ട്വന്റി20യിൽ 1000 റൺസ്; പവർപ്ലേയിൽ 100 സിക്സറുകൾ, ചരിത്രമെഴുതി അഭിഷേക് ശർമ

ക്രൈസ്റ്റ്‌ചർച്ച് : ട്വന്റി20 രാജ്യാന്തര ക്രിക്കറ്റിൽ 1,000 റൺസ് പിന്നിട്ട് ഇന്ത്യൻ ഓപ്പണർ അഭിഷേക് ശർമ. ന്യൂസിലൻഡിനെതിരായ രണ്ടാം ട്വന്റി20യിലാണ് താരം ഈ നേട്ടം സ്വന്തമാക്കിയത്. ട്വന്റി20 ക്രിക്കറ്റിൽ പവർപ്ലേയിൽ 100 സിക്സറുകൾ നേടുന്ന ആദ്യ ബാറ്ററെന്ന ചരിത്രനേട്ടവും അഭിഷേകിന്റെ പേരിലായി.

2024ൽ ട്വന്റി20യിൽ അരങ്ങേറ്റം കുറിച്ച താരം ചുരുങ്ങിയ കാലത്തിനുള്ളിൽ ശ്രദ്ധേയമായ നേട്ടങ്ങളാണ് സ്വന്തമാക്കിയത്. 69 മത്സരങ്ങളിൽ നിന്നാണ് താരം പവർപ്ലേയിൽ 100 സിക്സറുകൾ നേടിയത്.

പവർപ്ലേയിൽ ഏറ്റവും കൂടുതൽ സിക്സറുകൾ നേടിയ താരങ്ങളുടെ പട്ടികയിൽ രണ്ടാം സ്ഥാനത്ത് രോഹിത് ശർമയാണ്. 159 മത്സരങ്ങളിൽ നിന്ന് 98 സിക്സറുകളാണ് രോഹിത് നേടിയത്. ന്യൂസിലൻഡ് താരം മാർട്ടിൻ ഗപ്റ്റിൽ 122 മത്സരങ്ങളിൽ നിന്ന് 97 സിക്സറുകളുമായി മൂന്നാം സ്ഥാനത്തുണ്ട്.

യുഎഇ താരം മുഹമ്മദ് വസീം (95), അയർലൻഡ് താരം പോൾ സ്റ്റിർലിങ് (94), ദക്ഷിണാഫ്രിക്കയുടെ ക്വിന്റൺ ഡി കോക്ക് (87) എന്നിവരാണ് പട്ടികയിലെ മറ്റ് പ്രമുഖർ. ഒരു വർഷത്തിൽ ട്വന്റി20 യിൽ ഏറ്റവും കൂടുതൽ റൺസ് നേടിയ ഇന്ത്യൻ താരങ്ങളുടെ പട്ടികയിൽ സൂര്യകുമാർ യാദവ് (2022ൽ 1,164 റൺസ്), ഇഷാൻ കിഷൻ (2026ൽ 1,159 റൺസ്) എന്നിവർക്കു പിന്നിലാണ് അഭിഷേക്. പരമ്പരയിൽ ഇനിയും മത്സരങ്ങൾ ശേഷിക്കുന്നതിനാൽ ഈ പട്ടികയിൽ മുന്നേറാനുള്ള അവസരവും താരത്തിനു മുന്നിലുണ്ട്.