ജീവിക്കാനായി സനിലയുടെ "ഓട്ടം'

ഒരു സ്വയംതൊഴിൽ കണ്ടെത്തണമെന്ന്‌ മനസിലുറപ്പിച്ചപ്പോൾ കുടുംബശ്രീ പ്രവർത്തകയായ സനിലയയ്‌ക്ക്‌ തുണയായത്‌ മറ്റാരുമല്ല. സ്വയംപര്യാപ്‌തരാവാനുള്ള സ്‌ത്രീസമൂഹത്തിന്റെ ശ്രമങ്ങൾക്ക്‌ ചിറകുനൽകിയ കുടുംബശ്രീ തന്നെയാണ്‌. തൊഴിലെടുത്ത്‌ ജീവിക്കാൻ ആഗ്രഹിക്കുന്ന സ്‌ത്രീകൾക്ക്‌ മാതൃകയാവുകയാണ്‌ അഴീക്കോട്ടെ ഓട്ടോഡ്രൈവർ സനില. 

    ചെറുപ്പംമുതൽ ഇഷ്‌ടമുള്ള ഡ്രൈവിങ്‌ തൊഴിലാക്കാനാണ്‌ സനില ആഗ്രഹിച്ചത്‌. ഫോർ വീലർ ലൈസൻസ് കിട്ടിയപ്പോൾ  വാഹനം സ്വന്തമാക്കാനുള്ള വഴികളെക്കുറിച്ചായി ആലോചന. അഴീക്കോട് പഞ്ചായത്ത് കുടുംബശ്രീ സിഡിഎസ് മുൻകൈയെടുത്തതോടെ സനിലയുടെ സ്വപ്‌നങ്ങൾക്ക്‌ ചിറകുമുളച്ചു. 

 അഴീക്കോട് പഞ്ചായത്ത് വനിതാഘടക പദ്ധതിയുടെ ഭാഗമായി 60, 000 രൂപ ഓട്ടോ വാങ്ങാൻ വകയിരുത്തി. ബാക്കിത്തുക കേരള ബാങ്കിൽനിന്ന് വായ്‌പയെടുത്ത് കഴിഞ്ഞവർഷം  ഇലക്ട്രിക്‌ ഓട്ടോ സ്വന്തമാക്കി. ഓട്ടോ വാങ്ങിയപ്പോൾ ഡ്രൈവിങ്ങിനോടുള്ള കമ്പത്താൽ 

സ്വന്തമായാണ് ഓടിക്കാൻ പഠിച്ചത്‌.  ഡ്രൈവിങ്‌  പഠിച്ചതോടെ  നാട്ടിൽ  ഓടിച്ച് തുടങ്ങി. ഇപ്പോൾ അഴീക്കോട് ചാലിലെ തിരക്കുള്ള ഓട്ടോ ഡ്രൈവറാണ് സനില. ഒരുഫോൺ വിളിക്കപ്പുറം ഓട്ടോയുമായി സനില സവാരിക്കെത്തും.  കുടുംബശ്രീയുടെ ആവശ്യങ്ങൾക്ക്‌ ഓടുന്നതും സനിലയുടെ ഓട്ടോയാണ്‌.

   ബാങ്ക് വായ്‌പയുൾപ്പെടെ ഓട്ടോ വരുമാനത്തിൽനിന്നാണ് അടയ്‌ക്കുന്നത്‌. മൂന്നുലക്ഷത്തി എഴുപത്തി അയ്യായിരം രൂപയാണ് ഓട്ടോ വാങ്ങാൻ ചെലവായത്. ഇതിൽ 60, 000 രൂപ പഞ്ചായത്ത്‌ നൽകി. ബാക്കി കേരള ബാങ്കിൽനിന്നെടുത്ത വായ്പയിൽ 75,000  രൂപ മാത്രമാണ് തിരിച്ചടവുള്ളത്.

   ഒരുദിവസം 2000 രൂപവരെ വരുമാനമുണ്ടാക്കാൻ സാധിക്കുമെന്ന്‌ സനില പറഞ്ഞു.  സ്കൂട്ടർ ഓടിക്കുന്നതുപോലെ ലളിതമായി  ഇലക്ട്രിക്‌ ഓട്ടോ ഓടിക്കാം. സ്വയംതൊഴിൽ കണ്ടെത്താൻ ആഗ്രഹിക്കുന്ന സ്ത്രീകൾ  ഈ മേഖലയിലേക്ക് കടന്നുവരണമെന്നും സനില പറഞ്ഞു. ഭർത്താവ് പ്രദീപ് കുമാറും മക്കളായ സപ്നയും ദീപ്നയും  പിന്തുണയുമായി ഒപ്പമുണ്ട്.