പച്ചതൊട്ട് സൂചികകൾ; ഇന്ന് ആദ്യ വ്യാപാരത്തിൽ കരകയറി ഓഹരി വിപണി

മുംബൈ : മുൻദിവസത്തെ വൻ തകർച്ചയ്ക്ക് ശേഷം വ്യാഴാഴ്ച ഇന്ത്യൻ ഓഹരി വിപണി ശക്തമായ തിരിച്ചുവരവോടെ വ്യാപാരം ആരംഭിച്ചു. ബാങ്കിംഗ്, ധനകാര്യ മേഖലകളിലെ ഓഹരികൾ കൈവരിച്ച മികച്ച മുന്നേറ്റമാണ് വിപണിക്ക് തുണയായത്. അതേസമയം നടപ്പു സാമ്പത്തിക വർഷത്തെ ആദ്യ പാദത്തിലെ പ്രവർത്തന ഫലങ്ങൾ ടാറ്റാ കൺസൾട്ടൻസി സർവീസസ് പുറത്തുവിട്ടതിന് പിന്നാലെ ഐടി ഓഹരികൾ കടുത്ത സമ്മർദ്ദത്തിലായി.

വ്യാപാരം ആരംഭിച്ച് ആദ്യ മിനിറ്റുകളിൽ തന്നെ ബിഎസ്ഇ സെൻസെക്സ് 371.67 പോയിന്റ് ഉയർന്ന് 76,875.27 എന്ന നിലയിലും എൻഎസ്ഇ നിഫ്റ്റി 113.50 പോയിന്റ് നേട്ടത്തോടെ 24,000 എന്ന നിർണായക നിലവാരത്തിന് തൊട്ടടുത്ത് 23,995.55 എന്ന ലെവലിലും എത്തി. വിപണിയിലെ അസ്ഥിരത വ്യക്തമാക്കുന്ന ഇന്ത്യ വിക്സ് (India VIX) 6.43 ശതമാനം ഇടിഞ്ഞ് 13.74 ലേക്ക് താഴ്ന്നത് നിക്ഷേപകരുടെ ആത്മവിശ്വാസം തിരിച്ചുവരുന്നതിന്റെ സൂചനയായി വിപണി വിദഗ്ധർ വിലയിരുത്തുന്നു.

ആദ്യ വ്യാപാരത്തിൽ ധനകാര്യ മേഖലയിലെ ഓഹരികളാണ് സൂചികകളെ മുകളിലേക്ക് നയിച്ചത്. നിഫ്റ്റി ബാങ്ക് സൂചിക 0.78 ശതമാനം ഉയർന്ന് 57,184.05 ലും നിഫ്റ്റി പ്രൈവറ്റ് ബാങ്ക് സൂചിക 0.84 ശതമാനവും നേട്ടമുണ്ടാക്കി. എച്ച്ഡിഎഫ്സി ബാങ്ക്, ഐസിഐസിഐ ബാങ്ക്, ആക്സിസ് ബാങ്ക്, കൊട്ടക് ബാങ്ക്, എസ്‌ബിഐ എന്നിവയാണ് വിപണിയെ മുന്നോട്ട് നയിക്കുന്നതിൽ പ്രധാന പങ്കുവഹിച്ചത്. പൊതുവായ ഫിനാൻഷ്യൽ സർവീസസ് സൂചികയും 0.65 ശതമാനം നേട്ടത്തിലാണ്.

നിഫ്റ്റി ഐടി സൂചിക 1.89 ശതമാനം ഇടിവോടെ ഇന്ന് ഏറ്റവും വലിയ നഷ്ടം നേരിടുന്ന മേഖലയായി മാറി. മുൻനിര ഐടി കമ്പനികളായ ഇൻഫോസിസ്, എച്ച്സിഎൽ ടെക്, ടിസിഎസ്, ടെക് മഹിന്ദ്ര എന്നിവയുടെ ഓഹരികൾ ഒരു ശതമാനത്തിലധികം ഇടിവ് രേഖപ്പെടുത്തി. ടിസിഎസിന്റെ ആദ്യപാദ ഫലങ്ങൾ പുറത്തുവന്നതോടെ ഐടി മേഖലയിലാകെ നിക്ഷേപകർ ജാഗ്രത പുലർത്തുന്നതാണ് ഈ ഇടിവിന് കാരണമായത്.

ഉപഭോക്തൃ ഉൽപന്ന ഓഹരികളും മിഡ്ക്യാപ് ഓഹരികളും മികച്ച മുന്നേറ്റമാണ് ഇന്ന് കാഴ്ചവെക്കുന്നത്. തുടക്കത്തിലെ വ്യാപാരത്തിൽ 1.89 ശതമാനം കുതിച്ചുയർന്ന നിഫ്റ്റി കൺസ്യൂമർ ഡ്യൂറബിൾസ് സൂചികയാണ് ഏറ്റവും മികച്ച നേട്ടമുണ്ടാക്കിയത്. റിയൽറ്റി, സ്വകാര്യ ബാങ്കുകൾ, സിമന്റ്, കെമിക്കൽസ് മേഖലകളും മികച്ച നിലയിലാണ്.

വിപണിയിൽ പൊതുവായ ട്രെൻഡ് അനുകൂലമായി തുടരുന്നതിനാൽ നിഫ്റ്റി മിഡ്ക്യാപ് 100 സൂചിക, നിഫ്റ്റി സ്മോൾക്യാപ് 100 സൂചിക, നിഫ്റ്റി 500 സൂചിക, നിഫ്റ്റി മൈക്രോക്യാപ് 250 സൂചിക എന്നിവയും നേട്ടത്തോടെയാണ് വ്യാപാരം തുടരുന്നത്.

പ്രധാന സൂചികകൾക്ക് പുറമെ വിപണിയിൽ മൊത്തത്തിലുള്ള വാങ്ങൽ താൽപ്പര്യം സജീവമാണെന്നാണ് ഈ കണക്കുകൾ വ്യക്തമാക്കുന്നത്. സെൻസെക്സ് ഓഹരികളിൽ എറ്റേണൽ, ടൈറ്റൻ, ഭാരതി എയർടെൽ, ഏഷ്യൻ പെയിന്റ്സ്, എച്ച്ഡിഎഫ്സി ബാങ്ക് എന്നിവ നേട്ടമുണ്ടാക്കിയപ്പോൾ ഇൻഫോസിസ്, എച്ച്സിഎൽ ടെക്, ടിസിഎസ് എന്നിവ സെൻസെക്സിന്റെ മുന്നേറ്റത്തിന് തടസമായി നിൽക്കുന്നുണ്ട്.