ടിനെതിരായ ആദ്യ ട്വന്റി20യിൽ 38 പന്തിൽ 66 റൺസും പന്തെറിഞ്ഞ് 21 റൺസ് മാത്രം വഴങ്ങി രണ്ട് വിക്കറ്റും നേടിയ നിഖിൽ ടീമിന്റെ വിജയത്തിൽ നിർണായക പങ്കുവഹിച്ചു. ഓൾറൗണ്ട് പ്രകടനത്തിന് പ്ലെയർ ഓഫ് ദ മാച്ച് പുരസ്കാരവും ലഭിച്ചു.








0 comments