പുതുമോടിയിലൊരുങ്ങും 
എറണാകുളം കെഎസ്‌ആർടിസി സ്റ്റാൻഡ്

കൊച്ചി

എറണാകുളം കെഎസ്‌ആർടിസി ബസ്‌ സ്റ്റാൻഡ്‌ പുതുമോടിയിലേക്ക്‌. നവീകരണം അതിവേഗം പുരോഗമിക്കുകയാണ്‌. ബസ്‌ ടെർമിനൽ സമുച്ചയത്തിന്റെ തറനിരപ്പ്‌ ഉയർത്തുന്നതടക്കം പ്രവൃത്തികൾ ഒരുമാസത്തിനകം പൂർത്തിയാകും. സ്റ്റാൻഡിൽ വെള്ളം കയറാത്തവിധം രണ്ടടിയോളം തറ ഉയർത്തിക്കെട്ടുന്ന ജോലി അവസാനഘട്ടത്തിലാണ്‌. ബസ്‌ നിർത്തിയിടുന്ന ഭാഗങ്ങളിലാണ്‌ പൂർത്തിയാകാനുള്ളത്‌.

മഴ പെയ്താൽ കെട്ടിടത്തിനുള്ളിലേക്ക്‌ വെള്ളം ഒഴുകാത്തവിധം തറ ഉയർത്തിക്കെട്ടിയിട്ടുണ്ട്‌. വെള്ളം സുഗമമായി ഒഴുകിപ്പോകുന്നതിന്‌ ഡ്രൈനേജ്‌ സംവിധാനവും കാര്യക്ഷമമാക്കി. തറയിൽ ടൈൽ വിരിക്കാനുള്ള ജോലികൾ നടക്കുകയാണ്‌. യാത്രക്കാർക്ക്‌ പുതിയ ഇരിപ്പിടങ്ങളും ഒരുക്കും. ശുചിമുറികളും നന്നാക്കും. സ്റ്റാൻഡും പരിസരവും പെയിന്റ്‌ ചെയ്യും.

മുകൾനിലയിൽ സ്‌ത്രീകൾക്കായി പ്രത്യേകം ശീതീകരിച്ച വിശ്രമമുറികളും ഒരുക്കും. നിലവിൽ യാത്രക്കാർക്കായി ശീതീകരിച്ച വിശ്രമമുറി താഴെയുണ്ട്‌. പൊതുമരാമത്ത്‌ വിഭാഗത്തിന്റെ ഫണ്ട്‌ അടക്കം രണ്ടുകോടി രൂപയുടെ നവീകരണമാണ്‌ നടത്തുന്നത്‌. ​

പുതിയ ബസ്‌സ്റ്റാൻഡിന്റെ 
നിർമാണം ഉടൻ

കാരിക്കാമുറിയിൽ പുതിയ കെഎസ്‌ആർടിസി ബസ്‌സ്റ്റാൻഡിന്റെ നിർമാണം ഉടൻ ആരംഭിക്കും. ബസ്‌ ബേയും ഇതിനോടുചേർന്ന്‌ കെട്ടിടവുമുൾപ്പെടുന്നതാണ്‌ പുതിയ സ്റ്റാൻഡ്‌. 28 ബസുകൾ പാർക്ക്‌ ചെയ്യാം.

സർവീസിനിടയിൽ വലിയ ഇടവേളകളുള്ള 11 ബസുകൾ പാർക്ക്‌ ചെയ്യാനും പ്രത്യേക ഇടമുണ്ട്‌. സ്‌ത്രീകൾക്കും പുരുഷന്മാർക്കും കുടുംബങ്ങൾക്കും പ്രത്യേകം ശീതീകരിച്ച കാത്തിരിപ്പുകേന്ദ്രം, മുലയൂട്ടൽമുറി, കഫെ, കടകൾ ഉൾപ്പെടെ ‍സ‍ൗകര്യങ്ങളുമുണ്ടാകും. സൗത്ത് റെയിൽവേ സ്റ്റേഷനോടുചേർന്നുള്ള കാരിക്കാമുറിയില ഗാരേജ്‌ ഭാഗത്താണ്‌ പുതിയ സ്‌റ്റാൻഡ്‌ നിർമിക്കുന്നത്‌.

നിലവിലെ സ്റ്റാൻഡിനേക്കാൾ കുറച്ചുകൂടി ഉയരമുള്ള സ്ഥലമാണിത്. 13 കോടി രൂപ ചെലവിട്ടാണ്‌ നിർമാണം. പുതിയ സ്റ്റാൻഡിന്റെ നിർമാണം പൂർത്തിയായാൽ നിലവിൽ നവീകരിക്കുന്ന പഴയ സ്റ്റാൻഡിന്റെ കെട്ടിടം വാണിജ്യ ആവശ്യങ്ങൾക്കായി നൽകിയേക്കും.