ഒമാനിൽ നാലാമത്തെ ഹൃദയം മാറ്റിവയ്ക്കൽ പൂർത്തിയായി

മസ്‌കത്ത്‌ : ​രാജ്യത്തെ നാലാമത്തെ ഹൃദയം മാറ്റിവയ്ക്കൽ ശസ്ത്രക്രിയ വിജയകരമായി പൂർത്തിയാക്കിയതായി ഒമാൻ. മസ്‌തിഷ്ക മരണം സംഭവിച്ച രോഗിയുടെ നാല് അവയവങ്ങളാണ്‌ വിജയകരമായി മാറ്റിവച്ചത്‌. ഇതുവഴി നാലുപേർക്ക്‌ പുതുജീവൻ നൽകാൻ സാധിച്ചതായി ഒമാനി സെന്റർ ഫോർ ഓർഗൻ ആൻഡ് ടിഷ്യു ഡൊണേഷൻ ആൻഡ് ട്രാൻസ്പ്ലാന്റേഷൻ അറിയിച്ചു.

രാജ്യത്തെ വളർന്നുവരുന്ന ദേശീയ അവയവ മാറ്റിവയ്ക്കൽ പരിപാടിയിലെ സുപ്രധാന നാഴികക്കല്ലാണിതെന്ന്‌ ഓർഗൻ ഡൊണേഷൻ ഡയറക്ടർ ഡോ. നോറീൻ ബിൻത്‌ യൂസഫ് അൽ ബലൂഷി പറഞ്ഞു. ചുരുങ്ങിയ സമയത്തിനുള്ളിൽ ആവർത്തിച്ചുള്ള വിജയം ഒമാന്റെ അവയവ ദാന സംവിധാനം കൂടുതൽ പക്വവും സംഘടിതവുമായ ഘട്ടത്തിലേക്ക് നീങ്ങിയിട്ടുണ്ടെന്ന് തെളിയിക്കുന്നു. ​തീവ്രപരിചരണ വിഭാഗങ്ങൾ, ലബോറട്ടറികൾ, രക്തബാങ്കുകൾ, ലോജിസ്റ്റിക്സ്‌ ടീമുകൾ, ഹൃദയം, കരൾ, വൃക്ക മാറ്റിവയ്ക്കൽ എന്നിവയിലെ വിദഗ്ധർ എന്നിവ ഈ പ്രക്രിയയിൽ ഉൾപ്പെടുന്നു.

ഹൃദയം മാറ്റിവയ്ക്കൽ സങ്കീർണമായ നടപടിക്രമങ്ങളിൽ ഒന്നാണെന്നും പ്രക്രിയയിലുടനീളം ഉയർന്ന തലത്തിലുള്ള സന്നദ്ധത ആവശ്യമാണെന്നും നാഷണൽ സെന്റർ ഫോർ ഹാർട്ട് മെഡിസിൻ ആൻഡ് സർജറിയിലെ കൺസൾട്ടന്റ് കാർഡിയാക് സർജൻ ഡോ. ഖാസിം ബിൻ സാലിഹ് അൽ- അബ്രി പറഞ്ഞു.