ടുഗെദർ വി അഡ്വാൻസ് ഫോറം: വിഷയം തെരഞ്ഞെടുക്കാനുള്ള ഓൺലൈൻ വോട്ടെടുപ്പ് തുടങ്ങി

മസ്‌കത്ത്‌: അടുത്ത വർഷം ഒമാന്റെ ഗവർണറേറ്റുകളിൽ നടക്കാനിരിക്കുന്ന "ടുഗെദർ വി അഡ്വാൻസ്' ഫോറത്തിന്റെ അഞ്ചാം പതിപ്പിനായി മുൻഗണനാ വിഷയങ്ങളിൽ വോട്ടുചെയ്യാൻ മന്ത്രിമാരുടെ കൗൺസിലിന്റെ സെക്രട്ടേറിയറ്റ് ജനറൽ ആളുകളെ ക്ഷണിച്ചു. ഒക-്‌ടോബർ 18 വരെ ഫോറത്തിന്റെ വെബ്‌സൈറ്റായ www.togetherfwd.com വഴി വോട്ടെടുപ്പ് ഉണ്ടായിരിക്കും

​ഗവർണറേറ്റുകളിലെ വികസന നയങ്ങളെയും മുൻഗണനകളെയും കുറിച്ച് സർക്കാരും സമൂഹവും തമ്മിലുള്ള സംഭാഷണത്തിനുള്ള ദേശീയ വേദിയായി പ്രവർത്തിക്കുന്ന ഫോറത്തിൽ ചർച്ചയ്‌ക്കുള്ള വിഷയങ്ങൾ തിരിച്ചറിയുന്നതിൽ പൗരന്മാരെ ഉൾപ്പെടുത്തുക എന്നതാണ്‌ ലക്ഷ്യം.

​ഓരോ പൗരന്റെയും സിവിൽ സ്റ്റാറ്റസ് റെക്കോർഡിൽ രേഖപ്പെടുത്തിയിരിക്കുന്ന സ്ഥിരം വിലാസത്തിന്റെ അടിസ്ഥാനത്തിലാണ് വോട്ടെടുപ്പ് നടത്തുന്നത്. അതത് ഗവർണറേറ്റുകളിൽ ചർച്ചയ്ക്ക്‌ പ്രധാനമെന്ന് കരുതുന്ന അധിക വിഷയങ്ങൾ നിർദ്ദേശിക്കാനും ഓൺലൈൻ പ്ലാറ്റ്‌ഫോം പങ്കാളികളെ അനുവദിക്കുന്നു.

​ഫോറത്തിന്റെ അജണ്ട നിശ്ചയിക്കുന്നതിൽ പൊതുജനങ്ങളെ ഉൾപ്പെടുത്തുന്ന സമീപനം അഞ്ചാം പതിപ്പ് തുടരും. ഇത് താമസക്കാർക്ക് മുൻഗണനാ വിഷയങ്ങൾ തിരഞ്ഞെടുക്കാനും അവരുടെ സമൂഹങ്ങളുടെ അഭിലാഷങ്ങൾ ഉയർത്തിക്കാട്ടാനും അവസരം നൽകും. പ്രധാന ഫോറം മസ്‌കറ്റ് ഗവർണറേറ്റിൽ നടക്കും.