മെഡിക്കൽ റിപ്പോർട്ടിന്റെ പേരിൽ പോക്സോ കേസ് അതിജീവിതയ്ക്ക് നഷ്ടപരിഹാരം നിഷേധിച്ചു; 4 ലക്ഷം രൂപ നൽകാൻ കോടതി

അലഹബാദ്: വൈദ്യപരിശോധനാ റിപ്പോർട്ടിൽ ലൈംഗിക അതിക്രമം മൂലമുള്ള മുറിവുകൾ രേഖപ്പെടുത്തിയിട്ടില്ലെന്ന കാരണം പറഞ്ഞ് നഷ്ടപരിഹാര അപേക്ഷ തള്ളിയ അധികൃതരുടെ നടപടി അലഹബാദ് ഹൈക്കോടതി റദ്ദാക്കി. പോക്സോ കേസ് അതിജീവിതയായ പ്രായപൂർത്തിയാകാത്ത പെൺകുട്ടിക്ക് 4 ലക്ഷം രൂപ നഷ്ടപരിഹാരം നൽകാൻ ഉത്തർപ്രദേശ് സർക്കാരിനോട് ഹൈക്കോടതി നിർദേശിച്ചു.

മെഡിക്കൽ റിപ്പോർട്ടിൽ ബാഹ്യമായ മുറിവുകൾ കാണാത്തതുകൊണ്ട് മാത്രം ജില്ലാ സ്റ്റീയറിംഗ് കമ്മിറ്റിക്ക് ഒരു ഇരയുടെ നഷ്ടപരിഹാര അപേക്ഷ നിരസിക്കാൻ കഴിയില്ലെന്ന് ഒക്ടോബർ 5ലെ ഉത്തരവിൽ ജസ്റ്റിസ് ശേഖർ ബി സറാഫ്, ജസ്റ്റിസ് അമിതാഭ് കുമാർ റായ് എന്നിവരടങ്ങിയ ബെഞ്ച് വ്യക്തമാക്കി.

ഇരയായ പെൺകുട്ടിക്ക് ആനുകൂല്യങ്ങൾ ലഭ്യമാക്കണമെന്ന് ആവശ്യപ്പെട്ട് സമർപ്പിച്ച ഹർജിയിലാണ് ഹൈക്കോടതി വിധി. ഭാരതീയ നാഗരിക് സുരക്ഷാ സംഹിത, 2023, പോക്സോ നിയമം എന്നിവയിലെ വിവിധ വകുപ്പുകൾ പ്രകാരം കുറ്റപത്രം സമർപ്പിച്ച ഈ കേസിൽ, ഇരയ്ക്ക് അർഹമായ തുക ഇതുവരെ നൽകിയിട്ടില്ലെന്ന് കോടതി ആശങ്ക പ്രകടിപ്പിച്ചു.

റാണി ലക്ഷ്മി ഭായ് പദ്ധതി പ്രകാരം, എഫ്ഐആർ രജിസ്റ്റർ ചെയ്ത് 15 ദിവസത്തിനകം 1 ലക്ഷം രൂപയും, കുറ്റപത്രം സമർപ്പിച്ച് ഒരു മാസത്തിനകം 2 ലക്ഷം രൂപയും ഇരയ്ക്ക് നൽകണമെന്ന് ചട്ടങ്ങളിൽ വ്യക്തമായി പറയുന്നുണ്ട്. എന്നാൽ 2026 മാർച്ച് 11-ന്, മെഡിക്കൽ റിപ്പോർട്ടിൽ മുറിവുകൾ രേഖപ്പെടുത്തിയിട്ടില്ലെന്ന അടിസ്ഥാനരഹിതമായ കാരണം പറഞ്ഞ് അധികൃതർ അപേക്ഷ തള്ളുകയായിരുന്നു.

പരാതിയിൽ പോക്സോ വകുപ്പുകൾ ചുമത്തിയിട്ടുണ്ടെങ്കിൽ അതിലപ്പുറം ഒരു അന്വേഷണം ജില്ലാ കമ്മിറ്റി നടത്തേണ്ടതില്ലെന്നും, ഹൈക്കോടതി ഉത്തരവുകൾ നിരന്തരം ലംഘിച്ചുകൊണ്ട് ഇത്തരം അപേക്ഷകൾ തള്ളുന്നതിൽ കോടതി കടുത്ത ആശങ്ക പ്രകടിപ്പിക്കുകയും ചെയ്തു. തുടർന്നാണ് പദ്ധതി പ്രകാരമുള്ള 3 ലക്ഷം രൂപയും, അധിക നഷ്ടപരിഹാരമായി 1 ലക്ഷം രൂപയും ഉൾപ്പെടെ ആകെ 4 ലക്ഷം രൂപ ഏഴ് ദിവസത്തിനകം ഇരയ്ക്ക് കൈമാറാൻ കോടതി ഉത്തരവിട്ടത്.