കോട്ടയം നഗരസഭയിലെ തട്ടിപ്പ്‌; 
നടപടി കൂടുതൽ പേരിലേക്ക്‌

കോട്ടയം

കോട്ടയം നഗരസഭയിലെ പെൻഷൻ ഫണ്ട്​ തട്ടിപ്പിൽ നടപടി കൂടുതൽ പേരിലേക്ക്‌ നീളുന്നതായി സൂചന. തദ്ദേശവകുപ്പിന്റെ വകുപ്പ്‌ തല അന്വേഷണത്തെ തുടർന്നാണ്‌ നടപടി. മുനിസിപ്പൽ സെക്രട്ടറിയെ സർവീസിൽനിന്നു മാറ്റി നിർത്തി അന്വേഷണം നടത്തണമെന്ന് പ്രിൻസിപ്പൽ ഡയറക്ടർക്ക്​ കൈമാറിയ അന്വേഷകറിപ്പോർട്ടിൽ ശുപാർശയുള്ളതായാണ്‌ സൂചന. തട്ടിപ്പ്​ നടത്തിയ മുൻ ജീവനക്കാരൻ അഖിൽ സി വർഗീസിനു പുറമെ ഡെപ്യൂട്ടി സെക്രട്ടറി ഫില്ലിസ്​ ​ഫെലിക്സ്​, അക്കൗണ്ട്​സ്​ വിഭാഗം സൂപ്രണ്ട്​ എസ്​ കെ ശ്യാം, അക്കൗണ്ട്​സ്​ വിഭാഗത്തിലെ സീനിയർ ക്ലർക്ക്​ വി ജി സന്തോഷ്​ കുമാർ, പെൻഷൻ വിഭാഗം ​കൈകാര്യം ചെയ്തിരുന്ന കെ ജി ബിന്ദു എന്നിവർ നിലവിൽ  സസ്‌പെൻഷനിലാണ്‌. ഇപ്പോഴുള്ള സെക്രട്ടറി 2023 ഏപ്രിലിലാണ്​ കോട്ടയം നഗരസഭയിലെത്തുന്നത്​. അതിനുമുമ്പുള്ള സെക്രട്ടറിമാർക്കെതിരെ നടപടി ഉണ്ടാകുമോ എന്ന കാര്യം വ്യക്​തമല്ല. 

 നഗരസഭയിൽ ഓഡിറ്റ്-, തദ്ദേശവകുപ്പുകളുടെ അന്വേഷണം തുടരുകയാണ്​​. കഴിഞ്ഞ 30 മുതൽ തദ്ദേശവകുപ്പ്​ സീനിയർ ഫിനാൻസ്​ ഓഫിസറുടെ നേതൃത്വത്തിൽ ഏഴംഗസംഘം പരിശോധന നടത്തുന്നുണ്ട്​. ഓഡിറ്റ്​ ഡയറക്ടർ കെ ജി മിനിമോളുടെ നേതൃത്വത്തിലാണ്​ ഓഡിറ്റ് വകുപ്പിന്റെ പരിശോധന. 2020 ഒക്​ടോബർ മുതൽ 2024 ആഗസ്‌ത്‌​ വരെ കാലയളവിൽ 2.39 ലക്ഷം രൂപയാണ്​ പ്രതി അഖിൽ ​അമ്മയുടെ പേരിലുള്ള കൊല്ലം എസ്​ബിഐയിലെ അക്കൗണ്ടിലേക്ക്​ മാത്രം മാറ്റിയത്​​. ട്രഷറി വഴി 51.90 ലക്ഷവും ബാങ്ക്​ ഓഫ്​ മഹാരാഷ്ട്ര വഴി 55.79 ലക്ഷവും എസ്​ബിഐ വഴി 1.31 കോടിയുമാണ്​ തട്ടിയത്​. ഇതേ സമയം ഇന്ന് നഗരസഭ ഓഫീസിൽ എത്തിയ സെക്രട്ടറി ഫയലുകളിൽ അത്യാവശ്യം വേണ്ടപ്പെട്ടതിൽ മാത്രം ഒപ്പിട്ടു. തുടർന്ന്, ലാപ്‌ടോപ്പ് അടക്കം തിരികെ ഏൽപ്പിച്ച്‌ അവധിയിൽ പോയതായാണ്‌ വിവരം. നഗരസഭ സെക്രട്ടറിയുടെ ഓഫീസിനു മുന്നിലുള്ള ബോർഡ്‌ മാറ്റിയിട്ടുമുണ്ട്‌.