ഇഎച്ച്എസ് ഡയറക്‌ടർ ബോർഡ് പുനഃസംഘടിപ്പിച്ചു

ദുബായ് : എമിറേറ്റ്സ് ഹെൽത്ത്‌ സർവീസസ്‌ (ഇഎച്ച്എസ്) ഡയറക്ടർ ബോർഡ് പുനഃസംഘടിപ്പിച്ച് യുഎഇ വൈസ് പ്രസിഡന്റും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം. ബോർഡിന്റെ ചെയർമാനായി യുഎഇ ആരോഗ്യ-പ്രതിരോധ മന്ത്രാലയ മന്ത്രി അഹമ്മദ് ബിൻ അലി അൽ സായെഗ് നിയമിതനായി. യുഎഇ മന്ത്രിസഭയ്ക്ക്‌ കീഴിൽ പ്രവർത്തിക്കുന്ന ഇഎച്ച്എസ് രാജ്യത്തെ ആരോഗ്യസംരക്ഷണം, പ്രതിരോധ ചികിത്സ, പൊതുജനാരോഗ്യം എന്നിവയുമായി ബന്ധപ്പെട്ട നയങ്ങളും മാനദണ്ഡങ്ങളും രൂപപ്പെടുത്തുകയും അവയുടെ നടപ്പാക്കലിന് മേൽനോട്ടം വഹിക്കുകയും ചെയ്യും.

​സർക്കാർ ആശുപത്രികൾ, ആരോഗ്യകേന്ദ്രങ്ങൾ എന്നിവയുടെ സ്ഥാപനത്തിനും നടത്തിപ്പിനുമൊപ്പം ആരോഗ്യരംഗത്തെ യുഎഇ പൗരന്മാരുടെ ശേഷിവികസനത്തിനും സ്ഥാപനം പിന്തുണ നൽകും. വിദഗ്ധരെ ആരോഗ്യരംഗത്തേക്ക് ആകർഷിക്കാനും വൈദ്യശാസ്ത്ര ഗവേഷണം വിപുലപ്പെടുത്താനുമുള്ള ഉത്തരവാദിത്വവും എമിറേറ്റ്സ് ആരോഗ്യ സേവനങ്ങൾക്കായിരിക്കും.

​പുതിയ ഡയറക്ടർ ബോർഡിൽ എമിറേറ്റ്സ് ആരോഗ്യ സേവനങ്ങളുടെ ഡയറക്ടർ ജനറലായ ഡോ. യൂസഫ് മുഹമ്മദ് അൽ സെർകാൽ വൈസ്ചെയർമാനും മാനേജിങ് ഡയറക്ടറുമായി പ്രവർത്തിക്കും. ഷെയ്ഖ് മക്തൂം ബുട്ടി സുഹൈൽ ബുട്ടി അൽ മക്തൂം, ഡോ. ആയിഷ മുഹമ്മദ് അബ്‌ദുള്ള യാസീൻ, അബ്‌ദുൾവഹാബ് അൽ ഹലാബി, മുഹമ്മദ് ഒമർ കരീം, നിതിൻ ഖന്ന കുമാർ ഖന്ന എന്നിവർ ബോർഡിൽ അംഗങ്ങളാകും.