ആകാശം കീഴടക്കാൻ 'ഫ്ലൈ 91'; 40 പുതിയ എടിആർ വിമാനങ്ങളെത്തും

ന്യൂഡൽഹി : വ്യോമഗതാഗത മേഖലയിൽ വൻ വികസനത്തിന് ഒരുങ്ങി ഫ്ലൈ91 കമ്പനി. മലയാളിയുടെ ഉടമസ്ഥതയിലുള്ള കമ്പനി 40 എടിആർ 72-600 ടർബോ പ്രോപ് മോഡൽ വിമാനങ്ങൾ വാങ്ങാൻ യൂറോപ്യൻ വിമാനനിർമാതാക്കളായ എടിആറുമായി കരാറിലെത്തി. ഏകദേശം 8,300 കോടി രൂപയുടെ കരാറിലാണ് ഒപ്പുവെച്ചത്. ഇന്ത്യയിലെ ഒരു വിമാനക്കമ്പനി എടിആറുമായി നടത്തുന്ന ഏറ്റവും വലിയ കരാറാണിത്. അടുത്ത 6 വർഷത്തിനുള്ളിൽ വിമാനങ്ങളുടെ എണ്ണം 60 ആയി ഉയർത്താനാണ് കമ്പനിയുടെ ലക്ഷ്യം. 72 പേരെ ഉൾക്കൊള്ളുന്ന വിമാനങ്ങളാണിത്.

മലയാളിയായ മനോജ് ചാക്കോയുടെ ഉടമസ്ഥതയിലുള്ള ​ഗോവ ആസ്ഥാനമായി പ്രവർത്തിക്കുന്ന കമ്പനി 2024ലാണ് ​പ്രവർത്തനം ആരംഭിച്ചത്. അടുത്ത വർഷം അവസാനത്തോടെ ഓർ‍ഡർ ചെയ്ത വിമാനങ്ങൾ എത്തിത്തുടങ്ങുമെന്നാണ് പ്രതീക്ഷിക്കുന്നത്. അതിന് മുൻപായി എട്ട് വിമാനങ്ങൾ കൂടി പാട്ടത്തിനെടുക്കാനും കമ്പനി പദ്ധതിയിടുന്നുണ്ട്. പുതിയ വിമാനങ്ങൾ ഉൾപ്പെടുത്തി വൻ നവീകരണത്തിനാണ് കമ്പനി ഒരുങ്ങുന്നത്.

കമ്പനി നിലവിൽ 6 എടിആർ വിമാനങ്ങൾ ഉപയോ​ഗിച്ച് 12 ന​ഗരങ്ങളിലേക്ക് 260 സർവീസുകളാണ് നടത്തുന്നത്. എയർബസും ലിയാനാർഡോയും സംയുക്തമായി പ്രവർത്തിക്കുന്ന കമ്പനിയായ എടിആർ നിലവിൽ 90ന് താഴെ സീറ്റുകളുള്ള വിമാനങ്ങളാണ് നിർമിക്കുന്നത്.

വലിയ വിമാനങ്ങൾക്ക് ഇറക്കാൻ കഴിയാത്ത വിമാനത്താവളങ്ങളിൽ ലാൻഡ് ചെയ്യാൻ കഴിയുന്ന ചെറിയ വിമാനങ്ങളാണ് എടിആർ 72-600. ചെറുന​ഗരങ്ങളെ ബന്ധിപ്പിക്കുന്ന ദൂരം കുറഞ്ഞ സർവീസുകൾക്കാണ് ഈ വിമാനങ്ങൾ ഉപയോ​ഗിക്കുന്നത്.