‌എം പത്മകുമാർ ഇനി ബോളിവുഡിൽ; ‘സൂര്യ’ ഫസ്റ്റ് ലുക്ക്‌ പുറത്ത്, സണ്ണി ഡിയോൾ നായകൻ

കൊച്ചി: 'ജോസഫ്' ഉൾപ്പെടെ മലയാള സിനിമയിൽ നിരവധി ശ്രദ്ധേയ ചിത്രങ്ങളൊരുക്കിയ സംവിധായകൻ എം പത്മകുമാർ ഇനി ബോളിവുഡിലേക്ക്. എം പത്മകുമാറിൻ്റെ സംവിധാനത്തിൽ ഒരുങ്ങുന്ന ആദ്യ ബോളിവുഡ് സിനിമയായ “സൂര്യ”യിൽ സൂപ്പർതാരം സണ്ണി ഡിയോൾ നായകനാകുന്നു. രവി കിഷൻ, ടിനു ആനന്ദ്, മനീഷ് വാധ്വാ, ജിഷു സെൻഗുപ്ത, രോഹിത് തിവാരി, ഖാലിദ് സിദ്ധിക്കി, അനൂപ് ത്രിവേദി എന്നിവരും ചിത്രത്തിൽ അണിനിരക്കുന്നു.

ജയ്പൂർ, ഉദയ്പൂർ, മുംബൈ എന്നിവിടങ്ങളിൽ വെച്ച് ചിത്രീകരണം പൂർത്തിയായ ചിത്രത്തിൻ്റെ ഫസ്റ്റ് ലുക്ക് മോഷൻ പോസ്റ്റർ ഇന്ന് സണ്ണി ഡിയോളിൻ്റെ ഫേസ്ബുക്ക് പേജിലൂടെ പുറത്തിറങ്ങി. പ്രഗ്യാ ജയ്സ്വാൾ, തനുശ്രി ചക്രവർത്തി എന്നിവരാണ് മറ്റ് കേന്ദ്ര കഥാപാത്രങ്ങളെ അവതരിപ്പിക്കുന്നത്. ചിത്രം നവംബർ 20ന് ലോകമെമ്പാടുമുള്ള തിയേറ്ററുകളിൽ പ്രദർശനത്തിനെത്തും.

എംഎം മൂവീസിൻ്റെ ബാനറിൽ കമൽ മുക്കൂട്ട് അവതരിപ്പിക്കുന്ന ‘സൂര്യ’യുടെ ഛായാഗ്രഹണം ശ്രദ്ധേയ ബോളിവുഡ് ഛായാഗ്രാഹകനായ സന്തോഷ് തുണ്ടിയിലാണ് നിർവഹിക്കുന്നത്. എഡിറ്റിങ് ബല്ലു സലൂജയും നിർവ്വഹിക്കുന്നു. ജോസഫ്, ഓഫീസർ ഓൺ ഡ്യൂട്ടി, നായാട്ട് എന്നീ സൂപ്പർ ഹിറ്റുകൾക്ക് തിരക്കഥ രചിച്ച ഷാഹി കബീർ ആണ് ചിത്രത്തിൻറെ കഥ ഒരുക്കിയിരിക്കുന്നത്.

കരൺ റസ്ദാൻ, നീരജ് പാഠക്, മായങ്ക് ശർമ്മ എന്നിവർ ചേർന്നാണ് തിരക്കഥ ഒരുക്കിയത്. ഉത്തം സിങ്,രഞ്ജിൻ രാജ് എന്നിവർ ഗാനങ്ങൾ ഒരുക്കുന്ന ചിത്രത്തിന് പശ്ചാത്തല സംഗീതം നൽകുന്നത് ഉത്തം സിങ് ആണ്. ഒരു അഭിനേതാവ് എന്ന നിലയിൽ സണ്ണി ഡിയോളിൻ്റെ കരിയറിലെ ഏറ്റവും മികച്ച പ്രകടനമാണ് ഈ സിനിമയുടെ ഹൈലൈറ്റ് എന്ന് അണിയറ പ്രവർത്തകർ പറയുന്നു. പിആ‍‍‍‍‍‍‍‍‍‍‍‍ർഒ: ആതിര ദിൽജിത്ത്.