റഷ്യൻ മണ്ണിൽ ഫ്രഞ്ച് വിപ്ലവം

2018-ൽ റഷ്യയിൽ നടന്ന 21-ാമത് ഫിഫ ലോകകപ്പിൽ ക്രൊയേഷ്യയെ വീഴ്ത്തി ഫ്രാൻസ് തങ്ങളുടെ രണ്ടാം കിരീടം ചൂടി. 1998-ന് ശേഷം കൃത്യം ഇരുപത് വർഷങ്ങൾക്കിപ്പുറമാണ് ഫ്രാൻസ് വീണ്ടും ലോകചാമ്പ്യന്മാരാകുന്നത്. ഫുട്ബോൾ സാങ്കേതികവിദ്യയിലും നിയമങ്ങളിലും വലിയ മാറ്റങ്ങൾക്ക് തുടക്കം കുറിച്ച ഈ ലോകകപ്പിലെ പ്രധാന സവിശേഷതകളും ശ്രദ്ധേയമായ മുഹൂർത്തങ്ങളും താഴെ പറയുന്നവയാണ്:

ആദ്യമായി കിഴക്കൻ യൂറോപ്പിൽ

റഷ്യയോ മറ്റേതെങ്കിലും കിഴക്കൻ യൂറോപ്യൻ രാജ്യമോ ലോകകപ്പിന് ആതിഥേയത്വം വഹിക്കുന്നത് ചരിത്രത്തിലാദ്യമായായിരുന്നു. യൂറോപ്പിലും ഏഷ്യയിലുമായി രണ്ട് ഭൂഖണ്ഡങ്ങളിലായി വ്യാപിച്ചുകിടക്കുന്ന 11 നഗരങ്ങളിലെ 12 വേദികളിലായാണ് മത്സരങ്ങൾ സംഘടിപ്പിച്ചത്.

ഔദ്യോഗിക പന്തും ഭാഗ്യചിഹ്നവും

സ്മാർട്ട്ഫോണുമായി ബന്ധിപ്പിക്കാവുന്ന എൻ.എഫ്.സി (NFC) ചിപ്പ് ഉൾപ്പെടുത്തിയ 'ടെൽസ്റ്റാർ 18' (Telstar 18) ആയിരുന്നു ടൂർണമെന്റിലെ ഔദ്യോഗിക പന്ത്. 'ഗോൾ നേടുന്നവൻ' എന്നർത്ഥം വരുന്ന 'സബിവാക്ക' (Zabivaka) എന്ന ചെന്നായ ആയിരുന്നു ഭാഗ്യചിഹ്നം.

VAR-ന്റെ അരങ്ങേറ്റം

റഫറിയിങ് തീരുമാനങ്ങൾ പുനഃപരിശോധിക്കാനുള്ള വീഡിയോ അസിസ്റ്റന്റ് റഫറി (VAR) സംവിധാനം ലോകകപ്പ് ചരിത്രത്തിൽ ആദ്യമായി ഉപയോഗിച്ചത് ഈ ടൂർണമെന്റിലാണ്. ഫ്രാൻസിന്റെ അന്റോയിൻ ഗ്രീസ്മാൻ ആണ് ആദ്യത്തെ 'VAR പെനാൽറ്റി' വഴി ഗോൾ നേടിയത്.

പുതിയ ഫെയർ പ്ലേ നിയമം

കുറഞ്ഞ യെല്ലോ കാർഡുകളുടെ അടിസ്ഥാനത്തിലുള്ള ഫെയർ പ്ലേ നിയമത്തിലൂടെ ജപ്പാൻ ചരിത്രത്തിലാദ്യമായി ഗ്രൂപ്പ് ഘട്ടം കടന്നു. സെനഗലിനെക്കാൾ കുറവ് കാർഡുകൾ വഴങ്ങിയതാണ് ജപ്പാന് തുണയായത്. ഈ നിയമത്തിലൂടെ ഒരു ടീം അടുത്ത റൗണ്ടിലേക്ക് കടക്കുന്നത് ലോകകപ്പിൽ ആദ്യമായാണ്.

റഷ്യയുടെ അപ്രതീക്ഷിത മുന്നേറ്റം

റാങ്കിങ്ങിൽ ഏറ്റവും പിന്നിലായിരുന്ന ആതിഥേയരായ റഷ്യ എല്ലാ പ്രവചനങ്ങളെയും അട്ടിമറിച്ച് ക്വാർട്ടർ ഫൈനൽ വരെ എത്തി. എന്നാൽ നിലവിലെ ചാമ്പ്യന്മാരായിരുന്ന ജർമ്മനി ചരിത്രത്തിലാദ്യമായി ഗ്രൂപ്പ് ഘട്ടത്തിൽ തന്നെ പുറത്തായി. വമ്പൻമാരായ ഇറ്റലിയും നെതർലൻഡ്സും യോഗ്യത നേടാതിരുന്ന ലോകകപ്പ് കൂടിയാണിത്. പങ്കെടുത്ത 32 ടീമുകളും ടൂർണമെന്റിൽ ചുരുങ്ങിയത് രണ്ട് ഗോളുകളെങ്കിലും നേടി എന്ന അപൂർവ്വനേട്ടം ഈ ലോകകപ്പിലുണ്ടായി.

ബസ് പാർക്കിങ് ഡിഫെൻസ്

2018-ലെ റഷ്യൻ ലോകകപ്പിൽ തങ്ങളുടെ കന്നി മത്സരത്തിൽ തന്നെ സാക്ഷാൽ അർജന്റീനയെ 1-1ന് സമനിലയിൽ തളച്ച് ഐസ്‌ലാൻഡ് ഫുട്ബോൾ ലോകത്തെ ഞെട്ടിച്ചു. പരിശീലകൻ ഹെയ്മിർ ഹാൾഗ്രിംസൺ (Heimir Hallgrímsson) ഒരുക്കിയ "പാർക്കിംഗ് ദി ബസ്" തന്ത്രമായിരുന്നു ഈ ചരിത്ര നേട്ടത്തിന് പിന്നിൽ. ടീമിലെ മുഴുവൻ കളിക്കാരെയും അണിനിരത്തി, സ്വന്തം ഗോൾപോസ്റ്റിന് സമീപം ഭേദിക്കാൻ കഴിയാത്തവിധം തിങ്ങിനിറഞ്ഞ ഒരു പ്രതിരോധ കോട്ട തീർക്കുക എന്നതാണ് ഈ തന്ത്രത്തിന്റെ ലക്ഷ്യം.

എതിരാളികളെ പൂർണ്ണമായും പന്ത് കൈവശം വെക്കാൻ അനുവദിച്ച് പ്രതിരോധ നിരയെ സ്വന്തം ഹാഫിലേക്ക് വളരെ പിന്നിലായി പിൻവലിക്കുന്ന ലോ ബ്ലോക്ക് രീതിയാണ് ഐസ്‌ലാൻഡ് ഇതിനായി സ്വീകരിച്ചത്. മധ്യനിരയിലും പ്രതിരോധത്തിലുമായി കളിക്കാരെ തിങ്ങിനിറച്ച് അണിനിരത്തിയതോടെ, അർജന്റീനയ്ക്ക് മുന്നേറാനും പാസ് നൽകാനുമുള്ള എല്ലാ വഴികളും അടഞ്ഞു.

4-5-1 എന്ന ഫോർമേഷനിൽ ഐസ്‌ലാൻഡ് തീർത്ത ഈ പ്രതിരോധ കോട്ടയ്ക്കെതിരെ 78% പന്ത് കൈവശം വെക്കുകയും 27 ഷോട്ടുകൾ ഉതിർക്കുകയും ചെയ്തിട്ടും അർജന്റീനയ്ക്ക് വിജയഗോൾ കണ്ടെത്താനായില്ല.

ഇംഗ്ലണ്ടിന്റെ ശാപമോക്ഷം

ലോകകപ്പ് ചരിത്രത്തിൽ തങ്ങളുടെ ആദ്യ പെനാൽറ്റി ഷൂട്ടൗട്ട് വിജയം ഇംഗ്ലണ്ട് പ്രീ ക്വാർട്ടറിൽ കൊളംബിയക്കെതിരെ നേടി. ടൂർണമെന്റിൽ ആകെ 6 ഗോളുകൾ നേടിയ ഇംഗ്ലീഷ് ക്യാപ്റ്റൻ ഹാരി കെയ്ൻ ടോപ് സ്കോറർക്കുള്ള ഗോൾഡൻ ബൂട്ട് പുരസ്കാരവും സ്വന്തമാക്കി.

പെലെയ്ക്ക് ശേഷം എംബാപ്പെ

1958-ൽ സാക്ഷാൽ പെലെയ്ക്ക് ശേഷം ലോകകപ്പ് ഫൈനലിൽ ഗോളടിക്കുന്ന ആദ്യ കൗമാരതാരമായി ഫ്രാൻസിന്റെ സ്ട്രൈക്കർ കിലിയൻ എംബാപ്പെ റെക്കോർഡിട്ടു. ടൂർണമെന്റിലുടനീളം മികച്ച പ്രകടനം കാഴ്ചവെച്ച എംബാപ്പെ ലോകകപ്പിലെ മികച്ച യുവതാരത്തിനുള്ള പുരസ്കാരവും സ്വന്തമാക്കി.

ഏറ്റവും പ്രായം കൂടിയ താരം

സ്പെയിനിനെതിരായ ആവേശകരമായ മത്സരത്തിൽ ഫ്രീ-കിക്കിലൂടെ ഹാട്രിക് നേടിയ ക്രിസ്റ്റ്യാനോ റൊണാൾഡോ (33 വയസ്സ്), ലോകകപ്പിൽ ഹാട്രിക് നേടുന്ന ഏറ്റവും പ്രായം കൂടിയ താരമായി.

ഈജിപ്ഷ്യൻ ഗോൾകീപ്പർ എസ്സാം എൽ-ഹദാരി തന്റെ 45-ാം വയസ്സിൽ സൗദി അറേബ്യയ്ക്കെതിരെ കളത്തിലിറങ്ങി ലോകകപ്പ് ചരിത്രത്തിലെ ഏറ്റവും പ്രായം കൂടിയ താരമെന്ന റെക്കോർഡ് സ്വന്തമാക്കി. 2014-ൽ കൊളംബിയൻ ഗോൾകീപ്പർ ഫാരിദ് മൊണ്ട്രാഗൺ സ്ഥാപിച്ച റെക്കോർഡാണ് ഇതോടെ തകർക്കപ്പെട്ടത്.

സുന്ദര ഗോളുകൾ

അർജന്റീനയ്ക്കെതിരായ പ്രീ-ക്വാർട്ടർ മത്സരത്തിൽ ഫ്രഞ്ച് പ്രതിരോധ താരം ബെഞ്ചമിൻ പവാർഡ് പെനാൽറ്റി ബോക്സിന് പുറത്തുനിന്ന് നേടിയ അതിമനോഹരമായ വോളി യാണ് 2018 ലോകകപ്പിലെ ഏറ്റവും മികച്ച ഗോളായി തിരഞ്ഞെടുക്കപ്പെട്ടത്. ഇഞ്ചുറി ടൈമിന്റെ അവസാന നിമിഷം സ്വീഡനെതിരായ ജർമനി യുടെ ടോണി ക്രൂസ് നേടിയ തകർപ്പൻ ഫ്രീ-കിക്ക് ഗോൾ ടൂർണമെന്റിലെ ഏറ്റവും നാടകീയമായ നിമിഷങ്ങളിലൊന്നായിരുന്നു.

ജപ്പാനെതിരായ പ്രീ-ക്വാർട്ടർ മത്സരത്തിൽ 2-0 ന് പിന്നിൽ നിന്ന ശേഷം ബെൽജിയം ഗംഭീര തിരിച്ചുവരവ് നടത്തി 3-2 ന് വിജയിച്ചു . ഇഞ്ചുറി ടൈമിൽ വെറും പത്ത് സെക്കൻഡുകൾ കൊണ്ട് മൈതാനത്തിന്റെ മറുതലയ്ക്കൽ നിന്നെത്തിയ അതിവേഗത്തിലുള്ള ഒരു കൗണ്ടർ അറ്റാക്കിലൂടെ നാസർ ചാഡ്‌ലി നേടിയ വിന്നിംഗ് ഗോൾ ലോകകപ്പ് ചരിത്രത്തിലെ തന്നെ മികച്ച ഗോളുകളിലൊന്നാണ്.

കാന്റെ: വിശ്രമമില്ലാത്ത പോരാളി

പ്രധാനമായും ഡിഫൻസീവ് മിഡ്ഫീൽഡർ പൊസിഷനിലാണ് കളിക്കുന്നത്. മൈതാനമധ്യത്ത് വിശ്രമമില്ലാതെ ഓടിനടന്ന് കളിക്കുന്നതുകൊണ്ട് അദ്ദേഹത്തെ ഒരു മികച്ച ബോക്സ്-ടു-ബോക്സ് മിഡ്ഫീൽഡർ ആയും കണക്കാക്കുന്നു.എതിർ ടീമിന്റെ മുന്നേറ്റങ്ങളെ തടയുകയും, പന്ത് റാഞ്ചിയെടുത്ത് സ്വന്തം ടീമിന്റെ ആക്രമണങ്ങൾക്ക് തുടക്കമിടുകയും ചെയ്യുന്നതാണ് പ്രധാനചുമതല.പ്രതിരോധനിരയ്ക്ക് മുന്നിൽ ഒരാൾ തന്നെ രണ്ടുപേരുടെ ജോലി മൈതാനത്ത് ചെയ്യുന്നു എന്ന് തോന്നിപ്പിക്കുന്ന വിധത്തിലാണ് കളിക്കുന്നത്. ഈ സവിശേഷതയാണ് അദ്ദേഹത്തെ ഏറ്റവും മികച്ച മധ്യനിരക്കാരിൽ ഒരാളാക്കി മാറ്റുന്നത്. ഫ്രാൻസ് കപ്പ് എടുത്തതിന് മുഖ്യ പങ്കു വഹിച്ചത് ഇദ്ദേഹമാണ്.

ഫൈനലിലെ പോരാട്ടം

കിരീടം വിഖ്യാത ഗോൾ കീപ്പർ ഹ്യൂഗോ ലോറിസിന്റെ നേതൃത്വത്തിൽ ഫ്രാൻസ് നേടിയെങ്കിലും (4-2), മികച്ച പന്തടക്കത്തോടെ പൊരുതിക്കളിച്ച ക്രൊയേഷ്യ ആരാധകരുടെ മനംകവർന്നു. ടൂർണമെന്റിലെ മികച്ച താരത്തിനുള്ള ഗോൾഡൻ ബോൾ പുരസ്കാരം ക്രൊയേഷ്യൻ ക്യാപ്റ്റൻ ലൂക്കാ മോഡ്രിച്ച് സ്വന്തമാക്കി. ക്രൊയേഷ്യൻ താരം മാരിയോ മാൻസുകിച്ച് ഫൈനലിൽ ഒരു സെൽഫ് ഗോൾ വഴങ്ങിയിരുന്നു, എന്നാൽ അതേ മത്സരത്തിൽ തന്നെ അദ്ദേഹം ക്രൊയേഷ്യക്കായി ഒരു ഗോൾ തിരിച്ചടിക്കുകയും ചെയ്തു. ഇതോടെ ഒരു ലോകകപ്പ് ഫൈനലിൽ സെൽഫ് ഗോളും സാധാരണ ഗോളും നേടുന്ന ചരിത്രത്തിലെ ആദ്യ താരമായി അദ്ദേഹം മാറി.