കരുതലായി കണ്ണപുരം

കണ്ണപുരം

സമഗ്രവികസനവും സമ്പുഷ്ട ജീവിതസാഹചര്യവുമൊരുക്കിയാണ് കണ്ണപുരം പഞ്ചായത്തിന്റെ ജൈത്രയാത്ര. നാട്ടുകാരുടെ ആരോഗ്യവും പരിസ്ഥിതി സംരക്ഷണവും കാർഷിക സ്വയംപര്യാപ്തയും ഉറപ്പാക്കി. സർവതലസ്പർശിയായ വികസനപദ്ധതി രൂപപെടുത്തി. ഉത്തരവാദിത്വങ്ങൾ നിറവേറ്റി മുന്നേറുന്നതോടൊപ്പം വൈവിധ്യവൽക്കരണത്തിന്റെ മികച്ച മാതൃകയും തീർത്തു. ജനങ്ങളുടെ ആരോഗ്യസുരക്ഷ ഉറപ്പാക്കി നടപ്പാക്കിയ ‘കാൻസർമുക്ത ഗ്രാമം’ പദ്ധതി ലോക ശ്രദ്ധ നേടി. കാർബൺ ന്യൂട്രൽ നടപ്പാക്കി ശുദ്ധവായ ലഭിക്കുന്ന നിരവധി പച്ചത്തുരുത്തുകളും ഒരുക്കി. കാർഷികമേഖലയെ സ്വയംപര്യാപ്തതയിലേക്ക് നയിച്ചു. പച്ചത്തുരുത്തുകളിലൂടെ 
ജീവവായു 2017ല്‍ പരിസ്ഥിതി ദിനത്തിലാണ്‌ കണ്ണപുരം പഞ്ചായത്തില്‍ പച്ചത്തുരുത്ത് പദ്ധതി ആരംഭിച്ചത്‌. ശുദ്ധവായുവിനായി ദീർഘകാല പദ്ധതികളാണ് ആവിഷ്‌കരിച്ചത്. സംസ്ഥാന–ജില്ലാതലങ്ങളിൽ അത്‌ അംഗീകരിക്കപ്പെട്ടു. പ്രയാങ്കോട്ടത്തെ പച്ചത്തുരുത്തിന്‌ സംസ്ഥാനത്ത് രണ്ടാംസ്ഥാനവും ജില്ലയിൽ ഒന്നാം സ്ഥാനവും ലഭിച്ചിരുന്നു. മൂന്ന് ഏക്കറിൽ 49 ഇനങ്ങളിലുള 889 മരങ്ങൾ നട്ടു, ടാഗ് ചെയ്തു. പ്രയാങ്കോട്ടം ശിവക്ഷേത്ര സമിതിയുടെ ഉടമസ്ഥതയിലുള്ള മൂന്ന് ഏക്കര്‍ സ്ഥലത്ത് മഹാഗണി, തേക്ക്, കുമുദ് വൃക്ഷങ്ങള്‍ക്കൊപ്പം കൂവളം, വേപ്പ് പോലുള്ള ഔഷധച്ചെടികളും മാവ്, പ്ലാവ്, സപ്പോട്ട, പേര തുടങ്ങിയ മൂവായിരത്തോളം ഫലവൃക്ഷങ്ങളുമാണ് നട്ടത്. ജില്ലയിൽ ആദ്യമായി കാർബൺ ഓഡിറ്റ് നടത്തിയ പച്ചത്തുരുത്ത്‌ കണ്ണപുരത്തിന്റേതാണ്. മികച്ച ഏഴ് പച്ചത്തുരുത്തുകൾ ഒരുക്കി. പുഞ്ചവയലിലുള്ള കണ്ണപുരം പ്രാഥമിക ആരോഗ്യ കേന്ദ്രത്തിന് സമീപം പഞ്ചായത്തിന്റെ ഉടമസ്ഥതയിലുള്ള 20 സെന്റ് സ്ഥലത്താണ് രണ്ടാമത്തെ പച്ചത്തുരുത്ത്. പ്ലാവ്, മാവ്, പേര, നെല്ലി, കശുമാവ്, അമേരിക്കന്‍ ആപ്പിള്‍, ചായ മന്‍സ, സീതപ്പഴം തുടങ്ങിയ ഫലവൃക്ഷത്തൈകളാണ് നട്ടത്. മണ്ണൊലിപ്പ് തടയാൻ രണ്ട് തട്ടുകളായാണ് തൈ നട്ടത്. ചെടികളുടെ പരിചരണവും തുടര്‍സംരക്ഷണവും തൊഴിലുറപ്പ് പദ്ധതിയില്‍ ഉള്‍പ്പെടുത്തി ഉറപ്പാക്കി. ‘നാടന്‍ മാവ് ഗ്രാമം’ പദ്ധതിയിലൂടെ വംശനാശം നേരിടുന്ന നാടന്‍ മാവുകളുടെ ഗ്രാഫ്റ്റ്ചെയ്ത തൈകളും നട്ടു. മഴവെള്ള സംഭരണത്തിന്‌ മഴക്കുഴികള്‍ സ്ഥാപിച്ചു. പച്ചത്തുരുത്ത് നിര്‍മിച്ചതിലൂടെ പ്രദേശത്തെ ജലദൗര്‍ലഭ്യം പരിഹരിക്കപ്പെട്ടു എന്നതും വലിയ നേട്ടമായി. ​കാർഷിക മേഖലയ്‌ക്കും ഊർജം കാർഷികരംഗത്ത് 35 പദ്ധതികളാണ് നടപ്പാക്കിയത്. അയ്യോത്ത് വയൽ ഉൾപ്പടെ നൂറ് കണക്കിന് ഏക്കറുകൾ തരിശുരഹിതമാക്കി. കർഷകസഭ രൂപീകരിച്ചു. ഉപ്പുവെള്ളപ്രതിരോധവും ശക്തമാക്കി. വിസിബികൾ നിർമിച്ചു. ആധുനിക കൃഷിരീതി അവലംബിച്ച്‌ തണ്ണിമത്തൻ കൃഷി വ്യാപിപ്പിച്ചു. കാർഷികകർമസേനയുടെ പ്രവർത്തനം ഫലപ്രദമാക്കി. പച്ചക്കറിക്കൃഷിയിൽ സ്വയംപര്യാപതയായി. മറ്റുപഞ്ചായത്തുകളിലേക്ക് പച്ചക്കറികൾ വിപണനം നടത്തി. സൂര്യകാന്തിക്കൃഷി വ്യാപിപ്പിക്കാൻ കർമപദ്ധതിയായി. എഴര ഏക്കറിൽ കുറുന്തോട്ടിക്കൃഷിയും നടത്തി. ഒപ്പം ഭക്ഷ്യസ്വയംപര്യാപ്ത ലക്ഷ്യമാക്കി സമഗ്രപദ്ധതികളും. ​കാൻസറിനെതിരെ ജാഗ്രത കാൻസറിനെതിരെ കണ്ണപുരത്തിന്റെ നിതാന്ത ജാഗ്രതയ്‌ക്ക്‌ ലോകാരോഗ്യസംഘടനയുടെ ഉൾപ്പെടെ പ്രശംസനേടാനായി. ‘കാൻസർ മുക്ത ഗ്രാമം പദ്ധതിയാണ്‌ ലോകശ്രദ്ധ നേടിയത്. മുൻ ഭരണസമിതികൾ ആവിഷ്‌കരിച്ച പദ്ധതി തുടർപ്രക്രിയയിലൂടെ യാഥാർത്ഥ്യമാക്കുകയായിരുന്നു. ആരോഗ്യരംഗം കരുത്തുറ്റതാക്കാനുള്ളതായിരുന്നു ഇടപെടലുകൾ. പാലിയേറ്റീവ് കെയർ, അതിഥിത്തൊഴിലാളികൾക്ക് ബോധവൽക്കരണം, ഉൾപ്പടെ നിരന്തരമായി നടത്തി. രണ്ട് തവണ ആർദ്രം പദ്ധതി പുരസ്കാരം നേടി. ​മാലിന്യമുക്തം 
ഹരിതകാന്തിയിലൂടെ സംസ്ഥാനത്തെ ആദ്യ ഹരിത റെയിൽവേസ്‌റ്റേഷനാക്കി കണ്ണപുരം റെയിവേസ്റ്റേഷനെ മാറ്റി. മാലിന്യനിർമാർജനത്തിനായി വ്യത്യസ്ത പദ്ധതികൾ, ഇതിലൂടെ നിരവധിപേർക്ക് വരുമാനവും ഉറപ്പാക്കി. പഴന്തുണികൊണ്ടുള്ള പൂച്ചട്ടി നിർമാണം. തുണിസഞ്ചി നിർമാണം എൽഇഡി ബൾബ് റിപ്പയർ യൂണിറ്റ്, ചകിരിച്ചോറ് കമ്പോസ്റ്റ് നിർമാണം, കാറ്ററിങ് സർവീസ്, കെട്ടിടങ്ങൾ ശുചിയാക്കൽ എന്നിങ്ങനെ വിവിധപ്രവർത്തനങ്ങൾ സജീവമായി നടക്കുന്നു. ​83 പേർക്ക് വീടൊരുക്കി ലൈഫ് പദ്ധതിയിലൂടെ 83 പേർക്ക് വീട് നൽകി. നാല് വീടുകളുടെ നിർമാണം അന്തിമഘട്ടത്തിലാണ്. 32 കുടുംബങ്ങൾക്കായുള്ള ഫ്ലാറ്റ് സമുച്ചയവും ഒരുങ്ങുന്നു. സർവേയിലൂടെ 62 അതിദരിദ്രരെ കണ്ടെത്തി ആവശ്യമായ അതിജീവന മൈക്രോപ്ലാൻ തയ്യാറാക്കി അതിദാരിദ്ര്യമുക്തരാക്കി.