ബെൻ സ്റ്റോക്സിന്റെ വിരമിക്കൽ വീഡിയോ വിവാദത്തിൽ; ഇംഗ്ലണ്ട് ക്രിക്കറ്റ് ബോർഡിനോട് വിശദീകരണം തേടി ഐസിസി

ലണ്ടൻ : ഇംഗ്ലണ്ട് ക്രിക്കറ്റ് താരം ബെൻ സ്റ്റോക്സിന്റെ വിരമിക്കൽ വീഡിയോയുമായി ബന്ധപ്പെട്ട് ഇംഗ്ലണ്ട് ആൻഡ് വെയ്‌ൽസ് ക്രിക്കറ്റ് ബോർഡിനെതിരെ അന്താരാഷ്ട്ര ക്രിക്കറ്റ് കൗൺസിൽ രംഗത്ത്. ന്യൂസിലാൻഡിനെതിരായ മൂന്നാം ടെസ്റ്റ് മത്സരത്തിനിടെ ഡ്രെസ്സിങ് റൂമിൽ വെച്ച് സ്റ്റോക്സ് സഹതാരങ്ങളോട് വിരമിക്കൽ പ്രഖ്യാപനം നടത്തുന്ന ദൃശ്യങ്ങൾ പകർത്തി പുറത്തുവിട്ടതിനാണ് ഐസിസി വിശദീകരണം തേടിയത്. ഡ്രെസ്സിങ് റൂമിലെ സുരക്ഷാ ചട്ടങ്ങൾ ലംഘിച്ചെന്ന് ചൂണ്ടിക്കാണിച്ചാണ് ഐസിസി ഇസിബിക്ക് കത്തയച്ചിരിക്കുന്നത്.

ടെസ്റ്റിന്റെ നാലാം ദിനം ടീ ബ്രേക്കിന് തൊട്ടുമുമ്പാണ് ഔദ്യോഗിക ബ്രോഡ്കാസ്റ്റർമാരും ഇസിബിയുടെ സോഷ്യൽ മീഡിയ ഹാൻഡിലുകളും ഈ വീഡിയോ പുറത്തുവിട്ടത്. അന്താരാഷ്ട്ര മത്സരങ്ങളിൽ കളിക്കാരുടെയും മാച്ച് ഒഫീഷ്യൽസിന്റെയും മേഖലകളിൽ പാലിക്കേണ്ട നിബന്ധനകളിലെ ആർട്ടിക്കിൾ 2.2.11 പ്രകാരം, മത്സരത്തിന്റെ തത്സമയ സംപ്രേക്ഷണത്തിനായോ ഓഡിയോ റെക്കോഡ് ചെയ്യുന്നതിനായോ ഡ്രെസ്സിങ് റൂമുകൾക്കുള്ളിൽ ക്യാമറകളോ മറ്റ് റെക്കോഡിങ് ഉപകരണങ്ങളോ സ്ഥാപിക്കാൻ പാടില്ല. മത്സരം അവസാനിക്കുന്നതിന് മുൻപ് തന്നെ ഇത് റെക്കോഡ് ചെയ്ത് പുറത്തുവിട്ടത് ചട്ടലംഘനമാണെന്നാണ് ഐസിസിയുടെ കണ്ടെത്തൽ.

അന്താരാഷ്ട്ര ക്രിക്കറ്റിൽ നിന്നുള്ള വിരമിക്കൽ പ്രഖ്യാപനത്തിന് പിന്നാലെ ആരാധകർക്കും സഹതാരങ്ങൾക്കും നന്ദി അറിയിച്ച് ബെൻ സ്റ്റോക്സ് സോഷ്യൽ മീഡിയയിൽ വൈകാരികമായ കുറിപ്പ് പങ്കുവെച്ചു. തന്റെ 15 വർഷത്തെ നീണ്ട കരിയറിലെ ഉയർച്ച താഴ്ചകളെക്കുറിച്ചാണ് സ്റ്റോക്സ് എക്സ് പ്ലാറ്റ്‌ഫോമിൽ കുറിച്ചത്.

'15 വർഷമായിരുന്നു കടന്നുപോയത്. കളിയിലും ജീവിതത്തിലും ഏറ്റവും വലിയ സന്തോഷങ്ങളും കടുത്ത തിരിച്ചടികളും ഈ കരിയറിൽ ഉണ്ടായിട്ടുണ്ട്. വിരമിക്കാനുള്ള എന്റെ സമയം അതിക്രമിച്ചിരുന്നു, ആ തീരുമാനം മറ്റാരെക്കാളും മുൻപ് എടുക്കേണ്ടത് ഞാൻ മാത്രമായിരുന്നു. ഇത്രയും കാലം എന്നെ പിന്തുണച്ച എല്ലാ ഇംഗ്ലണ്ട് ആരാധകരോടും ലോകമെമ്പാടുമുള്ള ക്രിക്കറ്റ് പ്രേമികളോടും ഞാൻ സ്നേഹം അറിയിക്കുന്നു', സ്റ്റോക്സ് കുറിച്ചു.

ഇംഗ്ലണ്ടിനെ പ്രതിനിധീകരിച്ച് ഒപ്പം കളിച്ച എല്ലാ സഹതാരങ്ങളോടും കടപ്പാടുണ്ടെന്ന് വ്യക്തമാക്കിയ താരം, ഇനി ഇംഗ്ലണ്ട് ടീമിന്റെ വെറുമൊരു ആരാധകനായി ഗാലറിയിലുണ്ടാകുമെന്നും കൂട്ടിച്ചേർത്തു. ഇംഗ്ലണ്ടിന്റെ എക്കാലത്തെയും മികച്ച ഓൾറൗണ്ടർമാരിലും മാച്ച് വിന്നർമാരിലും ഒരാളായാണ് ബെൻ സ്റ്റോക്സ് വിലയിരുത്തപ്പെടുന്നത്.