സിറിയയിലേക്ക് വിമാന സർവിസുകൾ പുനരാരംഭിക്കാൻ ഫ്ലൈ ദുബായ്

ദുബായ് : 12 വർഷത്തെ ഇടവേളയ്ക്ക് ശേഷം ജൂൺ 1 മുതൽ ദമാസ്കസിലേക്ക് നേരിട്ടുള്ള സർവിസുകൾ പുനരാരംഭിക്കുമെന്ന് ഫ്ലൈ ദുബായ് പ്രഖ്യാപിച്ചു. സിറിയയിലേക്ക് വാണിജ്യ പ്രവർത്തനങ്ങൾ പുനരാരംഭിക്കുന്ന ആദ്യത്തെ യുഎഇ എയർലൈൻ ആണ് ഫ്ലെെ ദുബായ് .

ഏപ്രിലിൽ ഇരു രാജ്യങ്ങൾക്കുമിടയിൽ വിമാന സർവിസുകൾ പുനരാരംഭിക്കാൻ യുഎഇയുടെ ജനറൽ സിവിൽ ഏവിയേഷൻ അതോറിറ്റി (ജിസിഎഎ) അനുമതി നൽകിയിരുന്നു, ഇതിനെ തുടർന്നാണ് തീരുമാനം. 2009ലായിരുന്നു ഫ്ലൈദുബായ് ആദ്യമായി സിറിയൻ തലസ്ഥാനത്തേക്ക് സർവിസ് നടത്തിയത്. എന്നാൽ, 2012 ൽ എയർലൈൻ പ്രവർത്തനങ്ങൾ‌ നിർത്തിവച്ചു.

ഇക്കണോമി ക്ലാസിന് 2,000 ദിർഹം മുതലും ബിസിനസ് ക്ലാസിന് 10,000 ദിർഹം മുതലുമാണ് ടിക്കറ്റ് നിരക്കുകൾ ആരംഭിക്കുന്നത്. വരാനിരിക്കുന്ന ഈദ് അൽ അദ്ഹ അവധിക്കാലവും വേനൽക്കാല യാത്രാ ആവശ്യവും കണക്കിലെടുത്താണ് ഫ്ലൈദുബായ് സർവിസ് പുനരാരംഭിക്കുന്നത്.