എബോള പ്രതിരോധം: 76 ടൺ ദുരിതാശ്വാസ സാമഗ്രി എത്തിച്ചു; മൂന്നാം സഹായവിമാനവുമായി ദുബായ് ഹ്യൂമാനിറ്റേറിയൻ

ദുബായ് : എബോള വൈറസ് വ്യാപനം നിയന്ത്രിക്കുന്നതിനായി ഡെമോക്രാറ്റിക് റിപ്പബ്ലിക് ഓഫ് കോംഗോയിലേക്കുള്ള മൂന്നാമത്തെ അടിയന്തര ദുരിതാശ്വാസ വിമാനദൗത്യം പൂർത്തിയാക്കി ദുബായ് ഹ്യൂമാനിറ്റേറിയൻ. യുഎഇ വൈസ് പ്രസിഡന്റും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാശിദ് അൽ മക്തൂമിന്റെ നിർദേശപ്രകാരമാണ് ദൗത്യം നടപ്പാക്കിയത്.

​യൂറോപ്യൻ യൂണിയന്റെ മാനുഷിക സഹായ വിഭാഗമായ ഡി ജി ഇകോയുടെ സഹകരണത്തോടെ സംഘടിപ്പിച്ച ദൗത്യവിമാനം 21-ന് ദുബായിൽനിന്ന് പുറപ്പെട്ട് ഉഗാണ്ടയിലെ എന്റേബെയിൽ എത്തി. അവിടെനിന്ന് എബോള ബാധിത പ്രദേശങ്ങളിലേക്ക് എത്തിക്കുന്നതിനായി 76 ടണ്ണിലധികം ജീവൻ രക്ഷാ സാമഗ്രികളാണ് കൊണ്ടുപോയത്.

​ദുബായ് റോയൽ എയർ വിങ്ങിന്റെ വിമാനത്തിലാണ് ചരക്കുകൾ എത്തിച്ചത്. ശുചിത്വ കിറ്റുകൾ, ഭക്ഷ്യ ബിസ്‌ക്കറ്റുകൾ, ടെന്റുകൾ, രണ്ട് വാഹനങ്ങൾ, കൂടാതെ സുരക്ഷിതവും മാന്യവുമായ സംസ-്‌കാരത്തിന്‌ ആവശ്യമായ സാമഗ്രികളും ഉൾപ്പെടുത്തിയിരുന്നു.

​ലോക ഭക്ഷ്യപരിപാടി, യുനിസെഫ്, അന്താരാഷ-്‌ട്ര റെഡ് ക്രോസ് റെഡ് ക്രസന്റ് സമൂഹങ്ങളുടെ ഫെഡറേഷൻ തുടങ്ങിയ മാനുഷിക സംഘടനകളാണ് സഹായ സാമഗ്രികൾ നൽകിയിരിക്കുന്നത്. ആകെ 223,000 ഡോളറിലധികം മൂല്യമുള്ള സഹായസാമഗ്രികളാണ് എത്തിച്ചത്. വിമാന ഗതാഗതച്ചെലവായി 270,000 ഡോളറിന്റെ സേവനം ദുബായ് ഹ്യൂമാനിറ്റേറിയൻ നൽകി.

​പ്രതിസന്ധി ഘട്ടങ്ങളിൽ അതിവേഗ മാനുഷിക സഹായം ഉറപ്പാക്കാനുള്ള യുഎഇയുടെ പ്രതിബദ്ധതയുടെ തെളിവാണ് ദൗത്യമെന്ന് ദുബായ് ഹ്യൂമാനിറ്റേറിയൻ സിഇഒ ജ്യൂസെപ്പെ സാബ പറഞ്ഞു. ദുബായ് ഹ്യൂമാനിറ്റേറിയൻ, യൂറോപ്യൻ യൂണിയൻ, അന്താരാഷ-്‌ട്ര സഹായ സംഘടനകൾ എന്നിവ തമ്മിലുള്ള സഹകരണം കൂടുതൽ ശക്തിപ്പെട്ടതായും അദ്ദേഹം വ്യക്തമാക്കി. 2025-ൽ ദുബായ് ഹ്യൂമാനിറ്റേറിയനും ഡി ജി ഇകോയും തമ്മിൽ ഒപ്പുവെച്ച സഹകരണ കരാറിന്റെ തുടർച്ചയായാണ് സംയുക്ത ദൗത്യം.