മൃഗങ്ങളിൽ 
പേവിഷബാധ വർധിക്കുന്നു

കണ്ണൂർ

മുൻകാലങ്ങളെ അപേക്ഷിച്ച്‌ മൃഗങ്ങളിൽ പേവിഷബാധ വർധിക്കുന്നതായി മൃഗസംരക്ഷണ വകുപ്പിന്‌ കീഴിലെ കണ്ണൂർ റീജണൽ ഡിസീസ് ഡയഗ്നോസ്‌റ്റിക്‌ ലാബിന്റെ കണക്കുകൾ. 2024 –25 വർഷം പേവിഷ ബാധ സംശയത്തിൽ പരിശോധിച്ച 62 സാമ്പിളുകളിൽ 38 എണ്ണവും പോസിറ്റീവാണ്‌. കണ്ണൂർ നഗരത്തിൽ കഴിഞ്ഞ രണ്ടുദിവസംമാത്രം എഴുപതോളം പേർക്കാണ് തെരുവുനായയുടെ കടിയേറ്റത്. ഇതോടൊപ്പം പയ്യാമ്പലത്ത് തെരുവുനായയുടെ ആക്രമണത്തിന് ഇരയായ അ‍ഞ്ചുവയസുകാരന് പേവിഷബാധ സ്ഥിരീകരിച്ചതോടെ ആശങ്ക ഇരട്ടിയായി. പേവിഷബാധ നിർണയം: കണ്ണൂർ റീജണൽ ഡിസീസ് ഡയഗ്നോസ്‌റ്റിക്‌ ലബോറട്ടറി സജ്ജം 2019 മുതൽ വടക്കൻ കേരളത്തിൽ പേവിഷബാധ സംശയിക്കുന്ന മൃഗങ്ങളുടെ സാമ്പിളുകൾ പരിശോധിച്ച് പേവിഷബാധ നിർണയം നടത്തുന്നത് കണ്ണൂർ റീജണൽ ഡിസീസ് ഡയഗ്നോസ്‌റ്റിക്‌ ലാബിലാണ്‌. 2024 ഏപ്രിൽ മുതൽ 2025 മാർച്ചുവരെയുള്ള കാലയളവിൽ പരിശോധിച്ച സാമ്പിളുകൾ 38 എണ്ണം പോസിറ്റീവായിരുന്നു. ഇതിൽ 27 എണ്ണം തെരുവുനായകളുടെതായിരുന്നു. പശുക്കളുടെ 3 സാമ്പിളുകൾ പരിശോധിച്ചതിൽ ഒരെണ്ണം പോസിറ്റീവാണ്‌. 2023 – 2024 വർഷത്തിൽ 94 സാമ്പിൾ പരിശോധിച്ചു. ഇതിൽ 56 എണ്ണം തെരുവുനായകളുടേതായിരുന്നു. 28 സാമ്പിളുകൾ പോസിറ്റീവായി. ഒരു കുറുക്കന്റെ പരിശോധനാഫലവും പോസിറ്റീവായിരുന്നു. ഈ വർഷം മെയ് വരെയുള്ള 9 ‌സാമ്പിളുകൾ പരിശോധിച്ചതിൽ മൂന്നെണ്ണം പോസിറ്റീവാണ്‌. പേവിഷബാധയേറ്റ്‌ ചാവുന്ന മൃഗങ്ങളെ ജില്ലാ വെറ്ററിനറി ആശുപത്രിയിൽ പോസ്റ്റുമോർട്ടം നടത്തി തലച്ചോറിൽനിന്ന് ശേഖരിക്കുന്ന സാമ്പിളുകളാണ് ലാബിലേക്ക്‌ അയക്കുന്നത്‌. മൂന്ന് മണിക്കൂർകൊണ്ട് പരിശോധനാ ഫലം ലഭ്യമാകും. 400 രൂപയാണ് പരിശോധനയ്ക്കായി ഈടാക്കുന്നത്. 10 ജീവനക്കാർ പ്രവർത്തിക്കുന്നുണ്ട്. ഡെപ്യൂട്ടി ഡയറക്ടർ ഇൻചാർജ് ഡോ. പി കെ പത്മരാജിനാണ്‌ ലാബിന്റെ ചുമതല. കടിയേറ്റാൽ എത്രയും വേഗം കുത്തിവയ്‌പ്പ് എടുക്കണം തെരുവുനായ, വളർത്തുമൃഗങ്ങൾ എന്നിവയിൽനിന്ന് കടിയോ പോറലോ ഏറ്റാൽ അടിയന്തരമായി വൈദ്യപരിശോധനയ്ക്ക് വിധേയനായി കുത്തിവയ്‌പ്പ് എടുക്കണം. കടിയേറ്റ ഉടൻ സോപ്പ് ഉപയോഗിച്ച് പൈപ്പ് വെള്ളത്തിൽ കഴുകണം. മുറിവിൽ കലർന്ന വൈറസുകൾ വ്യാപിക്കുന്നത് തടയാൻ ഇതിലൂടെ സാധിക്കും. പേവിഷബാധ പ്രതിരോധം വാക്സിനേഷനിലൂടെയേ സാധ്യമാവൂ. 0, 3, 7, 28 ദിവസങ്ങളിൽ മുഴുവൻ ഡോസ് വാക്സിനും കൃത്യമായി എടുക്കണം.