കുവൈത്ത് വിമാനത്താവളത്തിലെ ടി1 ടെർമിനൽ നവംബറിൽ തുറക്കും

കുവൈത്ത് സിറ്റി: സൗദി സൂപ്പർ കപ്പ് ഫുട്ബോൾ ടൂർണമെന്റിന് മുന്നോടിയായി കുവൈത്ത് അന്താരാഷ്ട്ര വിമാനത്താവളത്തിലെ ഒന്നാം ടെർമിനൽ (ടി1) നവംബറിൽ പ്രവർത്തനം പുനരാരംഭിക്കുമെന്ന് ഒന്നാം ഉപപ്രധാനമന്ത്രിയും ആഭ്യന്തരമന്ത്രിയുമായ ഷെയ്ഖ് ഫഹദ് യൂസഫ് സൗദ് അൽ സബാഹ് അറിയിച്ചു.

ജാബർ അൽ അഹ-്‌മദ് അന്താരാഷ-്‌ട്ര സ്റ്റേഡിയത്തിൽ ടൂർണമെന്റിന്റെ സർക്കാർ പങ്കാളിത്ത സ്‌പോൺസർഷിപ്പ് കരാറിൽ കായിക പൊതുഅതോറിറ്റി ഒപ്പുവെച്ചശേഷം തിങ്കളാഴ്‌ച മാധ്യമങ്ങളോട് സംസാരിക്കുകയായിരുന്നു അദ്ദേഹം. ​സൗദി സൂപ്പർ കപ്പിന്റെ 13–ാം പതിപ്പ് ഡിസംബർ 19 മുതൽ 23 വരെ ജാബർ അൽ അഹ-്‌മദ് അന്താരാഷ-്‌ട്ര സ്റ്റേഡിയത്തിൽ നടക്കും. അൽ നസർ, അൽ അഹ്‌ലി, അൽ ഖാദിസിയ, അൽ ഖുലൂദ് എന്നീ നാല് ക്ലബ്ബുകളാണ് പങ്കെടുക്കുന്നത്. സെമിഫൈനൽ മത്സരങ്ങൾ ഡിസംബർ 19, 20 തീയതികളിലും ഫൈനൽ ഡിസംബർ 23നും നടക്കും.

​സൗദിയിൽനിന്നുള്ള ആരാധകരുടെ വരവ് സുഗമമാക്കാൻ ആഭ്യന്തര മന്ത്രാലയം വിവിധ ഒരുക്കങ്ങൾ നടത്തിയതായി മന്ത്രി പറഞ്ഞു. നുവൈസീബ് അതിർത്തി കവാടത്തിൽ യാത്രക്കാരുടെ പ്രവേശന നടപടികൾ പൂർത്തിയാക്കുന്നതിനുള്ള കൗണ്ടറുകളുടെ എണ്ണം 20 ആയി ഉയർത്തും. ​ടൂർണമെന്റിൽ പങ്കെടുക്കുന്ന താരങ്ങളെയും ടീം ഉദ്യോഗസ്ഥരെയും വിമാനത്താവളത്തിലെ ബയോമെട്രിക് വിരലടയാള നടപടികളിൽനിന്ന് ഒഴിവാക്കും. ഇവരുടെ പ്രവേശനവും മടക്കയാത്രയും സുഗമമാക്കാൻ പ്രത്യേക തിരിച്ചറിയൽ കാർഡുകളും നൽകും. കായികമേഖലയുടെ വികസനത്തിനൊപ്പം കായിക വിനോദസഞ്ചാരം പ്രോത്സാഹിപ്പിക്കാനും കൂടുതൽ ആരാധകരെ രാജ്യത്തേക്ക് ആകർഷിക്കാനും ഇതിലൂടെ ലക്ഷ്യമിടുന്നു.

​കുവൈത്തും സൗദി അറേബ്യയും തമ്മിലുള്ള ചരിത്രപരമായ സൗഹൃദത്തിന്റെയും സാഹോദര്യത്തിന്റെയും പ്രതിഫലനമാണ് ടൂർണമെന്റിന്റെ ആതിഥേയത്വമെന്നും അതോറിറ്റി ചൂണ്ടിക്കാട്ടി. ഇരുരാജ്യങ്ങളും തമ്മിലുള്ള കായിക സഹകരണം ശക്തിപ്പെടുത്താനും പ്രധാന കായികമേളകളുടെ കേന്ദ്രമായി കുവൈത്തിനെ വളർത്താനും സഹായിക്കുന്ന പരിപാടികൾക്ക് പിന്തുണ തുടരുമെന്നും പ്രസ്താവനയിൽ അറിയിച്ചു.