‘പഠിക്കാൻ പോയാൽ പഠിച്ചാൽ പോരേ...?', പോര; സമരം ചെയ്ത് അവകാശങ്ങൾ നേടിയ ചരിത്രങ്ങളിലൂടെ

കാലടി സംസ്കൃത സർവകലാശാലയിലെ വിദ്യാർഥി സമരത്തെച്ചൊല്ലിയുള്ള വിവാദങ്ങളാണല്ലോ എങ്ങും. വിദ്യാർഥികൾ പഠിച്ചാൽ പോരേ, എന്തിനാണ് സമരം ചെയ്യുന്നത് എന്നാണ് പലരുടെയും ചോദ്യം. മറ്റു ചിലർക്കാകട്ടെ സമരം എങ്ങനെ നടത്തണമെന്നതിലാണ് തർക്കം. അടിസ്ഥാന സൗകര്യങ്ങൾ ആവശ്യപ്പെട്ട് തുടങ്ങിയ സമരത്തിന്റെ പേരിൽ 16 വിദ്യാർഥികളാണ് സസ്പെൻഷനിലായത്. പരീക്ഷയെഴുതാനുള്ള അവകാശത്തിനായി അവർക്ക് കോടതിയെ സമീപിക്കേണ്ടിവന്നു. സമരം ചെയ്ത വിദ്യാർഥികളെ പരീക്ഷയെഴുതാൻ അനുവദിക്കില്ലെന്ന നിലപാടിലാണ് സംഘപരിവാർ നോമിനിയായ താൽക്കാലിക വൈസ് ചാൻസലറും കേരളത്തിന്റെ ഉന്നതവിദ്യാഭ്യാസ മന്ത്രിയും.

സമരരീതിയെച്ചൊല്ലിയും രാഷ്ട്രീയവിവാദം പുകയുകയാണ്. ജനാധിപത്യപരമായി പ്രതിഷേധിച്ച വിദ്യാർഥികൾക്ക് സമരം എങ്ങനെ നടത്തണമെന്ന ഉപദേശങ്ങളാണ് പല കോണുകളിൽനിന്നും ലഭിക്കുന്നത്. സമരമേ വേണ്ടെന്ന അഭിപ്രായക്കാരുമുണ്ട്. ഈ അവസരത്തിൽ ഇന്ത്യയിലെ വിദ്യാർഥി പ്രക്ഷോഭങ്ങളുടെ ചരിത്രവും നമ്മൾ ഓർക്കേണ്ടതുണ്ട്.

ഇന്ന് വിദ്യാർഥികൾ അനുഭവിക്കുന്ന പല അവകാശങ്ങളും ഒരുകാലത്ത് ആരുടെയെങ്കിലുമൊക്കെ സമരാവശ്യങ്ങളായിരുന്നു. ജാതിയുടെ പേരിൽ സ്കൂളിൽ പ്രവേശനം നിഷേധിക്കപ്പെട്ട കാലത്ത് പഠിക്കാനുള്ള അവകാശത്തിനുവേണ്ടിത്തന്നെ മനുഷ്യർക്ക് സമരം ചെയ്യേണ്ടിവന്നിട്ടുണ്ട്. അയ്യങ്കാളിയുടെ നേതൃത്വത്തിൽ നടന്ന പോരാട്ടങ്ങൾ അതിന്റെ ചരിത്രമാണ്. പിന്നീട് വിദ്യാഭ്യാസത്തിലെ ജാതിവിവേചനത്തിനും ലിംഗവിവേചനത്തിനുമെതിരെയും വിദ്യാർഥികൾ പോരാടി. ഹോസ്റ്റൽ നിയന്ത്രണങ്ങളിൽ ഇളവ് ലഭിച്ചതും ആർത്തവകാലത്ത് ഹാജർ ഇളവ് അനുവദിച്ചതും പരീക്ഷാനടത്തിപ്പിലെ ക്രമക്കേടുകൾ തിരുത്തിയതുമെല്ലാം വിദ്യാർഥികളുടെ ഇടപെടലുകൾക്ക് പിന്നാലെയാണ്. പഠനം മുടക്കാനല്ല, പഠിക്കാനും തുല്യപരിഗണന ലഭിക്കാനുമായിരുന്നു ഈ സമരങ്ങൾ.

ഈ വർഷം രാജ്യമാകെ അലയടിച്ച വിദ്യാർഥി പ്രക്ഷോഭം നമ്മൾ കണ്ടതാണ്. നീറ്റ് പരീക്ഷയിലെ ചോദ്യപേപ്പർ ചോർച്ചയ്ക്കെതിരെ ലക്ഷക്കണക്കിന് വിദ്യാർഥികളും യുവജനങ്ങളും വിവിധ പാർടികളും ഒറ്റക്കെട്ടായി പ്രതിഷേധിച്ചു. ഡൽഹിയിലെ ജന്തർ മന്തറിൽ ആഴ്ചകളോളം സമരം തുടർന്നു. പാർലമെന്റ് മാർച്ചും പൊലീസ് നടപടികളും രാജ്യവ്യാപക പ്രതിഷേധത്തിന് വഴിവച്ചു. ഒടുവിൽ കേന്ദ്ര വിദ്യാഭ്യാസമന്ത്രി ധർമേന്ദ്ര പ്രധാനിന് രാജിവയ്ക്കേണ്ടിവന്നു. ഈ സംഘടിത പ്രതിഷേധം കേന്ദ്രമന്ത്രിയുടെ രാജിയിലേക്കെത്തിയിട്ട് മാസങ്ങളേ ആയിട്ടുള്ളൂ. അങ്ങനെയൊരു രാജ്യത്താണ് ഇപ്പോൾ വിദ്യാർഥികൾ സമരം ചെയ്യേണ്ടതുണ്ടോ എന്ന ചോദ്യം ഉയരുന്നത്.

പഠിക്കണമെന്ന് ആവശ്യപ്പെട്ടപ്പോൾ സ്കൂൾ കത്തിച്ച കാലം; അയ്യങ്കാളി സമരം

1914ൽ തിരുവനന്തപുരം ഊരൂട്ടമ്പലത്തെ സ്കൂളിൽ ദളിത് പെൺകുട്ടിയായ പഞ്ചമിയെ പ്രവേശിപ്പിക്കാൻ അയ്യങ്കാളി നടത്തിയ പോരാട്ടം കേരളത്തിന്റെ ചരിത്രത്തിലെ നിർണായക സംഭവമാണ്. പഞ്ചമിയെ ക്ലാസിലിരുത്തിയതിനെതിരെ ജാതിമേധാവിത്വ ശക്തികൾ സ്കൂളിന് തീയിട്ടു. ദളിത് കുട്ടികൾക്ക് വിദ്യാഭ്യാസം നിഷേധിക്കുന്നതിനെതിരെ കർഷകത്തൊഴിലാളികളെ അണിനിരത്തിയും അയ്യങ്കാളി സമരം നടത്തി. ഇന്ന് എല്ലാവർക്കും സ്കൂളിൽ പോകാൻ അവകാശമുണ്ടെന്ന് പറയുന്ന കേരളത്തിൽ, ഒരുകാലത്ത് ആ അവകാശത്തിനുവേണ്ടി സമരം ചെയ്യേണ്ടിവന്നിരുന്നു.

ഫീസ് വർധനയ്ക്കെതിരെ സമരം; വിദ്യാർഥികൾക്കുനേരെ ക്രൂരമായ ആക്രമണം - 2019–20

2019ൽ ഡൽഹിയിലെ ജവാഹർലാൽ നെഹ്റു സർവകലാശാലയിൽ ഹോസ്റ്റൽ ഫീസ് കുത്തനെ വർധിപ്പിച്ചതിനെതിരെ വിദ്യാർഥികൾ വലിയ പ്രക്ഷോഭം നടത്തി. മുറിവാടകയ്ക്കുപുറമേ വൈദ്യുതി, വെള്ളം, മറ്റ് സേവനങ്ങൾ എന്നിവയ്ക്കും അധികതുക ഈടാക്കാനുള്ള തീരുമാനമാണ് പ്രതിഷേധത്തിന് കാരണമായത്. പാർലമെന്റ് മാർച്ചടക്കം നടത്തിയ വിദ്യാർഥികൾക്ക് പൊലീസ് നടപടിയും നേരിടേണ്ടിവന്നു. സമരം ശക്തമായതോടെ ഫീസ് വർധനയിൽ ഭാഗിക ഇളവ് അനുവദിക്കാൻ അധികൃതർ നിർബന്ധിതരായി.

സമരം തുടരുന്നതിനിടെ 2020 ജനുവരി അഞ്ചിന് മുഖംമൂടി ധരിച്ചെത്തിയ സംഘപരിവാർ ​ഗുണ്ടകൾ ജെഎൻയു ക്യാമ്പസിൽ വിദ്യാർഥികളെയും അധ്യാപകരെയും ഇരുമ്പുവടികളും ലാത്തികളും ഉപയോഗിച്ച് ക്രൂരമായി ആക്രമിച്ചു. വിദ്യാർഥി യൂണിയൻ പ്രസിഡന്റ് ഐഷി ഘോഷിന്റെ തലയ്ക്ക് ഗുരുതരമായി പരിക്കേറ്റു. തലയിൽ 16 തുന്നലുകളുണ്ടായിരുന്നു.

ലോ അക്കാദമി സമരം - 2017

തിരുവനന്തപുരം ലോ അക്കാദമിയിൽ പ്രിൻസിപ്പൽ ലക്ഷ്മി നായർക്കെതിരെ വിദ്യാർഥികൾ 29 ദിവസം സമരം നടത്തി. ഇന്റേണൽ മാർക്കിലെ ക്രമക്കേടുകൾ, ജാതി അധിക്ഷേപം, വിദ്യാർഥികളോടുള്ള പെരുമാറ്റം തുടങ്ങിയ പരാതികളാണ് സമരത്തിന് കാരണമായത്.

എസ്എഫ്ഐ, കെഎസ്‌യു, എഐഎസ്എഫ്, എബിവിപി ഉൾപ്പെടെയുള്ള സംഘടനകൾ വിവിധ ഘട്ടങ്ങളിൽ സമരത്തിൽ പങ്കെടുത്തു. ഒടുവിൽ മാനേജ്മെന്റ് ലക്ഷ്മി നായരെ പ്രിൻസിപ്പൽ സ്ഥാനത്തുനിന്ന് മാറ്റാൻ സമ്മതിച്ചു. സമരം ചെയ്ത വിദ്യാർഥികളുമായി ചർച്ച നടത്തി അവരുടെ ആവശ്യം അംഗീകരിച്ചതോടെയാണ് 29 ദിവസം നീണ്ട പ്രക്ഷോഭത്തിന് അവസാനമായത്.

കേരള സർവകലാശാലയിലെ ഗവേഷകരുടെ സമരം - 2016

കാലടിയിലെ ഇപ്പോഴത്തെ സംഭവവുമായി ഏറെ സാമ്യമുള്ള സമരമാണിത്. ഗവേഷണകാലാവധി നീട്ടുന്നതിനുള്ള ഫീസ് 600 രൂപയിൽനിന്ന് 1.70 ലക്ഷം രൂപയായി വർധിപ്പിച്ചതിനെതിരെ കേരള സർവകലാശാലയിലെ ഗവേഷകർ പ്രതിഷേധിച്ചു.

വിസിയെ സമീപിച്ച വിദ്യാർഥികളിൽ ആറുപേരെ സസ്പെൻഡ് ചെയ്തു. ഇവരിൽ നാലുപേർ ദളിത് വിഭാഗത്തിൽപ്പെട്ട ഗവേഷകരായിരുന്നു. സസ്പെൻഷനെതിരെയും ഫീസ് വർധനയ്ക്കെതിരെയും ഗവേഷകർ സർവകലാശാലയ്ക്കുമുന്നിൽ അനിശ്ചിതകാല സമരം നടത്തി.

പാഠപുസ്തക സമരം — 2015

പാഠപുസ്തക വിതരണം വൈകിയതിനെതിരെ കേരളത്തിലെ വിദ്യാർഥി സംഘടനകൾ നടത്തിയ പ്രതിഷേധവും പ്രധാനമാണ്. സമരങ്ങൾക്കൊടുവിൽ അന്നത്തെ വിദ്യാഭ്യാസമന്ത്രി പി കെ അബ്ദുറബ്ബും ആഭ്യന്തരമന്ത്രി രമേശ് ചെന്നിത്തലയും എട്ട് വിദ്യാർഥി സംഘടനകളുടെ പ്രതിനിധികളുമായി ചർച്ച നടത്തി.

ജൂലൈ 20നകം പാഠപുസ്തക വിതരണം പൂർത്തിയാക്കുമെന്ന് സർക്കാർ ഉറപ്പുനൽകി. കാലതാമസത്തെക്കുറിച്ച് അന്വേഷണം നടത്താനും തീരുമാനിച്ചു. പഠിക്കാനുള്ള പുസ്തകങ്ങൾ ലഭിക്കാൻ വിദ്യാർഥികൾ സമരം ചെയ്ത സംഭവമാണിത്.

ഹോസ്റ്റൽ ഗേറ്റിന് മുന്നിൽ നേടിയ വിജയം

2019ൽ തൃശൂരിലെ ശ്രീകേരളവർമ കോളേജിൽ വനിതാ ഹോസ്റ്റലിലെ സമയനിയന്ത്രണത്തിനെതിരെ വിദ്യാർഥിനികൾ സമരം ചെയ്തു. വൈകുന്നേരം നാലരയ്ക്കും ആറിനുമിടയിൽ ഹോസ്റ്റലിൽ തിരിച്ചെത്തണമെന്ന നിയന്ത്രണമാണ് ചോദ്യംചെയ്തത്. ആൺകുട്ടികൾക്കില്ലാത്ത നിയന്ത്രണം പെൺകുട്ടികൾക്കു മാത്രമെന്തിനെന്ന ചോദ്യവുമായി എഴുപതോളം വിദ്യാർഥിനികൾ പ്രതിഷേധിച്ചു. ഒടുവിൽ ഹോസ്റ്റലിൽ പ്രവേശിക്കാനുള്ള സമയം രാത്രി 8.30 വരെ നീട്ടി.

ആർത്തവകാലത്തെ ഹാജർ ഇളവും വിദ്യാർഥികളുടെ നേട്ടം

2023ൽ കൊച്ചി ശാസ്ത്രസാങ്കേതിക സർവകലാശാലയിൽ വിദ്യാർഥികളുടെ ആവശ്യത്തെത്തുടർന്ന് ആർത്തവകാലത്ത് ഹാജറിൽ രണ്ടുശതമാനം അധിക ഇളവ് അനുവദിച്ചു. പിന്നാലെ സംസ്ഥാനത്തെ ഉന്നതവിദ്യാഭ്യാസ സ്ഥാപനങ്ങളിലേക്കും സർക്കാർ ഈ തീരുമാനം വ്യാപിപ്പിച്ചു. 18 വയസ് കഴിഞ്ഞ വിദ്യാർഥിനികൾക്ക് പ്രസവാവധി അനുവദിക്കാനുള്ള തീരുമാനവുമുണ്ടായി. വിദ്യാർഥികൾ സ്വന്തം അനുഭവങ്ങൾ മുന്നോട്ടുവച്ചപ്പോൾ വിദ്യാഭ്യാസരംഗത്ത് ഉണ്ടായ മാറ്റമായിരുന്നു അത്.

ജാദവ്പുർ മുതൽ ഐഐടി മദ്രാസ് വരെ

2014ൽ പശ്ചിമബംഗാളിലെ ജാദവ്പുർ സർവകലാശാലയിൽ വിദ്യാർഥിനിക്കെതിരായ ലൈംഗികാതിക്രമ പരാതിയിലെ നടപടികളെച്ചൊല്ലി വലിയ പ്രതിഷേധമുയർന്നു. വിദ്യാർഥികൾക്കെതിരായ പൊലീസ് നടപടിയോടെ സമരം ശക്തമായി. ‘ഹോക്കൊലൊറോബ്’ എന്ന പേരിൽ അറിയപ്പെട്ട പ്രക്ഷോഭത്തിനൊടുവിൽ 2015 ജനുവരിയിൽ വൈസ് ചാൻസലർ അഭിജിത് ചക്രബർത്തി രാജിവച്ചു.

2015ൽ ഐഐടി മദ്രാസിലെ അംബേദ്കർ പെരിയാർ സ്റ്റഡി സർക്കിളിന്റെ അംഗീകാരം പിൻവലിച്ചതിനെതിരെയും വിദ്യാർഥികൾ പ്രതിഷേധിച്ചു. സാമൂഹ്യനീതിയും രാഷ്ട്രീയവും ചർച്ച ചെയ്യാനുള്ള അവകാശം ഉയർത്തിയ സമരത്തിനൊടുവിൽ അധികൃതർ തീരുമാനം തിരുത്തി. വിദ്യാർഥി കൂട്ടായ്മയുടെ അംഗീകാരം പുനഃസ്ഥാപിച്ചു.

പഠനസ്ഥാപനത്തിന്റെ സ്വാതന്ത്ര്യത്തിനായി എഫ്ടിഐഐ സമരം

2015ൽ പൂനെയിലെ ഫിലിം ആൻഡ് ടെലിവിഷൻ ഇൻസ്റ്റിറ്റ്യൂട്ട് ഓഫ് ഇന്ത്യയിൽ നടന്ന വിദ്യാർഥി സമരം 139 ദിവസം നീണ്ടു. സ്ഥാപനത്തിന്റെ ചെയർമാനായി ഗജേന്ദ്ര ചൗഹാനെ നിയമിച്ചതിനെതിരെയായിരുന്നു പ്രതിഷേധം. നിയമനത്തിലെ രാഷ്ട്രീയ ഇടപെടലും സ്ഥാപനത്തിന്റെ സ്വാതന്ത്ര്യവും ചോദ്യംചെയ്ത വിദ്യാർഥികൾ രാജ്യവ്യാപക ശ്രദ്ധ നേടി.

സർക്കാരുകളെപ്പോലും മാറ്റിയ വിദ്യാർഥി സമരങ്ങൾ

1974ൽ ഗുജറാത്തിൽ വിദ്യാർഥികളുടെ ഭക്ഷണച്ചെലവ് വർധനയ്ക്കെതിരെ ആരംഭിച്ച നവനിർമാൺ പ്രക്ഷോഭം പിന്നീട് അഴിമതിക്കും വിലക്കയറ്റത്തിനുമെതിരായ വലിയ സമരമായി. പ്രതിഷേധം ശക്തമായതോടെ ചിമൻഭായ് പട്ടേലിന് മുഖ്യമന്ത്രി സ്ഥാനം രാജിവെക്കേണ്ടിവന്നു.

അതേ വർഷം ബിഹാറിലും വിദ്യാർഥികൾ അഴിമതിക്കും ഭരണത്തിലെ വീഴ്ചകൾക്കുമെതിരെ സമരത്തിനിറങ്ങി. ജയപ്രകാശ് നാരായൺ നേതൃത്വം ഏറ്റെടുത്ത പ്രക്ഷോഭം പിന്നീട് ദേശീയ രാഷ്ട്രീയത്തിലെ നിർണായക സംഭവങ്ങളിലൊന്നായി മാറി. ഈ സമരങ്ങളിൽ സംഘർഷങ്ങളും പൊലീസ് നടപടികളും ഉണ്ടായിരുന്നുവെന്നതും ചരിത്രത്തിന്റെ ഭാഗമാണ്.

കേരളത്തിലും വിദ്യാഭ്യാസനയങ്ങളെച്ചൊല്ലിയുള്ള വിദ്യാർഥി പ്രക്ഷോഭങ്ങൾക്ക് നീണ്ട ചരിത്രമുണ്ട്. പ്രീഡിഗ്രി വിദ്യാഭ്യാസത്തെ സർവകലാശാലകളിൽനിന്ന് വേർപെടുത്താനുള്ള നീക്കത്തിനെതിരെ 1986ൽ നടന്ന സമരങ്ങളും അതിലൊന്നാണ്.

ഇങ്ങനെ നിരവധിയായ പ്രതിഷേധങ്ങളും സമരങ്ങളുമാണ് നമ്മുടെ നാട്ടിൽ വിദ്യാഭ്യാസരം​ഗത്ത് മാത്രം ഉണ്ടായിട്ടുള്ളത്.

സമരങ്ങളിലൂടെ വളർന്നുവന്ന പഴയ വിദ്യാർഥി നേതാക്കൾ ഇന്ന് എന്തുപറയുന്നു?

കാലടിയിലെ വിവാദത്തിന് മറ്റൊരു വശവുമുണ്ട്. വിദ്യാർഥി രാഷ്ട്രീയത്തിലൂടെ വളർന്ന നേതാക്കളാണ് ഇന്ന് സമരത്തിന്റെ രീതികളെ ചോദ്യം ചെയ്യുന്നത്.

ഉന്നതവിദ്യാഭ്യാസ മന്ത്രി റോജി എം ജോൺ കോളേജ് യൂണിയൻ ചെയർമാനും എൻഎസ്‌യു ദേശീയ പ്രസിഡന്റുമായിരുന്നു. ഷാഫി പറമ്പിൽ കെഎസ്‌യു സംസ്ഥാന പ്രസിഡന്റായിരുന്നിട്ടുണ്ട്. വിദ്യാർഥി പ്രക്ഷോഭങ്ങളുടെ അനുഭവങ്ങളുള്ള നേതാക്കളാണ് ഇരുവരും.

കാലടിയിൽ സമരം ചെയ്ത വിദ്യാർഥികൾ സിൻഡിക്കേറ്റ് യോഗം അലങ്കോലപ്പെടുത്തിയെന്ന വാദമാണ് ഇപ്പോൾ ഉയരുന്നത്. എന്നാൽ ചർച്ചയ്ക്കായി വിളിച്ചുവരുത്തിയശേഷം ആവശ്യങ്ങൾ കേൾക്കാതെ അപമാനിച്ചുവിട്ടെന്നാണ് വിദ്യാർഥികളുടെ വിശദീകരണം. നേരത്തേ സമരത്തിന്റെ ഭാഗമായി ലൈറ്റ് മരിച്ചുവെന്ന തരത്തിൽ അവതരിപ്പിച്ച നാടകത്തെ വിസിക്ക് ശവമഞ്ചം ഒരുക്കിയതായി ചിത്രീകരിച്ചും പ്രചാരണം നടത്തി.

പഠിക്കാൻ പോയാൽ പഠിച്ചാൽ മാത്രം പോര

ശ്രീകേരളവർമയിലെ വിദ്യാർഥിനികൾ സമരം ചെയ്താണ് ഹോസ്റ്റൽ നിയന്ത്രണത്തിൽ ഇളവ് നേടിയത്. കുസാറ്റിലെ വിദ്യാർഥികൾ ഉന്നയിച്ച ആവശ്യമാണ് ആർത്തവകാലത്തെ ഹാജർ ഇളവിലേക്ക് നയിച്ചത്. നീറ്റ് ചോദ്യപേപ്പർ ചോർച്ചയ്ക്കെതിരായ രാജ്യവ്യാപക സമരം കേന്ദ്ര വിദ്യാഭ്യാസമന്ത്രിയുടെ രാജിയിലേക്കുവരെ എത്തി.

വിദ്യാർഥികൾ പഠിക്കണം. എന്നാൽ പഠിക്കാനുള്ള സൗകര്യങ്ങൾ ഇല്ലെങ്കിൽ അത് ചോദിക്കാനും അനീതിയെന്ന് തോന്നുന്ന തീരുമാനങ്ങളെ വിമർശിക്കാനും അവർക്ക് അവകാശമുണ്ട്. ഇന്നത്തെ വിദ്യാർഥികൾ അനുഭവിക്കുന്ന പല അവകാശങ്ങൾക്കു പിന്നിലും മുൻതലമുറകളുടെ സമരങ്ങളുണ്ട്.

അതുകൊണ്ട് ‘പഠിക്കാൻ പോയാൽ പഠിച്ചാൽ പോരേ’ എന്നു ചോദിക്കുമ്പോൾ, പഠിക്കാനുള്ള സാഹചര്യം ഒരുക്കാൻ നടത്തിയ സമരങ്ങളും വിദ്യാഭ്യാസചരിത്രത്തിന്റെ ഭാഗമാണെന്ന് മനസ്സിലാക്കണം. ചോദ്യങ്ങൾ ചോദിച്ചും അനീതികള്‍ക്കെതിരെ ശബ്ദമുയര്‍ത്തിയുമാണ് ഓരോ വിദ്യാർഥിയും, ഓരോ തലമുറയും വളരേണ്ടത്.