കേളി ‘പ്രതീക്ഷ’ പുരസ്‌കാരം; മലപ്പുറം ജില്ലയിൽ 55 വിദ്യാർഥികൾക്ക് വിതരണം ചെയ്തു

റിയാദ്: റിയാദ് കേളി കലാസാംസ്കാരിക വേദി പ്രവർത്തകരുടെ മക്കൾക്കായി ഏർപ്പെടുത്തിയ ‘പ്രതീക്ഷ’ വിദ്യാഭ്യാസ പുരസ്‌കാരം മലപ്പുറം ജില്ലയിൽ വിതരണം ചെയ്തു. ജില്ലയിൽനിന്ന് 56 വിദ്യാർഥികളാണ് പുരസ്‌കാരത്തിന് അർഹരായത്. സിപിഐ എം മലപ്പുറം ജില്ലാ കമ്മിറ്റി ഓഡിറ്റോറിയത്തിൽ നടന്ന പരിപാടിയിൽ കേളി രക്ഷാധികാരി സമിതി മുൻ അംഗം ഗോപിനാഥൻ വേങ്ങര അധ്യക്ഷനായി. സി.പി.ഐ.എം മലപ്പുറം ജില്ലാ സെക്രട്ടറി വി.പി. അനിൽ പരിപാടി ഉദ്ഘാടനം ചെയ്തു. സിപിഐ എം ജില്ലാ സെക്രട്ടറിയറ്റ് അംഗം ബി. മുഹമ്മദ് റസാഖ്, കേരള പ്രവാസി സംഘം ജില്ലാ പ്രസിഡന്റ് പി സി നൗഷാദ്, കേളി മുൻ സെക്രട്ടറി റഷീദ് മേലെതിൽ എന്നിവർ ആശംസകൾ നേർന്നു.

ഈ അധ്യയന വർഷം ആകെ 232 വിദ്യാർഥികളാണ് പുരസ്‌കാരത്തിന് അർഹരായത്. ഇതിൽ റിയാദിൽ 16 കുട്ടികൾക്ക് നേരത്തേ പുരസ്‌കാരം വിതരണം ചെയ്തിരുന്നു. കേളി മുൻ സെക്രട്ടറി ഷൗക്കത്ത് നിലമ്പൂർ സ്വാഗതവും കേളി മുൻ കേന്ദ്രകമ്മിറ്റി അംഗം ഉമ്മർകുട്ടി കാളികാവ് നന്ദിയും പറഞ്ഞു.