കുറഞ്ഞ ഓവർ നിരക്ക് ; ഇംഗ്ലണ്ടിന് കടുത്ത തിരിച്ചടി, ലോക ടെസ്റ്റ് ചാമ്പ്യൻഷിപ്പിൽ 12 പോയിന്റുകൾ വെട്ടിക്കുറച്ചു

ലണ്ടൻ: ന്യൂസിലൻഡിനെതിരെ ഓവലിൽ നടന്ന രണ്ടാം ടെസ്റ്റിലെ കുറഞ്ഞ ഓവർ നിരക്കിനെ തുടർന്ന് ഇംഗ്ലണ്ടിന് കടുത്ത ശിക്ഷ വിധിച്ച് ഐസിസി. ലോക ടെസ്റ്റ് ചാമ്പ്യൻഷിപ്പിൽ നിന്ന് ഇംഗ്ലണ്ടിന്റെ 12 പോയിന്റുകൾ വെട്ടിക്കുറച്ചതിനൊപ്പം മത്സര ഫീസിന്റെ 50 ശതമാനം പിഴയും ചുമത്തി.

ടെസ്റ്റ് ചാമ്പ്യൻഷിപ്പിൽ ഒരു വിജയത്തിന് 12 പോയിന്റാണ് ലഭിക്കുക എന്നതിനാൽ, ലോർഡ്സിൽ നടന്ന ഒന്നാം ടെസ്റ്റിൽ ന്യൂസിലൻഡിനെ തോൽപ്പിച്ച് ഇംഗ്ലണ്ട് നേടിയ പോയിന്റുകളാണ് ഈ ഒരൊറ്റ പിഴവിലൂടെ അവർക്ക് നഷ്ടമായിരിക്കുന്നത്.

സമയം അനുവദിച്ചതുൾപ്പെടെയുള്ള കാര്യങ്ങൾ കണക്കിലെടുത്ത ശേഷം, ഓവലിൽ നിശ്ചയിച്ച സമയത്തേക്കാൾ 12 ഓവർ കുറവാണ് ഇംഗ്ലണ്ട് എറിഞ്ഞതെന്ന് കണ്ടെത്തുകയായിരുന്നു. ലോക ടെസ്റ്റ് ചാമ്പ്യൻഷിപ്പ് നിയമപ്രകാരം നിശ്ചിത സമയത്ത് എറിയാതിരിക്കുന്ന ഓരോ ഓവറിനും ഒരു പോയിന്റ് വീതം വെട്ടിക്കുറയ്ക്കും.

കൂടാതെ ഐസിസിയുടെ പെരുമാറ്റച്ചട്ടം അനുസരിച്ച് ഓരോ ഓവർ കുറയുമ്പോഴും കളിക്കാരുടെ മത്സര ഫീസിന്റെ 5 ശതമാനം വീതം പിഴ ചുമത്താം. ഇത് പരമാവധി 50 ശതമാനമായി പരിമിതപ്പെടുത്തിയിട്ടുണ്ട്, ഈ പരമാവധി ശിക്ഷയാണ് ഇപ്പോൾ ഇംഗ്ലണ്ടിന് ലഭിച്ചിരിക്കുന്നത്.

ഫീൽഡ് അമ്പയർമാരായ അഡ്രിയാൻ ഹോൾഡ്സ്റ്റോക്ക്, നിതിൻ മേനോൻ, തേർഡ് അമ്പയർ റോഡ് ടക്കർ, ഫോർത്ത് അമ്പയർ ഗ്രഹാം ലോയ്ഡ് എന്നിവരാണ് ഇംഗ്ലണ്ടിനെതിരെ പരാതി നൽകിയത്.

'റെക്സ് റൂംസ്' സംഭവത്തെ തുടർന്ന് ബെൻ സ്റ്റോക്സിന് പകരം ക്യാപ്റ്റൻ സ്ഥാനം ഏറ്റെടുത്ത ജോ റൂട്ട് കുറ്റം സമ്മതിച്ചതിനാൽ മാച്ച് റഫറി ആൻഡി പൈക്രോഫ്റ്റിന് മുന്നിൽ പ്രത്യേകം വാദം കേൾക്കേണ്ടി വന്നില്ല.

രണ്ടാം ടെസ്റ്റിൽ ഇംഗ്ലണ്ട് 253 റൺസിന്റെ വമ്പൻ തോൽവിയാണ് വഴങ്ങിയത്. ജൂൺ 25 മുതൽ ട്രെന്റ് ബ്രിഡ്ജിൽ നടക്കുന്ന നിർണ്ണായകമായ മൂന്നാം ടെസ്റ്റിന് മുൻപായി മൂന്ന് മത്സരങ്ങളുടെ പരമ്പര നിലവിൽ 1-1 എന്ന നിലയിലാണ്.

നിലവിലെ ലോക ടെസ്റ്റ് ചാമ്പ്യൻഷിപ്പിന്റെ പോയിന്റ് പട്ടികയിൽ 12 ടെസ്റ്റുകളിൽ നിന്ന് 38 പോയിന്റുമായി ഒൻപത് ടീമുകളിൽ ഏഴാം സ്ഥാനത്താണ് ഇംഗ്ലണ്ട്. ഇത് 26.39 ശതമാനം പോയിന്റുകൾക്ക് തുല്യമാണ്.

നിലവിലെ ലോക ടെസ്റ്റ് ചാമ്പ്യൻഷിപ്പ് സൈക്കിളിൽ ഇത് രണ്ടാം തവണയാണ് കുറഞ്ഞ ഓവർ നിരക്കിന്റെ പേരിൽ ഇംഗ്ലണ്ടിന്റെ പോയിന്റ് വെട്ടിക്കുറയ്ക്കുന്നത്. 2025-ൽ ലോർഡ്സിൽ ഇന്ത്യക്കെതിരെ 22 റൺസിന് വിജയിച്ച മത്സരത്തിലും ഇതേ കുറ്റത്തിന് ഇംഗ്ലണ്ടിന് രണ്ട് പോയിന്റുകൾ നഷ്ടമായിരുന്നു.

ഇതിന് മുൻപത്തെ 2023-2025 ലോക ടെസ്റ്റ് ചാംപ്യൻഷിപ് സൈക്കിളിലും കുറഞ്ഞ ഓവർ നിരക്ക് കാരണം ഇംഗ്ലണ്ടിന് 22 പോയിന്റുകൾ നഷ്ടമാവുകയും അവർ അഞ്ചാം സ്ഥാനത്ത് ഫിനിഷ് ചെയ്യേണ്ടി വരികയും ചെയ്തിരുന്നു.