'ഡ്യൂൺ പാർട് 3' ഒരുങ്ങുന്നു: വില്ലനാവാൻ റോബർട് പാറ്റിൻസൺ

ഹോളിവുഡ് : പ്രേക്ഷക - നിരൂപക പ്രശംസയും അക്കാദമി അവാർഡുമടക്കം നേടി ഏറെ ശ്രദ്ധിക്കപ്പെട്ട അമേരിക്കൻ സ്പേസ് ഒപ്പേറ ചിത്രമായ ഡ്യൂണിന്റെ മൂന്നാം ഭാഗം ഒരുങ്ങുന്നു. ഡ്യൂൺ: മെസായ ( Dune: Messiah) എന്ന പേരിലൊരുങ്ങുന്ന ബിഗ് ബജറ്റ് ചിത്രത്തിൽ പ്രശസ്ത താരം റോബർട് പാറ്റിൻസൺ വില്ലനായി എത്തുമെന്നതാണ് പുതിയ വിവരം. ചിത്രത്തിലെ പ്രധാന വില്ലനായി റോബർട്ട് പാറ്റിൻസൺ എത്തുമെന്ന് വിവിധ മാധ്യമങ്ങൾ റിപ്പോർട്ട് ചെയ്യുന്നു.
ഫ്രാങ്ക് ഹെർബർട്ടിന്റെ സയൻസ് ഫിക്ഷൻ നോവലിനെ അടിസ്ഥാനമാക്കി ഡെനിസ് വില്ലേന്യൂവ് സംവിധാനം ചെയ്യുന്ന ചിത്രം ഡ്യൂൺ പരമ്പരയിലെ മൂന്നാമത്തേതാണ്. 2021ൽ പുറത്തിറങ്ങിയ ഡ്യൂൺ പാർട് വണ്ണും 2024ൽ പുറത്തിറങ്ങിയ ഡ്യൂൺ പാർട് 2വും മികച്ച കളക്ഷൻ നേടിയിരുന്നു. തിമോത്തി ഷാലമെറ്റ്, ഓസ്റ്റിൻ ബട്ലർ, സെൻഡായ, ജേസൺ മൊമോവ, ഫ്ലോറൻസ് പുഗ് എന്നിവരാണ് ചിത്രത്തിൽ പ്രധാന വേഷങ്ങളിലെത്തിയത്. 1965-ൽ ഫ്രാങ്ക് ഹെർബർട്ട് എഴുതിയ നോവലിൻ്റെ രണ്ട് ഭാഗങ്ങളുള്ള അഡാപ്റ്റേഷനിൽ ആദ്യത്തേതാണ് 2021ൽ ഒന്നാം ഭാഗമായി എത്തിയത്.
സ്പൈസസുകളാൽ സമ്പന്നമായ അരാക്കിസ് എന്ന ഗ്രഹത്തിനായി ഹൗസ് ആർട്രേയ്ഡിസും ബാരൺ വ്ലാദിമിർ ഹാർക്കോനെനുമായി നടക്കുന്ന യുദ്ധമാണ് ആദ്യഭാഗം. രണ്ടാം ഭാഗത്തിൽ ഓസ്റ്റിൻ ബട്ലറാണ് വില്ലനായെത്തിയത്.
വാർണർ ബ്രോസ് പിക്ചേഴ്സിന്റെ ബാനറിൽ ലെജൻഡറി പിക്ചേഴ്സ് നിർമിച്ച ചിത്രം 2024ൽ ഏറ്റവും പണം വാരിയ പടങ്ങളിലൊന്നായിരുന്നു. 714 മില്യൺ ഡോളറാണ് ചിത്രം നേടിയത്. ഒന്നാം ഭാഗവും കോവിഡ് മഹാമാരിക്കിടയിലും 410 മില്യൺ ഡോളർ നേടി. മൂന്നാം ഭാഗം 2026ൽ പുറത്തിറങ്ങും.
ട്വിലൈറ്റ് ചിത്രങ്ങളുടെ പരമ്പരയിലൂടെ ശ്രദ്ധിക്കപ്പെട്ട നടനാണ് റോബർട്ട് പാറ്റിൻസൺ. ഹാരി പോട്ടർ ആൻഡ് ദ ഗോബ്ലറ്റ് ഓഫ് ഫയർ (2005), ട്വിലൈറ്റ് (2008), ദ ട്വിലൈറ്റ് സാഗ: ന്യൂ മൂൺ (2008), ദ ട്വിലൈറ്റ് സാഗ: ബ്രേക്കിങ് ഡാൺ പാർട് 1 (2011), ദ ട്വിലൈറ്റ് സാഗ: ബ്രേക്കിങ് ഡാൺ പാർട് 1 (2012), കോസ്മോപൊളിസ് (2012), ദ കിങ്ങ് (2019) ബാറ്റ്മാൻ (2022) എന്നിവയാണ് പ്രധാന ചിത്രങ്ങൾ. ക്രിസ്റ്റഫർ നോളന്റെ സംവിധാനത്തിലൊരുങ്ങുന്ന ദ ഒഡീസിയിലും റോബർട് പ്രധാനവേഷത്തിലെത്തുന്നുണ്ട്.








0 comments