കേരള ഭാഷാ ഇന്‍സ്റ്റിറ്റ്യൂട്ടിന്റെ സഞ്ചരിക്കുന്ന പുസ്തകശാല: ഉദ്ഘാടനം ബുധനാഴ്ച

തിരുവനന്തപുരം > കേരള ഭാഷാ ഇന്‍സ്റ്റിറ്റ്യൂട്ട് പ്രസിദ്ധീകരിക്കുന്ന പുസ്തകങ്ങൾ വായനക്കാരുടെ അടുത്തേക്ക് എത്തിക്കുക എന്ന ഉദ്ദേശത്തോടെ ആരംഭിക്കുന്ന സഞ്ചരിക്കുന്ന പുസ്തകശാല ബുധനാഴ്ച മുതൽ ആരംഭിക്കും. തിരുവനന്തപുരത്ത് സെക്രട്ടറിയേറ്റ് അനക്സ് രണ്ടിന് മുന്നിൽ രാവിലെ 11 മണിക്ക് മന്ത്രി സജി ചെറിയാൻ, സാംസ്കാരിക വകുപ്പ് അഡീഷണൽ ചീഫ് സെക്രട്ടറി  ഡോ. രാജൻ എൻ ഖോബ്രഗഡെക്ക് ആദ്യ പുസ്തകവിൽപ്പന നടത്തി ഉദ്ഘാടനം നിർവഹിക്കും.  

സാംസ്‌കാരികവകുപ്പ് ഡയറക്ടർ ഡോ. ദിവ്യ എസ് അയ്യർ, കേരള ഭാഷാ ഇൻസ്റ്റിറ്റ്യൂട്ട് ഡയറക്ടർ ഡോ. എം സത്യൻ എന്നിവർ പങ്കെടുക്കും. സർവകലാശാലകൾ, കോളേജുകൾ, പൊതുജനങ്ങൾ ഒത്തുകൂടുന്ന ഇടങ്ങൾ, സാംസ്കാരിക കേന്ദ്രങ്ങൾ തുടങ്ങിയ സ്ഥലങ്ങളിൽ സഞ്ചരിക്കുന്ന പുസ്തകശാലയിൽ നിന്നും വായനക്കാർക്ക് പുസ്തകങ്ങൾ വാങ്ങാനുള്ള അവസരമുണ്ടായിരിക്കും. ഭാരത് ബെൻസിന്റെ വാഹനത്തിൽ വായനക്കാർക്ക് തെരഞ്ഞെടുക്കാൻ സാധിക്കുന്ന രീതിയിൽ പുസ്തകങ്ങൾ ക്രമീകരിച്ചിട്ടുണ്ട്. ഫോൺ: 9400421968. വെബ്സൈറ്റ്: www.keralabhashainstitute.org