ഹാപ്പിനസ് ഇരട്ടിയാക്കാൻ ഭാവന സ്റ്റുഡിയോസ്; 'മെനി മെനി ഹാപ്പി റിട്ടേൺസി'ന്റെ വിതരണാവകാശം സ്വന്തമാക്കി

കൊച്ചി: അഹമ്മദ് കബീർ സംവിധാനം ചെയ്യുന്ന പുതിയ ചിത്രം 'മെനി മെനി ഹാപ്പി റിട്ടേൺസി'ന്റെ വിതരണാവകാശം സ്വന്തമാക്കി ഭാവന സ്റ്റുഡിയോസ്. ഫഹദ് ഫാസിൽ, ശ്യാം പുഷ്‌ക്കരൻ, ദിലീഷ് പോത്തൻ എന്നിവരുടെ ഉടമസ്ഥതയിലുള്ള ഭാവന റിലീസ് 'ബത്‌ലഹേം കുടുംബയൂണിറ്റിൻ്റെ' വൻ വിജയത്തിനു ശേഷമാണ് ഈ ചിത്രത്തിന്റെ ഭാഗമാകുന്നത്. 'ജൂൺ', 'മധുരം' എന്നീ സിനിമകൾക്കും 'കേരള ക്രൈം ഫയൽസ്' എന്ന ഹിറ്റ് പരമ്പരയ്ക്കും ശേഷമാണ് അഹമ്മദ് കബീർ ഈ ചിത്രം ഒരുക്കുന്നത്.

ഒരിടവേളയ്ക്ക് ശേഷം കാളിദാസ് ജയറാം മലയാളത്തിൽ നായകനായി തിരിച്ചെത്തുന്ന ചിത്രമാണ് മെനി മെനി ഹാപ്പി റിട്ടേൺസ്. നൊസ്റ്റാൾജിയ ഉണർത്തുന്ന ഒരു റോം-കോം ചിത്രമായാണ് അണിയറയിലൊരുങ്ങുന്നത്. പുതുമുഖമായ ലക്ഷ്മി ജ്യോതിഷാണ് ചിത്രത്തിലെ നായിക. കാളിദാസിൻ്റെ അച്ഛൻ കഥാപാത്രമായി ലാൽ ശ്രദ്ധേയ വേഷം കൈകാര്യം ചെയ്യുന്നു.

മങ്കി ബിസിനസിന്‍റെ ബാനറിൽ ഹസ്സൻ റഷീദും അഹമ്മദ് കബീറും ചേർന്നാണ് ചിത്രം നിർമ്മിച്ചിരിക്കുന്നത്. '96', 'സോളോ', 'മെയ്യഴകൻ' തുടങ്ങിയ ചിത്രങ്ങളിലൂടെ പ്രശസ്തനായ ഗോവിന്ദ് വസന്തയാണ് ചിത്രത്തിലെ ഗാനങ്ങൾക്ക് സംഗീതം നൽകുന്നത്. 'ആട്ടം' എന്ന സിനിമയിലൂടെ മികച്ച എഡിറ്റിങ്ങിനുള്ള ദേശീയ പുരസ്‌കാരം നേടിയ മഹേഷ് ഭുവനേന്ദാണ് ചിത്രസംയോജനം നിർവ്വഹിക്കുന്നത്.

അഹമ്മദ് കബീർ ചിത്രങ്ങളുടെ മനോഹര ഫ്രെയിമുകൾ സമ്മാനിച്ച ജിതിൻ സ്റ്റാനിസ്ലാവസ് തന്നെയാണ് ഈ ചിത്രത്തിന്റെയും ഛായാഗ്രഹണം നിർവ്വഹിക്കുന്നത്. അഹമ്മദ് കബീർ - ജിതിൻ സ്റ്റാനിസ്ലാവസ് കൂട്ടുകെട്ട് വീണ്ടും ഒന്നിക്കുമ്പോൾ ദൃശ്യപരമായി ഏറെ മികച്ചുനിൽക്കുന്ന ഒരു സിനിമാനുഭവം പ്രേക്ഷകർക്ക് പ്രതീക്ഷിക്കാം.

കോ-പ്രൊഡ്യൂസേഴ്സ്: പൗലോസ് തേപ്പാല, വിനീത കോശി, ഓഡിയോഗ്രാഫി: വിഷ്ണു ഗോവിന്ദ്, പ്രൊഡക്ഷൻ ഡിസൈനർ: ശരത് കുമാർ കെ വി, പ്രൊഡക്ഷൻ കൺട്രോളർ: ഷാഫി ചെമ്മാട്, കോസ്റ്റ്യൂം: മഷർ ഹംസ, മേക്കപ്പ്: റോണക്സ് സേവ്യർ, ലിറിക്സ്: വിനായക് ശശികുമാർ, കളറിസ്റ്റ്: ശ്രീക് വാര്യർ, വി എഫ് എക്സ്: ഡിജിബ്രിക്‌സ്, സ്റ്റിൽസ്: അർജുൻ തോമസ്, പബ്ലിസിറ്റി ഡിസൈൻ: റോസ്റ്റഡ് പെപ്പർ, വിഷ്വൽ പ്രൊമോഷൻസ്: സ്‌നേക്ക്പ്ലാൻ്റ് എൽഎൽപി, പിആർഒ: അപർണ ഗിരീഷ്.