'അവറാച്ചൻ ആൻഡ് സൺസ്' മുതൽ 'മിർസാപൂർ' വരെ; ഈ ആഴ്ച ഒടിടിയിലെത്തിയ ചിത്രങ്ങളും സീരീസുകളും

കൊച്ചി : ഒക്ടോബർ അവസാന വാരം വിവിധ ഒടിടി പ്ലാറ്റ്ഫോമുകളിലായി ഒൻപത് ചിത്രങ്ങളും വെബ് സീരീസുകളും സ്ട്രീമിങ്ങിനെത്തി. ബിജു മേനോൻ നായകനായ ‘അവറാച്ചൻ ആൻഡ് സൺസ്’, ഫഹദ് ഫാസിലിന്റെ ‘ഡോണ്ട് ട്രബിൾ ദ് ട്രബിൾ’, സ്വാസികയുടെ ‘ജെന്നിഫെർ’ എന്നിവയാണ് മലയാളത്തിൽ നിന്നുള്ള പ്രധാന റിലീസുകൾ. ജേസൺ സഞ്ജയ് ആദ്യമായി സംവിധാനം ചെയ്ത ‘സിഗ്മ’, വിജയ് സേതുപതി ചിത്രം ‘ബത്ത’, ഹോളിവുഡ് ചിത്രം ‘ഒബ്സെഷൻ’ (അൺകട്ട് വേർഷൻ) എന്നിവയും ഈ ആഴ്ചയിലെ ശ്രദ്ധേയമായ റിലീസുകളാണ്.

അവറാച്ചൻ ആൻഡ് സൺസ് – നെറ്റ്ഫ്ലിക്സ്

ബിജു മേനോൻ, ശ്രീനാഥ് ഭാസി, ഗണപതി എന്നിവരെ കേന്ദ്ര കഥാപാത്രങ്ങളാക്കി നവാഗതനായ തമ്പി സംവിധാനം ചെയ്ത ചിത്രമാണ് ‘അവറാച്ചൻ ആൻഡ് സൺസ്’. മാജിക് ഫ്രെയിംസിന്റെ ബാനറിൽ ലിസ്റ്റിൻ സ്റ്റീഫൻ അവതരിപ്പിക്കുന്ന ചിത്രത്തിന് ജോസഫ് വിജീഷും തമ്പിയും ചേർന്നാണ് തിരക്കഥ ഒരുക്കിയിരിക്കുന്നത്. വിനയ് ഫോർട്ട്, ജോണി ആന്റണി, ഗ്രെയ്‌സ് ആന്റണി, അഖില ഭാർഗവൻ, പൗളി വത്സൺ, സാബുമോൻ, കോട്ടയം നസീർ, വിനീത് തട്ടിൽ, സാജൻ പള്ളുരുത്തി, ആഷിഖ് ഖാലിദ്, സുധി കോപ്പ, സജിൻ ചെറുകയിൽ, ഷാജു ശ്രീധർ, നിഷാ സാരംഗ് എന്നിവരും ചിത്രത്തിൽ പ്രധാന വേഷങ്ങളിലെത്തുന്നു.

ഡോണ്ട് ട്രബിൾ ദ് ട്രബിൾ – നെറ്റ്ഫ്ലിക്സ്

ഫഹദ് ഫാസിൽ നായകനാകുന്ന പാൻ ഇന്ത്യൻ ചിത്രമാണ് ‘ഡോണ്ട് ട്രബിൾ ദ് ട്രബിൾ’. എസ്എസ് രാജമൗലി അവതരിപ്പിക്കുന്ന ചിത്രം നവാഗതനായ ശശാങ്ക് യെലേട്ടിയാണ് സംവിധാനം ചെയ്യുന്നത്. ‘ബാഹുബലി’ ഉൾപ്പെടെയുള്ള ചിത്രങ്ങളുടെ നിർമാതാക്കളായ ആർക്ക മീഡിയ വർക്ക്സും ചിത്രത്തിന്റെ നിർമാണത്തിൽ പങ്കാളികളാണ്.

ജെന്നിഫെർ – നെറ്റ്ഫ്ലിക്സ്

സ്വാസിക നായികയാകുന്ന ത്രില്ലർ ചിത്രമാണ് ‘ജെന്നിഫെർ’. അൽത്താഫ് റഹ്മാനാണ് ചിത്രം സംവിധാനം ചെയ്യുന്നത്. നടുവട്ടം പ്രൊഡക്ഷൻസിന്റെയും നവരംഗ് സ്ക്രീൻസിന്റെയും ബാനറിൽ ആന്റണി നടുവട്ടവും ബിനു ദേവും ചേർന്നാണ് നിർമാണം. അൽത്താഫിന്റെ കഥയ്ക്ക് മനോജ് ഐജിയാണ് തിരക്കഥയും സംഭാഷണവും ഒരുക്കുന്നത്.

സിഗ്മ – നെറ്റ്ഫ്ലിക്സ്

തമിഴ് നടൻ വിജയ്‌യുടെ മകൻ ജേസൺ സഞ്ജയ് ആദ്യമായി സംവിധാനം ചെയ്ത ചിത്രമാണ് ‘സിഗ്മ’. ലൈക്ക പ്രൊഡക്ഷൻസ് നിർമിച്ച ചിത്രത്തിൽ സന്ദീപ് കിഷനാണ് നായകൻ. ഫാരിയ അബ്ദുള്ള, രാജു സുന്ദരം, സമ്പത്ത് രാജ്, ഷിവ് പണ്ഡിറ്റ്, അൻബ് താസൻ എന്നിവരും പ്രധാന വേഷങ്ങളിലെത്തുന്നു. ആക്ഷൻ ഡ്രാമയായി ഒരുക്കിയ ചിത്രത്തിന് തമൻ എസ് സംഗീതം ഒരുക്കുന്നു. കൃഷ്ണൻ വസന്താണ് ഛായാഗ്രഹണം. പ്രവീൺ കെഎൽ എഡിറ്റിങ്ങും നിർവഹിക്കുന്നു.

ഒബ്സെഷൻ – അൺകട്ട് വേർഷൻ - ജിയോ ഹോട്ട്സ്റ്റാർ

ഹോളിവുഡ് സൈക്കോളജിക്കൽ ത്രില്ലർ ചിത്രമായ ‘ഒബ്സെഷന്റെ’ അൺകട്ട് പതിപ്പും ഒടിടിയിലെത്തി. തീയറ്റർ റിലീസിൽ ഒഴിവാക്കിയ നിരവധി രംഗങ്ങൾ ഉൾപ്പെടുത്തിയ പതിപ്പാണ് ഇപ്പോൾ സ്ട്രീമിങ്ങിനെത്തിയിരിക്കുന്നത്.

അക്ക – നെറ്റ്ഫ്ലിക്സ്

കീർത്തി സുരേഷും രാധിക ആപ്തെയും പ്രധാന വേഷങ്ങളിലെത്തുന്ന ഹിന്ദി ക്രൈം ഡ്രാമ ത്രില്ലർ വെബ് സീരീസാണ് ‘അക്ക’. ധർമരാജ് ഷെട്ടി സംവിധാനം ചെയ്ത സീരീസ് യാഷ് രാജ് ഫിലിംസിന്റെ വൈആർഎഫ് എന്റർടെയ്ൻമെന്റാണ് നിർമിച്ചിരിക്കുന്നത്.

ഇമ്മോർട്ടൽ – സോണി ലിവ്

ജിവി പ്രകാശ് കുമാറും കയാദു ലോഹറും പ്രധാന കഥാപാത്രങ്ങളായെത്തുന്ന ചിത്രമാണ് ‘ഇമ്മോർട്ടൽ’. മാരിയപ്പൻ ചിന്ന സംവിധാനം ചെയ്ത ചിത്രം സോണി ലിവിൽ കാണാം.

മിർസാപൂർ – പ്രൈം വിഡിയോ

പ്രശസ്ത ക്രൈം ത്രില്ലർ വെബ് സീരീസായ ‘മിർസാപൂരിന്റെ’ ചലച്ചിത്രാവിഷ്കാരമാണ് ഈ ചിത്രം. പുനീത് കൃഷ്ണയുടെ രചനയിൽ ഗുർമീത് സിങ്ങാണ് സംവിധാനം ചെയ്തത്. തീയറ്ററുകളിലും ചിത്രം മികച്ച വിജയം നേടിയിരുന്നു.

ബത്ത – നെറ്റ്ഫ്ലിക്സ്

വിജയ് സേതുപതിയും സായ് പൃഥ്വിരാജും പ്രധാന കഥാപാത്രങ്ങളായെത്തുന്ന ചിത്രമാണ് ‘ബത്ത’. ബാലാജി തരണീധരനാണ് സംവിധാനം. പ്രശസ്ത സംവിധായകൻ ആറ്റ്‌ലി അവതരിപ്പിക്കുന്ന ചിത്രം പ്രിയ ആറ്റ്‌ലിയും മുറാദ് ഖേതാനിയും ചേർന്നാണ് നിർമിച്ചത്. സായ് അഭ്യങ്കർ സംഗീതം ഒരുക്കുന്നു. ശെൽവകുമാർ എസ്കെ ഛായാഗ്രഹണവും ടി മുത്തുരാജ് പ്രൊഡക്ഷൻ ഡിസൈനും നിർവഹിക്കുന്നു. ലിജോമോളാണ് നായിക.