മധ്യപ്രദേശിലെ കൂട്ടക്കൊലക്കേസ്: മൂന്ന് വർഷമായി ഒളിവിലായിരുന്ന പ്രതി പിടിയിൽ

അഹമ്മദാബാദ്: മധ്യപ്രദേശിലെ മൊറേനയിൽ ഭൂമി തർക്കത്തെത്തുടർന്ന് ആറ് പേർ കൊല്ലപ്പെട്ട കൂട്ടക്കൊലക്കേസിൽ മൂന്ന് വർഷത്തിലേറെയായി ഒളിവിലായിരുന്ന പ്രതി പിടിയിൽ.

രാമുസിങ് ധീരാസിങ് തോമറിനെ (37) അഹമ്മദാബാദ് ക്രൈംബ്രാഞ്ച് ഹരിയാനയിലെ ഗുഡ്ഗാവിൽനിന്ന് അറസ്റ്റ് ചെയ്തു. പ്രതിയെക്കുറിച്ച് വിവരം നൽകുന്നവർക്ക് പൊലീസ് പാരിതോഷികം പ്രഖ്യാപിച്ചിരുന്നു.

ഗുഡ്ഗാവിലെ ഗോപാൽപുർ ജിഐഡിസി മേഖലയിലെ വെയർഹൗസിൽനിന്നാണ് ഇയാളെ പിടികൂടിയത്. തിരിച്ചറിയൽ മറച്ചുവെച്ച് മഹാരാഷ്ട്ര, ഗുജറാത്ത്, രാജസ്ഥാൻ, ഹരിയാന എന്നിവിടങ്ങളിൽ സുരക്ഷാ ജീവനക്കാരനായും കൂലിത്തൊഴിലാളിയായും ജോലി ചെയ്ത് ഒളിവിൽ കഴിയുകയായിരുന്നുവെന്ന് പൊലീസ് അറിയിച്ചു.

2023 മേയിൽ മൊറേനയിലെ ലേപ ഗ്രാമത്തിലാണ് കേസിനാസ്പദമായ സംഭവം. ദീർഘകാലമായി നിലനിന്ന ഭൂമി തർക്കത്തെത്തുടർന്നുള്ള വൈരാഗ്യമാണ് കൂട്ടക്കൊലയിലേക്ക് നയിച്ചതെന്നാണ് പൊലീസ് പറയുന്നത്. ഒരു കുടുംബത്തിലെ വിവാഹാഘോഷത്തിനിടെ എതിർവിഭാഗം വെടിയുതിർത്തതായും മൂന്ന് സ്ത്രീകൾ ഉൾപ്പെടെ ആറ് പേർ കൊല്ലപ്പെട്ടതായും കേസിലുണ്ട്.

2013-ൽ ഇതേ ഭൂമി തർക്കവുമായി ബന്ധപ്പെട്ട് പ്രതിയുടെ രണ്ട് ബന്ധുക്കൾ കൊല്ലപ്പെട്ടിരുന്നു. ഇതിന് പ്രതികാരമായാണ് 2023-ലെ ആക്രമണം നടത്തിയതെന്നാണ് പൊലീസിന്റെ ആരോപണം. സംഭവത്തിൽ ഒമ്പത് പേർക്കെതിരെ കേസെടുത്തിരുന്നു. പ്രത്യേക അന്വേഷണസംഘം നിരവധി പ്രതികളെ നേരത്തേ അറസ്റ്റ് ചെയ്തെങ്കിലും തോമർ ഒളിവിൽ തുടരുകയായിരുന്നു.

ദേശീയ തലസ്ഥാന മേഖലയിലെ ഇയാളുടെ സാന്നിധ്യത്തെക്കുറിച്ച് ലഭിച്ച രഹസ്യവിവരത്തിന്റെ അടിസ്ഥാനത്തിലാണ് അഹമ്മദാബാദ് ക്രൈംബ്രാഞ്ച് അന്വേഷണം നടത്തി പ്രതിയെ പിടികൂടിയത്. ഭിന്ദ് ജില്ലയിലെ ഗോർമി പൊലീസ് സ്റ്റേഷനിൽ ഇയാൾക്കെതിരെ വധശ്രമക്കേസും നിലവിലുണ്ട്. തുടർനിയമനടപടികൾക്കായി പ്രതിയെ മധ്യപ്രദേശ് പൊലീസിന് കൈമാറാനുള്ള നടപടികൾ ആരംഭിച്ചു.