അതിർത്തി ക്രോസിങ്ങുകളിൽ ഡ്യൂട്ടി-ഫ്രീ മാർക്കറ്റ്‌ സ്ഥാപിച്ച്‌ ഒമാൻ പോലിസ്

മസ്‌കത്ത്: അൽ വജാജ, ഖത്മത് മലാഹ, റുബ്‌അൽ ഖാലി എന്നീ ഒമാന്റെ മൂന്ന് പ്രധാന കര അതിർത്തി ക്രോസിങ്ങുകളിൽ ഡ്യൂട്ടി-ഫ്രീ മാർക്കറ്റുകൾ സ്ഥാപിക്കാൻ റോയൽ ഒമാൻ പോലീസ് തീരുമാനിച്ചു. പുതിയ വാണിജ്യ മേഖലകൾക്ക് അംഗീകാരം നൽകുന്നതിനായി പോലീസ് ആൻഡ് കസ്റ്റംസ് ഇൻസ്‌പെക്ടർ ജനറൽ ലെഫ്റ്റനന്റ് ജനറൽ ഹസൻ ബിൻ മൊഹ്‌സെൻ അൽ ഷുറാഖി ഉത്തരവ് പുറപ്പെടുവിച്ചു. കസ്റ്റംസ് തീരുവയിൽനിന്നും നികുതികളിൽ നിന്നും പൂർണമായും ഒഴിവാക്കി ഒമാന്റെ കര അതിർത്തികളിൽ സാമ്പത്തികവും വാണിജ്യപരവുമായ പ്രവർത്തനങ്ങൾ ഉത്തേജിപ്പിക്കുക എന്നതാണ് ഈ സംരംഭത്തിന്റെ ലക്ഷ്യം.

പ്രാദേശിക വാണിജ്യത്തെ മുന്നോട്ട് കൊണ്ടുപോകുന്നതിനപ്പുറം, ലോജിസ്റ്റിക-്‌സ്‌ മേഖല മെച്ചപ്പെടുത്തുന്നതിനും അതിർത്തി കടന്നുള്ള ടൂറിസത്തെ പിന്തുണയ്ക്കുന്നതിനും ട്രാൻസിറ്റ് യാത്രക്കാർക്കുള്ള റീട്ടെയിൽ ഓപ്ഷനുകൾ വികസിപ്പിച്ചുകൊണ്ട് മൊത്തത്തിലുള്ള യാത്രാ അനുഭവം ഉയർത്തുന്നതിനുമാണ് പുതിയ ഡ്യൂട്ടി-ഫ്രീ സോണുകൾ രൂപകൽപ്പന ചെയ്തിരിക്കുന്നത്.