ഹിപ്പികളും ഫിസിക്‌സും തമ്മിലെന്ത് ?

ദർശനത്തിന്റെ വക്താക്കൾക്ക് അത് വലിയ താത്പര്യം സൃഷ്ടിച്ചു .എന്തായാലും ശാസ്ത്രത്തിന്റെ മേഖലകളിലുണ്ടാകുന്ന മാറ്റം ദർശനങ്ങളെ സ്വാധീനിക്കും എന്ന തോന്നൽ വളരെ ശക്തമായത് ഇരുപതാം നൂറ്റാണ്ടിന്റെ തുടക്കത്തിൽ ആപേക്ഷികത സിദ്ധാന്തവും ഹൈസൻബർഗിന്റെ അനിശ്ചിതത്വ സിദ്ധാന്തവും പ്രബലമായതോടെയാണ്- സാജൻ ​ഗോപാലൻ എഴുതുന്നു

ഫേസ്ബുക്ക് കുറിപ്പ്

ഹിപ്പികളും ഫിസിക്‌സും തമ്മിലെന്താണ് ബന്ധം?

ഫിസിക്സിനെയും വേദാന്തത്തെയും തമ്മിൽ ബന്ധിപ്പിക്കുന്ന ഒരു ഫാഷൻ കുറച്ചു കാലത്ത് കേരളത്തിൽ ഉണ്ടായിരുന്നു. Quantum ഫിസിക്‌സും അനിശ്ചിതത്വ സിദ്ധാന്തവുമൊക്കെ പറയുന്നത് നമ്മുടെ വേദാന്തത്തിൽ പറയുന്ന മായ തന്നെയാണ് എന്ന് വാദിക്കുന്ന ചിലരുണ്ടായിരുന്നു എൺപതുകളിൽ. കേരളത്തിൽ വലിയ ചർച്ചയായ ഒരു ഫിസിക്സ് പുസ്തകമുണ്ട് Fritjof Capra എഴുതിയ Tao of Physics

പുതിയ ഊർജ തന്ത്ര സിദ്ധാന്തങ്ങളെ നടരാജന്റെ നൃത്തമായി കണ്ട് പ്രശസ്തനായ ഒരു ഊർജ തന്ത്രജ്ഞൻ പുസ്തകം എഴുതിയപ്പോൾ ഇന്ത്യൻ ദർശനത്തിന്റെ വക്താക്കൾക്ക് അത് വലിയ താത്പര്യം സൃഷ്ടിച്ചു .എന്തായാലും ശാസ്ത്രത്തിന്റെ മേഖലകളിലുണ്ടാകുന്ന മാറ്റം ദർശനങ്ങളെ സ്വാധീനിക്കും എന്ന തോന്നൽ വളരെ ശക്തമായത് ഇരുപതാം നൂറ്റാണ്ടിന്റെ തുടക്കത്തിൽ ആപേക്ഷികത സിദ്ധാന്തവും ഹൈസൻബർഗിന്റെ അനിശ്ചിതത്വ സിദ്ധാന്തവും പ്രബലമായതോടെയാണ്.

എന്തായാലും quantum ബലതന്ത്രം ആധുനിക ലോകത്തെ മാറ്റിമറിച്ചു

ഇപ്പോൾ ലൂക്കയും ശാസ്ത്ര സാഹിത്യ പരിഷത്തും ഈ വർഷം +Quantum സിദ്ധാന്തത്തിന്റെ നൂറാം വർഷം ആഘോഷിക്കാൻ തീരുമാനിച്ചിരിക്കുകയാണ്

സത്യത്തിൽ ഇത്രയൊക്കെ വായിച്ചിട്ടും എന്താണ് ഈ quantum എന്നോ ഈ ഷ്രോഡിങ്ങരുടെ പൂച്ച ഇരുട്ടിൽ എന്താണ് ചെയ്യുന്നത് എന്നോ ഇതുവരെ കാര്യമായി മനസ്സിലാകാതെ ഇരിക്കുമ്പോഴാണ് രസകരമായ ഒരു പുസ്തകം കണ്ണിൽ പെടുന്നത്

ഹിപ്പികൾ ഫിസിക്സിനെ എങ്ങനെ രക്ഷിച്ചു .How the Hippies Saved Physics: Science, Counterculture and Quantum revival എന്ന പേരിൽ David Kaiser എഴുതിയ പുസ്തകമാണ്

പേരിന്റെ കൗതുകമാണ് പുസ്തകം ഒന്ന് നോക്കാൻ എന്നെ പ്രേരിപ്പിച്ചത്

ഡേവിഡ് കൈസർ ഒരു ഫിസിസിസ്റ്റും ശാസ്ത്ര ചരിത്രകാരനുമാണ്. ഈ പുസ്തകം അദ്ദേഹം സമർപ്പിച്ചിരിക്കുന്നത് ഹിപ്പിയല്ലാത്ത തന്റെ അച്ഛനാണ് .അത്ഭുതം എന്ന് പറയട്ടെ, പുസ്തകത്തിന്റെ മുഖക്കുറിപ്പ് എഴുതിയിരിക്കുന്നത് psychedelic ഡ്രഗുകളുടെ ഉപയോഗത്തിനായി ശക്തിപൂർവം വാദിച്ച അക്കാലത്ത് കുപ്രസിദ്ധമായ പരീക്ഷണങ്ങൾ നടത്തിയ തിമോത്തി ലിയറി ആണ്

“1960 കളിൽ സ്വന്തം നെർവസ് സിസ്റ്റം വികസിപ്പിച്ചെടുത്ത ധാരാളം ചെറുപ്പക്കാർ സയൻസിന്റെ ഉന്നത നിലകളിൽ എത്തി. തങ്ങളുടെ ഉന്നതമായ മാനസിക നില കൊണ്ട് സയൻസും മനഃശാസ്ത്രവും തമ്മിലുള്ള ബന്ധം കണ്ടെത്താൻ ഫിസിക്സിലും ഗണിതത്തിലും അസ്ട്രോണമിയിലും പ്രവർത്തിക്കുന്ന ഈ ചെറുപ്പക്കാർക്ക് കഴിയും എന്നാണ് ഞാൻ പ്രതീക്ഷിക്കുന്നത്” എന്ന് തിമോത്തി ലിയറി എഴുതുന്നു

1920 കളിൽ ഊർജ്ജതന്ത്രത്തിലുണ്ടായ പുതിയ സമവാക്യങ്ങളിൽ നിന്നാണ് ഈ കഥ തുടങ്ങുന്നത് .

അന്നുവരെ പ്രപഞ്ചത്തിലെ ഭൂമിയും സൂര്യനും അടക്കമുള്ള വലിയ ഗ്രഹങ്ങളുടെ ചലനത്തെക്കുറിച്ചുള്ള ന്യൂട്ടോണിയൻ പഠനങ്ങൾക്കാണ് പ്രാമുഖ്യം ഉണ്ടായിരുന്നത്. എന്നാൽ അണുവിന്റെ സൂക്ഷ്മലോകം എത്തിയതോടെ പുതിയ ചലന നിയമങ്ങൾ ആവശ്യമായി വന്നു.അപ്പോഴാണ് Quantum ഫിസിക്സ് രംഗപ്രവേശം ചെയ്യുന്നത്

ക്ലാസിക്കൽ ഫിസിക്സിന്റെ തലതൊട്ടപ്പന്മാരായിരുന്ന ഐന്സ്റ്റൈനും നീൽസ് ബോറും മാക്സ് പ്ലാങ്കും വെർനെർ ഹൈസൻബർഗും എർവിൽ ഷ്രോഡിങ്കറും അടങ്ങിയ മഹാരഥന്മാരാണ് ഈ സിദ്ധാന്തത്തിന് തുടക്കം കുറിച്ചത് .വേവ് പാർട്ടിക്കിൾ ഡുവാലിറ്റി, ഹൈസൻബർഗിന്റെ അനിശ്ചിതത്വ സിദ്ധാന്തം, ഷ്രോഡിങ്കറുടെ പൂച്ച, quantum entanglement എന്നിങ്ങനെ ശാസ്ത്രത്തിൽ പരിചയമില്ലാത്തവർ പോലും ഉപയോഗിക്കുന്ന ധാരാളം പ്രയോഗങ്ങൾ വളരെ ജനകീയമായി മാറി.

കണികകളുടെ തലത്തിലുള്ള ചലനം അതേവരെയുള്ള ധാരണകൾക്ക് വിരുദ്ധമാകുകയും സംഭ്രമജനകമാകുകയും ചെയ്തു. ഈ ദാർശനിക വൈരുദ്ധ്യങ്ങളെ നേരിട്ട് അഭിമുഖീകരിക്കാതെ മുന്നോട്ട് പോകാൻ കഴിയില്ല എന്ന നിലവന്നു.

എന്നാൽ അതിൽ മുഴുകാൻ മടിച്ച ഐൻസ്റ്റൈൻ ‘ദൈവം പകിട കളിക്കാരനല്ല..’ എന്നുപറഞ്ഞൊഴിഞ്ഞു മാത്രമല്ല വിജ്ഞാനദാഹവുമായി പ്രപഞ്ചത്തിന്റെ രഹസ്യങ്ങൾ തേടിയലയുന്ന ശാസ്ത്ര സപര്യയുടെ കാലവും അസ്തമിക്കുകയായിരുന്നു. രണ്ടാം ലോക മഹായുദ്ധത്തോടെ ഫാഷിസത്തിനെതിരായ പോരാട്ടത്തിൽ മാത്രമായി ലോകത്തിന്റെ ശ്രദ്ധ. യുദ്ധത്തിന്റെ തയ്യാറെടുപ്പിൽ ഏറ്റവും ആവശ്യം ഫിസിസിസ്റ്റുകളെ ആയിരുന്നു. റഡാറും അറ്റോമിക് ബോംബും പലതരം മറ്റ് ഉപകരണങ്ങളും ഉണ്ടാക്കാൻ ലോകമെമ്പാടുമുള്ള ഫിസിസിസ്റ്റുകൾ നിയുക്തരായി.

ക്വാണ്ടത്തിന്റെ ദാർശനിക താളം എല്ലാവരും മറന്നു. ഇത് എങ്ങനെ പ്രയോഗിക്കാം എന്നത് മാത്രമായി ചിന്ത. ഫിസിക്സ് എന്നാൽ പുതിയൊരു സംസ്കാരത്തിന്റെ പതാക വാഹകർ ആയി മാറണം എന്നും ഗൊയ്‌ഥെയുടെ ഫൗസ്റ്റ് വായിക്കുന്നതുപോലെയോ മൊസാർട്ടിന്റെ സംഗീതം കേൾക്കുന്നതുപോലെയോ ശാസ്ത്രം വായിക്കപ്പെടണം എന്നുമുള്ള പഴയ കാല ശാസ്ത്രജ്ഞരുടെ ചിന്ത അപ്രസക്തമായി. സർവകലാശാലകളിൽ സ്വപ്നം കൊണ്ടുനടന്നിരുന്ന ശാസ്ത്രജ്ഞർ അധികാരത്തിന്റെ ഇടനാഴികളിൽ സൈനിക ഉദ്യോഗസ്ഥരെയും രാഷ്ട്രീയ നേതൃത്വത്തെയും ഉപദേശിക്കുന്ന തിരക്കിലായി.

ശാസ്ത്രത്തിന്റെ ദർശനം പഴംകഥയായി.

അതിനൊപ്പം ശാസ്ത്രത്തിന്റെ നയസമീപനങ്ങളിലും മാറ്റം വന്നു. അടിസ്ഥാന ഗവേഷണത്തിന് നൽകുന്ന തുക കഠിനമായി വെട്ടിച്ചുരുക്കപ്പെട്ടു.

ശാസ്ത്ര ഗവേഷണത്തിന് വരുന്ന കുട്ടികൾക്ക് വിയറ്റ്നാമിൽ യുദ്ധഭൂമിയിലേക്ക് പോകേണ്ടിവന്നു.മനുഷ്യഭാവി തന്നെ വലിയ സംഘർഷത്തിലേക്ക് കടക്കുന്ന ഈ കാലഘട്ടത്തിലാണ് ഒരു സംഘം ചെറുപ്പക്കാരായ ശാസ്ത്രജ്ഞർ ഒത്തുകൂടിയത്. എലിസബത്ത് റൗഷർ, ജോർജ് വീസ്മാൻ എന്നീ രണ്ട് ബെർക്‌ലി ശാസ്ത്രജ്ഞരാണ് ഇതിന് നേതൃത്വം നൽകിയത്. ഫിസിക്സിന്റെ അടിസ്ഥാന ചോദ്യങ്ങൾ, സ്ഥലവും കാലവും ദ്രവ്യവും ആഴത്തിൽ പഠിക്കുന്ന ഒരു സംഘമായിരുന്നു അത്. രസകരമായ ഒരു പേരാണ് അവർ ആ ഗ്രൂപ്പിന് നൽകിയത്.“Fundamental Fysiks Group

ഇതിൽ ഫിസിസിസ്റ്റുകൾ മാത്രമല്ല ഉണ്ടായിരുന്നത്. സാഹിത്യവും മനഃശാസ്ത്രവും രാഷ്ട്രീയവുമൊക്കെ പഠിക്കുന്ന കുട്ടികൾ ഈ മീറ്റിങ്ങുകളിൽ പങ്കെടുത്തു. സർവകലാശാലയിലെ ലെക്ച്ചർ മുറികളിൽ ആരംഭിക്കുന്ന ചർച്ചകൾ തൊട്ടടുത്തുള്ള പിസ പാർലറിലേക്കും ഇന്ത്യൻ റെസ്റ്ററന്റുകളിലേക്കും നീണ്ടു. ഇത് എല്ലാത്തരം പരീക്ഷണങ്ങളും ചിന്തകളും പ്രയോഗങ്ങളുമുള്ള ഒരു സംഘമായിരുന്നു. സൈക്കഡലിക് ഡ്രഗുകളും ട്രാൻസെൻഡന്റൽ മെഡിറ്റേഷനും കോൺഷ്യസ്നെസ്സ് എക്സ്പാൻഷനും സൈക്കിക് മൈൻഡ് റീഡിങ്ങും ഒന്നും അവർക്ക് നിഷിദ്ധമായിരുന്നില്ല.

ക്രമേണ ഇവിടെയും ശാസ്ത്രം അപ്രത്യക്ഷമാവുകയും ന്യൂ ഫിസിക്സ് എന്ന പേരിൽ ഒരു avant -garde സാംസ്കാരിക പ്രതിഭാസമായി ഇത് മാറുകയും ചെയ്തു. വിചിത്രം എന്ന് പറയാം ഈ സംഘത്തിന്റെ പേട്രൻസ് ആയി മാറിയത് CIA യും ഹ്യൂമൻ പൊട്ടൻഷ്യൽ മൂവ്മെന്റ് എന്നറിയപ്പെടുന്ന പ്രസ്ഥാനത്തിന്റെ ഗുരുവും സംരംഭകനും ആയിരുന്ന വെർനെർ എർഹർഡും ഒക്കെ ആയിരുന്നു. ഇവർക്ക് ധാരാളം പണം അങ്ങനെ കിട്ടിത്തുടങ്ങി.

പത്രക്കാർക്ക് ഇത് ഒരു ചാകര ആയിരുന്നു. കോൺഷ്യസ്നെസ്സ്, മിസ്റ്റിസിസം, പാരനോർമൽ എന്നിവയിലോക്കെ വ്യാപരിക്കുന്ന ഫിസിസിസ്റ്റുകളെക്കാൾ ആകർഷകമായി മറ്റെന്തുണ്ട്?

ഗോഡ്ഫാദർ, ദി അമേരിക്കൻ ഗ്രാഫിറ്റി എന്നീ പ്രഖ്യാത സിനിമകളുടെ സംവിധായകൻ ഫ്രാൻസിസ് ഫോർഡ് കപ്പോള സിറ്റി ഓഫ് സാൻഫ്രാൻസിസ്കോ എന്നൊരു മാസിക സ്വന്തമാക്കുകയും അതിൽ ഈ അപൂർവ ശാസ്ത്രത്തെക്കുറിച്ചുള്ള ലേഖനങ്ങൾ നൽകുകയും ചെയ്തു. സൈക്കഡലിക് ഗുരുവായ തിമോത്തി ലിയറിയുമായി ഈ ഗ്രൂപ്പിലെ ചിലർ ബന്ധപ്പെട്ടു. ഡ്രഗ് കേസിൽ കാലിഫോർണിയയിലെ ജയിലിൽ ആയിരുന്നെങ്കിലും അയാൾ തന്റെ പ്രവർത്തനങ്ങൾ നിർത്തിയിരുന്നില്ല. നോവലിസ്റ്റും കൌണ്ടർ കൾച്ചർ പ്രസ്ഥാനത്തിന്റെ നേതാവും ആയിരുന്ന കെൻ കേസി, ലിയറിയുമൊത്ത് സ്പിറ്റ് ഇൻ ദ ഓഷൻ എന്നൊരു മാസിക തുടങ്ങി. അറിയപ്പെടുന്ന ഫിസിസിസ്റ്റ് ജാക്ക് സർഫാറ്റി ഗുരു വേഷത്തിൽ പല പ്രധാന മാസികയുടെയും കവർ പേജിൽ വന്നു. അതിൽ ഐൻസ്റ്റൈന്റെയും ജോർജ് ഗാമോവിന്റേയും ചിത്രങ്ങൾ ഒപ്പമുണ്ടായിരുന്നു. കൗണ്ടർ കൾച്ചർ പ്രസ്ഥാനത്തിന്റെ അപോസ്തലന്മാരായ അലൻ ഗിൻസ്ബർഗും വില്യം എസ് ബറോസും ഇവർക്കൊപ്പം കൂടി.

സമാന്തര മാഗസിനുകളിൽ നിന്ന് ഈ സംഘം ക്രമേണ ടൈം, ന്യൂസ് വീക്ക് മാഗസിന്റെ കവർ പേജിലും എത്തി. ജാക്ക് സർഫാറ്റി പ്രശസ്ത വാസ്തുശില്പി ബക്മിൻസ്റ്റർ ഫുള്ളർ, ദുഖത്തിന്റെ അഞ്ച് തലങ്ങൾ പ്രതിപാദിക്കുന്ന സൈക്കിയാട്രിസ്റ്റ് എലിസബത്ത് കുബ്ലാർ റോസ് എന്നിവർക്കൊപ്പം ഹ്യൂമനിസ്റ്റ് സൈക്കോളജി സമ്മേളനത്തിൽ പങ്കെടുത്തു.

എന്തായാലും ഫിസിക്സ് ശാസ്ത്രജ്ഞർ കൌണ്ടർ കൾച്ചർ പ്രസ്ഥാനത്തിന്റെ പ്രിയപ്പെട്ട താരങ്ങൾ ആയി മാറി. ഏകദേശം ഇക്കാലത്താണ് ഹിപ്പി എന്ന വാക്ക് ചില പത്രപ്രവർത്തകർ ഉണ്ടാക്കുന്നത്. വിയറ്റ്നാം യുദ്ധമാണ് അമേരിക്കയിലെ യുവാക്കളെ ഹിപ്പി പ്രസ്ഥാനത്തിലേക്ക് ആകർഷിക്കുന്നത്.എന്തായാലും ശാസ്ത്രത്തെയും ഫിലോസഫിയെയും ഇത്തരത്തിൽ ബന്ധിപ്പിക്കുന്നത് കാൾ പോപ്പർ അടക്കമുള്ള ശാസ്ത്രജ്ഞർ ചോദ്യം ചെയ്തു.

എന്നാൽ LSD യെക്കുറിച്ചുള്ള പഠനത്തിൽ CIA താത്പര്യം കാണിച്ചു.

എന്തായാലും അമേരിക്കൻ ശാസ്ത്ര പഠിതാക്കൾ ഭാരതീയ ദർശനം തേടി ഇന്ത്യയിലേക്ക് യാത്രയാരംഭിക്കുന്നതും ഇക്കാലത്താണ്. ആപ്പിളിന്റെ സ്ഥാപകൻ സ്റ്റീവ് ജോബ്സ് ഏകദേശം ഒരു വർഷമാണ് ഹിമാലയ ഗ്രാമങ്ങളിൽ താമസിക്കുന്നത്. ഓട്ടോബയോഗ്രഫി ഓഫ് എ യോഗി വർഷത്തിൽ ഒരിക്കൽ താൻ വായിച്ചിരുന്നു എന്ന് സ്റ്റീവ് തന്റെ ജീവചരിത്രത്തിൽ പറയുന്നുണ്ട്.

അങ്ങനെ ഒരുഭാഗത്ത് ഇന്ത്യൻ വേദാന്തവും മറുഭാഗത്ത് അമേരിക്കൻ മിലിറ്ററി ഇൻഡസ്ട്രിയൽ കോംപ്ലക്‌സും ചേർന്നാണ് ഈ പുതിയ fysiks നു രൂപം നൽകിയത്. ഇതിൽ ആഗോള സ്വാധീനം സൃഷ്ടിച്ചത് നമ്മൾ നേരത്തെ കണ്ട ഫ്രിജോഫ് കാപ്രയുടെ ടാവോ ഓഫ് ഫിസിക്‌സും ഗാരി സുകാവിന്റെ ദി ഡാൻസിങ് വു ലി മാസ്റ്റേഴ്സും ആണ്.ഈ ഹിപ്പികൾ എങ്ങനെയാണ് ഫിസിക്സിനെ രക്ഷിച്ചത് എന്ന് ഡേവിഡ് കൈസർ വാദിക്കുന്നത് ശ്രദ്ധിക്കുക:

ഒന്ന് ശാസ്ത്രത്തിന് വേണ്ട സ്വതന്ത്രമായ ചിന്തയും സംഭാഷണങ്ങളും അവർ ഫിസിക്സിലേക്ക് തിരിച്ചുകൊണ്ടുവന്നു. ബുദ്ധിസ്റ്റ് മിസ്റ്റിസിസത്തിലേക്ക് നയിക്കാൻ ആണെങ്കിലും ബെൽ’സ് തയ്യാറാവും quantum entanglement ഉം അവർ പൊതു ചർച്ചയിലേക്ക് തിരിച്ചുകൊണ്ടുവന്നു. ഇത് ഫിസിക്സിൽ പുതിയ ഗവേഷണത്തിലേക്ക് നയിച്ചു.

ഈ പുസ്തകത്തിന്റെ പേര് പ്രകോപനപരമാണ് എന്ന് ഡേവിഡ് കൈസർ സമ്മതിക്കുന്നുണ്ട്. ചരിത്രത്തിന്റെ ചില സന്ദർഭങ്ങളിൽ ശ്രദ്ധയിൽ പെട്ടുപോകാത്ത ചില സംഭവങ്ങളെയും സന്ദർഭങ്ങളേയും മുന്നോട്ട് കൊണ്ടുവരാനാണ് താൻ ഈ പേര് നൽകുന്നത് എന്ന് അദ്ദേഹം പറയുന്നു. നമ്മുടെ ശാസ്ത്രജ്ഞന്മാർ വായിച്ചാൽ നെറ്റി ചുളിക്കാൻ സാധ്യതയുള്ള ഈ കുറിപ്പ് ഞാൻ എഴുതിയത് എന്തിനാണ്? ഈ quantum quantum എന്ന് പറഞ്ഞ് നമ്മുടെ പാവം റിസ്വാൻ നടക്കാൻ തുടങ്ങിയിട്ട് കുറച്ചു മാസങ്ങളായി ആരും അദ്ദേഹത്തെ വേണ്ടത്ര ഗൗനിച്ചില്ല, ഈ ഞാൻ അടക്കം

ഇനിയിപ്പോൾ നവംബർ മുതൽ അതിഗംഭീര പരിപാടികളാണ് ലൂക്കയും ശാസ്ത്ര സാഹിത്യ പരിഷത്തും ആരംഭിക്കുന്നത് .ഇനിയും ഈ ഓളത്തിൽ കയറാത്തവരെ കഠിനമായി പ്രേരിപ്പിക്കുക എന്നൊരു ദൗത്യം മാത്രമാണ് എനിക്കുള്ളത് . ഈ കുറിപ്പിൽ എഴുതിയ അബദ്ധങ്ങൾക്ക് ശാസ്ത്രചിന്തകർ കുറ്റക്കാരല്ല. ഞാൻ മാത്രമാണ് പ്രതി. എന്തായാലും ഉടൻ quantum ബോക്സ് വാങ്ങുകയും ലൂക്കയുടെ പരിപാടികളിൽ പങ്കെടുക്കുകയും ചെയ്യാൻ ഇതോടെ ഞാൻ ആഹ്വാനം ചെയ്യുന്നു. മറക്കണ്ട, ഈ ആധുനിക ലോകം സൃഷ്ടിച്ചത് ഈ quantum സയൻസാണ്

ജി സാജൻ