വികസനം നടന്നടുത്തു

കരിവെള്ളൂർ

ജില്ലയുടെ വടക്കേ അറ്റത്ത് സ്ഥിതി ചെയ്യുന്ന കരിവെള്ളൂർ–പെരളം പഞ്ചായത്തിൽ വികസനം നടപ്പാതവെട്ടി നടന്നടുക്കുകയാണ്‌. തരിശിട്ട 12 ഹെക്ടർ നെൽപ്പാടം കൃഷിയോഗ്യമാക്കിയതുമുതൽ പലിയേരിക്കൊവ്വൽ –- വടക്കെ മണക്കാട് നടപ്പാത വിനോദസഞ്ചാര കേന്ദ്രമാക്കി വികസിപ്പിച്ചതുവരെ പദ്ധതികൾ നീളുന്നു. കുണിയൻ പാടശേഖരത്തിൽ ഉപ്പുവെള്ളം കയറുന്നത് തടയാൻ ടി ഐ മധുസൂദനൻ എംഎൽഎയുടെ പദ്ധതിയിൽ ഉൾപ്പെടുത്തി 75 ലക്ഷം രൂപ ചെലവിൽ ബണ്ട് നിർമാണം തുടങ്ങി. കേരഗ്രാമം പദ്ധതിയിൽ ജൈവവളം, രാസവളം, കുമ്മായം, കീടനാശിനി, തെങ്ങുകയറ്റ യന്ത്രങ്ങൾ, പമ്പുസെറ്റ്, ഇടവിളക്കിറ്റ് തുടങ്ങിയവ വിതരണംചെയ്തു. പുത്തൂർ ആയുർവേദ ആശുപത്രിയുടെ അടിസ്ഥാന സൗകര്യംകൂട്ടി. മാലിന്യ നിർമാർജനത്തിന്‌ എംസിഎഫും 28 മിനി എംസിഎഫും സ്ഥാപിച്ചു. ഹരിതകർമ സേനക്ക് മാലിന്യം ശേഖരിക്കാൻ ഇ– വാഹനവും ഓരോ വാർഡിലും ട്രോളിയും അനുവദിച്ചു. പട്ടികജാതി മേഖലയിൽ വർഷം 17 ലക്ഷം രൂപ ചെലവഴിച്ച് പദ്ധതികൾ തയ്യാറാക്കി. 31 പട്ടികജാതി കുടുംബങ്ങൾക്ക് വീടുനൽകി. തൊഴിൽ പരിശീലനത്തിനായി നൈപുണി വികസനകേന്ദ്രവും സ്ഥാപിച്ചു. 1.86 ലക്ഷം രൂപ ചെലവഴിച്ച് പഞ്ചായത്തിന് സ്വന്തമായി കളിസ്ഥലത്തിനായുള്ള സ്ഥലം ഏറ്റെടുത്തു. മുഴുവൻ വാർഡുകളിലും ഗ്രന്ഥാലയങ്ങൾ തുടങ്ങി.

പുരസ്കാരങ്ങൾ

* രണ്ടുതവണ സംസ്ഥാന സർക്കാരിന്റെ ശിശുസൗഹൃദ പഞ്ചായത്ത് പുരസ്കാരം

* 2022–-23 ലെ ഗൗരവ് ഗ്രാമസഭ പുരസ്കാരം

* സ്വരാജ് ട്രോഫി ജില്ലയിൽ ഒന്നും രണ്ടും സ്ഥാനം നേടി

* ലൈഫ് ഭവന പദ്ധതിയിൽ മികച്ച പ്രവർത്തനത്തിനുള്ള 
 അംഗീകാരം

* ആയുർവേദ ആശുപത്രിക്ക് എൻഎബിഎച്ച്എം അംഗീകാരം

കൂട്ടായ്മയുടെ കരുത്ത്

കരിവെള്ളൂരിന്റെ മണ്ണിൽ സാമൂഹ്യനീതിയും തുല്യതയും നിലനിർത്തി വികസന, സേവന, ഉൽപാദന മേഖലകളിൽ നിരവധി പദ്ധതികൾ നടപ്പാക്കി. എംഎൽഎയുടെയും വിവിധ സ്ഥാപനങ്ങളുടെയും സഹായത്തിൽ നവകേരള സൃഷ്ടിയിൽ കരിവെള്ളൂരിനെ കൃത്യമായി അടയാളപ്പെടുത്തി. കൂട്ടായ പ്രവർത്തനങ്ങളിലൂടെ നിരവധി പുരസ്കാരങ്ങൾ നേടാൻ സാധിച്ചു.

എ വി ലേജു, പ്രസിഡന്റ് കരിവെള്ളൂർ –-പെരളം പഞ്ചായത്ത്

അഭിമാന വർഷങ്ങൾ

പഞ്ചായത്തിന്റെ സമഗ്ര വികസനം ലക്ഷ്യമാക്കിയാണ്‌ പ്രവർത്തനങ്ങൾ ആസൂത്രണം ചെയ്‌തത്‌. ലൈഫിൽ 161 പേർക്ക് വീട്‌ നിർമിച്ചു. മുഴുവൻ വാർഡിലും പൊതുറോഡുകളിൽ വൈദ്യുതി വിളക്കുകൾ സ്ഥാപിച്ചു. മാലിന്യ സംസ്കരണത്തിനായി വിവിധ പദ്ധതികൾ നടപ്പാക്കി. ആദ്യമായി കരിവെള്ളൂർ ഫെസ്‌റ്റും സംഘടിപ്പിച്ചു.

ടി ഗോപാലൻ, വൈസ് പ്രസിഡന്റ്