ചുവന്ന മണ്ണ്‌ കാക്കാൻ ഷിമ

ചെറുകുന്ന്
‘‘വീടിന്റെ അകത്തളത്തിൽ നിസ്സഹായരായവരെപോലും ചേർത്തുപിടിച്ച് മാസം ആയിരം രൂപ പെൻഷൻ പ്രഖ്യാപിച്ച പാർടിക്കല്ലാണ്ട് വേറെ ആർക്ക് വോട്ട് ചെയ്യാനാ. അമ്മക്കും അച്ഛനും ആരെയും ആശ്രയിക്കാതെ സ്വന്തം കാര്യം നോക്കാൻ അവർക്കും കൊടുത്തു 2000 രൂപ. ഇങ്ങനെയൊക്കെ നമ്മളെ സഹായിക്കുന്ന സർക്കാരിനേം പാർടിക്കാരേം മറക്കാൻ പറ്റോ’’– ചെറുകുന്നിലെ സുമതിയുടെ വാക്കുകൾക്ക് സംരക്ഷണമൊരുങ്ങിയതിന്റെ ആത്മവിശ്വാസം. ഏഴോത്തെ തൊഴിലുറപ്പ് തൊഴിലാളികൾക്കും പറയാനുള്ളത് ജീവിതവിജയം സമ്മാനിച്ച ഇടതുപക്ഷത്തെക്കുറിച്ചുമാത്രം. ഞങ്ങളുടെയും വീട്ടുകാരുടെയും ബന്ധുക്കളുടെയും വോട്ട് മോൾക്കുതന്നെ കെ ശാരദയും പി വി നാരായണിയും എൻ ലളിതയും എൻ വി ശാന്തയും കെ ശാന്തയും ഉൾപ്പെടുന്ന തൊഴിലുറപ്പ് തൊഴിലാളികളും ഒരേപോലെ പിന്തുണക്കുന്ന കാര്യം. ജില്ലാ പഞ്ചായത്ത് ചെറുകുന്ന് ഡിവിഷൻ എൽഡിഎഫ് സ്ഥാനാർഥി എം വി ഷിമ എത്തുമെന്നറിഞ്ഞ് കാത്തുനിന്ന തൊഴിലാളികൾ, സ്ഥാനാർഥി എത്തിയതോടെ ഏറെ സന്തോഷത്തോടെ ചേർത്തുപിടിച്ചു. കുശലം പറഞ്ഞു, സെൽഫിയെടുത്തു. കുടുംബാംഗത്തെയെന്നപോലെ ക്ഷേമാന്വേഷണവുമായി ഏറെ നേരം ചെലവഴിച്ചു. യുവജന, മഹിളാ, വിദ്യാർഥി പ്രസ്ഥാനങ്ങളെ മുന്നിൽനിന്ന് നയിച്ച കരുത്തുമായാണ് ഷിമ തദ്ദേശ തെരഞ്ഞെടുപ്പിൽ കന്നിയങ്കത്തിനിറങ്ങിയത്. ചെറുകുന്ന്, കണ്ണപുരം, പട്ടുവം, ഏഴോം പഞ്ചായത്തിലെ വ്യാപാര വാണിജ്യ വ്യവസായ സ്ഥാപനങ്ങളും മുൻകാല പ്രവർത്തകരെയും നേതാക്കളെയും ഉൾപ്പെടെ സന്ദർശിച്ചു. വിവിധ കൺവൻഷനുകളിലും സ്ഥാപനങ്ങളിലും എത്തി വോട്ടർമാരെ കണ്ട് വോട്ട് അഭ്യർഥിച്ചാണ് ഒന്നാംഘട്ട പര്യടനം പൂർത്തിയാക്കിയത്. ജനനംകൊണ്ട് മട്ടന്നൂർകാരിയാണെങ്കിലും ഏഴോത്തിന്റെ മരുമകളായെത്തിയ ഷിമയിന്ന് നാടിന്റെ പ്രിയപ്പെട്ട മകളാണ്. എല്ലാവരുമായും നിറപുഞ്ചിരിയോടെ ഇടപെടുന്ന സ്നേഹ സമ്പന്ന. ജന മനസിൽ നിറസാന്നിധ്യമായ സ്ഥാനാർഥിയിലൂടെ ചെറുകുന്ന് ഡിവിഷൻ ചരിത്ര ഭൂരിപക്ഷം നേടുമെന്നുറപ്പ്. ഇടതുപക്ഷത്തിന്റെ ഉരുക്കുകോട്ടയായ കണ്ണപുരം, പട്ടുവം, ഏഴോം പഞ്ചായത്തുകളാണ് ഡിവിഷനിലുള്ളത്. കണ്ണപുരവും പട്ടുവവും പൂർണമായും ചെറുകുന്നിന്റെ 12 വാർഡും ഏഴോത്തെ ഒമ്പതു വാർഡുകളും ഉൾപ്പെടെ അമ്പത് വാർഡുകൾ ഡിവിഷനിൽ ഉൾപ്പെടും.