രഞ്ജി ട്രോഫി നിയന്ത്രിച്ച് ഓസീസ് അമ്പയർ; പരാശർ ജോഷിക്ക് ഓസ്ട്രേലിയയിലും അവസരം

ന്യൂഡൽഹി: ഇന്ത്യയും ഓസ്ട്രേലിയയും തമ്മിലുള്ള അമ്പയർ എക്സ്ചേഞ്ച് പദ്ധതിയുടെ ഭാഗമായി ഓസ്ട്രേലിയൻ അമ്പയർ ബെൻ ട്രെലോർ 2026–27 സീസണിലെ രണ്ട് രഞ്ജി ട്രോഫി മത്സരങ്ങളിൽ അമ്പയറാകും.

ഒക്ടോബർ 18ന് ആരംഭിച്ച ഡൽഹി–ഗുജറാത്ത് മത്സരത്തിലാണ് ട്രെലോർ ആദ്യമായി അമ്പയറായത്. ഒക്ടോബർ 26ന് തുടങ്ങുന്ന മുംബൈ–ഹരിയാന മത്സരത്തിലും അദ്ദേഹം ചുമതല വഹിക്കും

ഇന്ത്യയുടെ പരാശർ ജോഷി ഓസ്ട്രേലിയയിൽ രണ്ട് ഷെഫീൽഡ് ഷീൽഡ് മത്സരങ്ങളിലും ഒരു ഏകദിന കപ്പ് മത്സരത്തിലും അമ്പയറായി പ്രവർത്തിക്കും.

പരാശർ ജോഷിയുടെ ഓസ്ട്രേലിയൻ പര്യടനം നവംബർ 11 മുതൽ 14 വരെ ഗാബയിൽ നടക്കുന്ന ക്വീൻസ്‌ലൻഡ്–ടാസ്മാനിയ ഷെഫീൽഡ് ഷീൽഡ് മത്സരത്തോടെ ആരംഭിക്കും. നവംബർ 22 മുതൽ 25 വരെ സിഡ്നിയിൽ നടക്കുന്ന ന്യൂ സൗത്ത് വെയിൽസ്–ക്വീൻസ്‌ലൻഡ് മത്സരത്തിലും അദ്ദേഹം അമ്പയറാകും.

ആരാണ് ബെൻ ട്രെലോർ, പരാശർ ജോഷി?

ഓസ്ട്രേലിയയിൽ 30 ഫസ്റ്റ് ക്ലാസ് മത്സരങ്ങളിലും 20 ലിസ്റ്റ് എ മത്സരങ്ങളിലും 39 ബിഗ് ബാഷ് ലീഗ് മത്സരങ്ങളിലും അമ്പയറായ അനുഭവം ബെൻ ട്രെലോറിനുണ്ട്. ക്രിക്കറ്റ് ന്യൂ സൗത്ത് വെയിൽസിന്റെ അമ്പയർ എജ്യുക്കേഷൻ ഓഫീസറായും അദ്ദേഹം പ്രവർത്തിക്കുന്നു.

2015 മുതൽ ബിസിസിഐ അമ്പയർ പാനലിലുള്ള പരാശർ ജോഷി ഒൻപത് ഫസ്റ്റ് ക്ലാസ് മത്സരങ്ങളിലും 24 ലിസ്റ്റ് എ മത്സരങ്ങളിലും 30 ട്വന്റി 20 മത്സരങ്ങളിലും അമ്പയറായിട്ടുണ്ട്. അമ്പയറിങ്ങിന് മുമ്പ് 2008ൽ ഇന്ത്യൻ ഐഡൽ 4 സംഗീത റിയാലിറ്റി ഷോയുടെ പിയാനോ റൗണ്ടിലെത്തിയതും അദ്ദേഹത്തിന്റെ കരിയറിലെ കൗതുകകരമായ അധ്യായമാണ്.

ഇരുരാജ്യങ്ങളിലെയും ആഭ്യന്തര ക്രിക്കറ്റിൽ അമ്പയർമാർക്ക് കൂടുതൽ അനുഭവസമ്പത്ത് നേടാൻ അവസരമൊരുക്കുന്നതാണ് ഈ കൈമാറ്റ പദ്ധതി.