print edition മാതൃകയായി കേരളം; 55.41 കോടി തൊഴിൽദിനങ്ങൾ
പാലക്കാട് പെരിങ്ങോട്ട് ജോലിക്കിടെ തൊഴിലുറപ്പ് തൊഴിലാളികൾ /ഫോട്ടോ: ശരത് കൽപ്പാത്തി
ബിജോ ടോമി
Published on Nov 30, 2025, 12:01 AM | 2 min read
തിരുവനന്തപുരം: കേന്ദ്രം നിരന്തരം ഫണ്ട്‌ വെട്ടിക്കുറയ്‌ക്കുന്പോഴും മഹാത്മാഗാന്ധി ദേശീയ ഗ്രാമീണ തൊഴിലുറപ്പ്പദ്ധതിയിൽ രാജ്യത്തിന്‌ മാതൃകയാകുയാണ്‌ കേരളം. നിലവില്‍ 19.44 ലക്ഷം കുടുംബങ്ങൾ പദ്ധതിയിലുണ്ട്‌. 2020–21 മുതല്‍ ഇതുവരെ 53.5 കോടി തൊഴില്‍ ദിനങ്ങള്‍ സൃഷ്ടിച്ചു. 17,216.57 കോടി വേതനമായി തൊഴിലാളികള്‍ക്ക് നല്‍കി. പൂർണമായും സംസ്ഥാന സർക്കാർ നടപ്പാക്കുന്ന അയ്യൻകാളി നഗര തൊഴിലുറപ്പ് പദ്ധതിയിൽ അഞ്ചു വർഷത്തിനിടെ 1.91 കോടി തൊഴിൽ ദിനങ്ങളായി. നഗരസഭകൾ 634.01 കോടി ചെലവഴിച്ചു. 3.25 ലക്ഷം കുടുംബങ്ങൾ പദ്ധതിയുടെ ഭാഗമാണ്. സോഷ്യല്‍ ഓഡിറ്റിങ് ഏറ്റവും ഫലപ്രദമായി നടപ്പാക്കുന്നു.
മുഴുവന്‍ പട്ടിക വര്‍ഗ കുടുംബങ്ങള്‍ക്കും 200 ദിവസത്തെ തൊഴില്‍ ദിനങ്ങൾക്കുള്ള തുക സംസ്ഥാന ബജറ്റില്‍ നീക്കിവച്ച്‌ കേരള ട്രൈബല്‍ പ്ലസ്‌ പദ്ധതി നടപ്പാക്കി. സുഭിക്ഷകേരളം, ശുചിത്വകേരളം എന്നിവയുമായി തൊഴിലുറപ്പ് പദ്ധതിയെ ബന്ധിപ്പിച്ച്‌ ഭൂവികസനം, ജലസേചനം, വര്‍ക്ക്‌ ഷെഡ്‌ നിര്‍മാണം, തൊഴുത്ത്‌, ആട്ടിന്‍കൂട്‌, കോഴിക്കൂട്‌, മത്സ്യക്കുളം നിര്‍മാണം, തീറ്റപ്പുല്‍ക്കൃഷി, കമ്പോസ്റ്റിങ്‌ സംവിധാനം, മിനി എംസിഎഫ്‌ തുടങ്ങിയവ ഏറ്റെടുത്ത്‌ നടപ്പാക്കുന്നു.
2020–21ൽ വർഷം ലേബർ ബജറ്റ്‌ 10 കോടി ആയിരുന്നത്‌ 2025–26 ആയപ്പോഴേക്കും കേന്ദ്രം അഞ്ചുകോടിയിലേക്ക്‌ വെട്ടിച്ചുരുക്കി. പദ്ധതിക്ക് ആവശ്യമായ തുകയുടെ നാലിലൊന്നുമാത്രമാണ് അനുവദിക്കുന്നത്. കൂടുതൽ കുടുംബങ്ങൾക്ക് 100 തൊഴിൽ ദിനങ്ങൾ ലഭിക്കുന്നത്‌ കേരളത്തിൽ മാത്രം. കോൺഗ്രസും ബിജെപിയും ഭരിക്കുന്ന പല സംസ്ഥാനങ്ങളിലും പദ്ധതി നിലച്ച മട്ടാണ്.
ഗ്രാമീണ തൊഴിലുറപ്പിൽ– 53.5 കോടി തൊഴിൽദിനം
19.44 ലക്ഷം കുടുംബങ്ങൾ
അയ്യൻകാളി നഗരപദ്ധതിയിൽ – 1.91 കോടി തൊഴിൽദിനം
3.25 ലക്ഷം കുടുംബങ്ങൾ
• അഞ്ച് വര്‍ഷത്തില്‍ 3411.61 കിലോമീറ്റർ റോഡ്‌ നിര്‍മിച്ചു
• 37 ഗ്രാമച്ചന്തകൾ നിർമിച്ചു
• 1,15,883 കുടുംബങ്ങള്‍ക്ക് വ്യക്തിഗത ഉപജീവന ആസ്തി നല്‍കി
• 4100 ഹെക്ടര്‍ തരിശുഭൂമി കൃഷി യോഗ്യമാക്കി
• 2024–25ൽ 100 ദിവസം തൊഴില്‍ദിനം പൂര്‍ത്തിയാക്കിയ 5.19 ലക്ഷം പേർക്ക് 1200 രൂപയുടെ ഓണസമ്മാനം നൽകി. സംസ്ഥാന സര്‍ക്കാർ. ചെലവഴിച്ചത്‌ 64.95 കോടി രൂപ
• തൊഴിലുറപ്പ് തൊഴിലാളി ക്ഷേമനിധി ബോര്‍ഡ്‌ രൂപീകരിച്ചു. 9582 പേര്‍ രജിസ്റ്റര്‍ ചെയ്തു
0 comments