"വി എസിനെ കണ്ടതും എല്ലാംമറന്ന് അഭിവാദ്യമേകി"; കയർപിരിക്കും കൈക്കരുത്ത്

മുഹമ്മ : വി എസിന്റെ വിയോഗവാർത്ത ടിവിയിൽ കാണുന്നതിനിടെ വീട്ടിലിരുന്ന് മുഷ്​ടിചുരുട്ടി ഹൃദയാഭിവാദ്യമേകുന്ന വൈറൽ ചിത്രത്തിലെ വയോധിക ഇവിടെയുണ്ട്​. 90 വയസായ കയർപിരിതൊഴിലാളി ആലപ്പുഴ കഞ്ഞിക്കുഴി ഒമ്പതാം വാർഡിലെ വരകാടിക്കാരുടെ സരോമ്മ എന്ന സരോജിനിയാണ് മുഷ്​ടിചുരുട്ടിയ വിപ്ലവം എന്ന തലവാചകത്തിൽ ഹിറ്റായ ചിത്രത്തിലെ നായിക.

അയൽവാസി നെടുംചിറയിൽ അനീഷിന്റെ വീട്ടിൽ ടിവി വാർത്ത കാണുകയായിരുന്നു. കേൾവികുറഞ്ഞ സരോമ്മ ടിവിയുടെ അടുത്തേക്ക് നീങ്ങിനിന്നു, മുഷ്​ടിചുരുട്ടി നിൽക്കുന്ന വി എസിനെ കണ്ടതും എല്ലാംമറന്ന് അഭിവാദ്യമേകി. പിന്നിലിരുന്ന അനീഷ് ഈ രംഗം ഫോണിൽ പകർത്തി സുഹൃത്ത്​ വിനീതിന് അയച്ചുകൊടുത്തു. വിനീത് ഇത് സ്​റ്റോറിയായും സ്​റ്റാറ്റസായും ഇട്ടതോടെ നിരവധിപേർ ഈ ചിത്രം പങ്കുവച്ചു.

"ഇന്നലെ വൈകുന്നേരംമുതൽ കണ്ടതിൽ ഏറ്റവും മനോഹരമായ ചിത്രം' എന്നാണ് മുഖപുസ്​തകത്തിൽ ചിത്രം പങ്കുവച്ച് ബിനീഷ് കോടിയേരി കുറിച്ചത്. പ്രമുഖ മാധ്യമപ്രവർത്തകരടക്കം ചിത്രം പങ്കിട്ടു. തോപ്പുവെളി പുത്തൻചിറയിൽ പരേതനായ കൊച്ചുനാരായണന്റെ ഭാര്യയാണ് സരോജിനി.

ഇന്നും പാർടി പരിപാടികളിൽ സജീവമാണ്. ഒരുവർഷം മുമ്പുവരെ പുന്നപ്ര–വയലാർ മാരാരിക്കുളം വാർഷികദിനത്തിൽ മാരാരിക്കുളത്ത് അനുസ്​മരണ പരിപാടിയിൽ പങ്കെടുക്കാൻ പ്രകടനത്തിന്റെ മുൻനിരയിൽ വലിയകൊടി പിടിച്ച് സരോമ്മ നിന്നു. മുദ്രാവാക്യം നിർത്തിയാൽ സരോമ്മ ചൂടാകുമായിരുന്നു. വയലാറിൽ പോയി പുഷ്​പാർച്ചന നടത്തുന്നതും മുടക്കാറില്ലായിരുന്നു. ഒത്തിരിതവണ വി എസിനെ കണ്ടിട്ടുണ്ടെന്നും അദ്ദേഹത്തിന്റെ പ്രസംഗം ഇഷ്​ടമാണെന്നും സരോമ്മ പറഞ്ഞു.