മത്ര കേബിൾ കാർ പദ്ധതി 90 ശതമാനം പൂർത്തിയാക്കി; ട്രയൽ ഡിസംബറിൽ

മസ്‌കത്ത് : മത്ര കേബിൾ കാർ പദ്ധതിയുടെ 90 ശതമാനം പൂർത്തിയാക്കിയെന്നും ഡിസംബറിൽ ആരംഭിക്കുന്ന പരീക്ഷണ പ്രവർത്തനത്തിനായി ഷെഡ്യൂളിൽ തുടരുന്നതായും മേൽനോട്ടം വഹിക്കുന്ന ഉദ്യോഗസ്ഥർ. സന്ദർശക കേന്ദ്രമെന്ന നിലയിൽ മത്രയുടെ സ്ഥാനം ശക്തിപ്പെടുത്താനും വിലായത്തിൽ നിക്ഷേപ അവസരം വികസിപ്പിക്കാനും ലക്ഷ്യമിട്ടുള്ള ടൂറിസം സംരംഭങ്ങളുടെ പരമ്പരയിൽ ഉൾപ്പെടുന്നതാണ്‌ പദ്ധതി. മത്ര ഡെപ്യൂട്ടി വാലി ഷെയ്ഖ് അബ്‌ദുൾ ഹമീദ് ബിൻ അബ്‌ദുൾ റഹ്‌മാൻ അൽ ഖറൂസി സ്ഥലത്തെത്തി പുരോഗതി അവലോകനം ചെയ്‌തു.

നിർമാണ പ്രവർത്തനങ്ങൾ, കേബിൾ കാർ സ്റ്റേഷനുകൾ, സന്ദർശക സൗകര്യങ്ങൾ, പ്രവർത്തന സംവിധാനങ്ങൾ എന്നിവയുടെ അവസ്ഥയെക്കുറിച്ച് അദ്ദേഹം വിശദീകരിച്ചു. അംഗീകൃത സമയക്രമം അനുസരിച്ച് പദ്ധതി പുരോഗമിക്കുന്നുണ്ട്‌. സാങ്കേതിക സംവിധാനങ്ങൾ, സുരക്ഷ, സുരക്ഷാനടപടികൾ, പ്രവർത്തന സന്നദ്ധതയ്‌ക്ക്‌ ആവശ്യമായ പിന്തുണാസേവനങ്ങൾ എന്നിവയുൾപ്പെടെ എല്ലാ പദ്ധതി ഘടകങ്ങളിലും പ്രവർത്തനങ്ങൾ തുടരുന്നുണ്ടെന്നും അദ്ദേഹം പറഞ്ഞു. നിർമാണത്തിന്റെ ശേഷിക്കുന്ന ഘട്ടങ്ങളിലുടനീളം ഗുണനിലവാരം, സുരക്ഷ, പ്രവർത്തന മാനദണ്ഡങ്ങൾ പാലിക്കുന്നുണ്ടെന്ന് ഉറപ്പാക്കിക്കൊണ്ട് പുരോഗതി നിലനിർത്തേണ്ടതിന്റെ പ്രാധാന്യം അൽ ഖറൂസി വ്യക്തമാക്കി.

മത്രയുടെ ടൂറിസം അടിസ്ഥാന സൗകര്യങ്ങളിൽ പ്രധാന കൂട്ടിച്ചേർക്കലായി പദ്ധതി പ്രവർത്തിക്കും. ഒമാനിൽനിന്നും വിദേശത്തുനിന്നുമുള്ള സന്ദർശകരെ ആകർഷിക്കുന്നതിനൊപ്പം ടൂറിസത്തെയും സാമ്പത്തിക പ്രവർത്തനങ്ങളെയും ഉത്തേജിപ്പിക്കാൻ സഹായിക്കുമെന്നും അദ്ദേഹം പറഞ്ഞു. വിലായത്തിലെ വികസന, ടൂറിസം പദ്ധതികൾ നിരീക്ഷിക്കാനും പുരോഗതി വിലയിരുത്താനും വെല്ലുവിളികൾ പരിഹരിക്കാനുമുള്ള നിരന്തരശ്രമങ്ങളുടെ ഭാഗമായാണ് ഫീൽഡ് സന്ദർശനം. അംഗീകൃത ഷെഡ്യൂളിന് അനുസൃതമായി പദ്ധതി പുരോഗമിക്കുകയാണ്‌. ശേഷിക്കുന്ന നിർമാണ, പരീക്ഷണ ഘട്ടങ്ങൾ പൂർത്തിയായാൽ പ്രവർത്തനത്തിന് തയ്യാറെടുക്കുകയാണെന്നും മുനിസിപ്പാലിറ്റി പറഞ്ഞു.