ലോസ് ആഞ്ചലസ് ഒളിമ്പിക്സ്; ക്രിക്കറ്റ് യോഗ്യതാ മത്സരങ്ങൾ 2028 ജനുവരി–ഫെബ്രുവരി മാസങ്ങളിൽ നടന്നേക്കും

ദുബായ്: ലോസ് ആഞ്ചലസ് ഒളിമ്പിക്സിലെ ക്രിക്കറ്റ് മത്സരങ്ങൾക്കുള്ള യോഗ്യതാ മത്സരങ്ങൾ 2028 ജനുവരി, ഫെബ്രുവരി മാസങ്ങളിൽ നടന്നേക്കുമെന്ന് റിപ്പോർട്ട്. ഐസിസി അംഗരാജ്യങ്ങളുമായി പങ്കുവെച്ച ആഗോള മത്സര കലണ്ടറിലാണ് യോഗ്യതാ മത്സരങ്ങളുടെ സമയക്രമം ഉൾപ്പെടുത്തിയിരിക്കുന്നതെന്ന് ഈഎസ്പിഎൻ ക്രിക്ഇൻഫൊ റിപ്പോർട്ട് ചെയ്തു. നൂറിലേറെ വർഷത്തെ ഇടവേളയ്ക്കുശേഷമാണ് ക്രിക്കറ്റ് ഒളിമ്പിക്സ് വേദിയിലേക്ക് തിരിച്ചെത്തുന്നത്. പുരുഷ, വനിതാ വിഭാഗങ്ങളിലായാണ് മത്സരങ്ങൾ നടക്കുക.

വനിതാ വിഭാഗത്തിൽ ഇന്ത്യയ്ക്ക് യോഗ്യത

വനിതാ ക്രിക്കറ്റ് മത്സരത്തിലേക്ക് ഇന്ത്യ, ഓസ്ട്രേലിയ, ദക്ഷിണാഫ്രിക്ക, ഗ്രേറ്റ് ബ്രിട്ടൻ എന്നീ ടീമുകൾ ഇതിനകം യോഗ്യത നേടിയിട്ടുണ്ട്. ഈ വർഷത്തെ ട്വന്റി 20 ലോകകപ്പിലെ പ്രകടനത്തിന്റെ അടിസ്ഥാനത്തിൽ അതത് ഭൂഖണ്ഡങ്ങളിലെ ഏറ്റവും ഉയർന്ന റാങ്കുള്ള ടീമുകളെന്ന നിലയിലാണ് ഇവർ യോഗ്യത ഉറപ്പാക്കിയത്.

പുരുഷ വിഭാഗത്തിൽ 2026 ഡിസംബർ 31-ലെ രാജ്യാന്തര റാങ്കിങ്ങിന്റെ അടിസ്ഥാനത്തിൽ ആഫ്രിക്ക, ഏഷ്യ, യൂറോപ്പ്, ഓഷ്യാനിയ എന്നീ മേഖലകളിലെ ഏറ്റവും ഉയർന്ന റാങ്കുള്ള നാല് ടീമുകൾ യോഗ്യത നേടുമെന്നാണ് റിപ്പോർട്ട്.

അമേരിക്കയ്ക്കും റാങ്കിങ് മാനദണ്ഡം

ഒളിമ്പിക്സിന് ആതിഥേയത്വം വഹിക്കുന്ന അമേരിക്കയ്ക്ക് പുരുഷ, വനിതാ വിഭാഗങ്ങളിൽ പങ്കെടുക്കാൻ അവസരമുണ്ട്. എന്നാൽ 2026 ജൂൺ 30 മുതൽ ഡിസംബർ 31 വരെയുള്ള യോഗ്യതാ കാലയളവിൽ റാങ്കിങ്ങിൽ ആദ്യ 15 സ്ഥാനങ്ങളിൽ ഇടം നേടണമെന്നാണ് വ്യവസ്ഥ.

ഈ മാനദണ്ഡം പാലിക്കാനായില്ലെങ്കിൽ വനിതാ വിഭാഗത്തിലെ ആതിഥേയ രാജ്യത്തിനുള്ള സ്ഥാനം 2027 വനിതാ ചാമ്പ്യൻസ് ട്രോഫിയിലെ പ്രകടനത്തിന്റെ അടിസ്ഥാനത്തിൽ പുനർനിർണയിക്കുമെന്നും റിപ്പോർട്ടിൽ പറയുന്നു.

അതേസമയം, 2029-ലെ ലോക ടെസ്റ്റ് ചാമ്പ്യൻഷിപ്പ് ഫൈനൽ ജൂൺ 8 മുതൽ 12 വരെ ഇംഗ്ലണ്ടിൽ നടത്താനും ഐസിസി കലണ്ടറിൽ നിർദേശമുണ്ടെന്നാണ് റിപ്പോർട്ട്. 2027-നും 2031-നും ഇടയിൽ പുരുഷ, വനിതാ, അണ്ടർ-19 വിഭാഗങ്ങളിലായി നിരവധി രാജ്യാന്തര ടൂർണമെന്റുകളും ഐസിസി ആസൂത്രണം ചെയ്യുന്നുണ്ട്.