‘തിരുവോണം’

അഴീക്കോട്

എല്ലാവർക്കും കലർപ്പില്ലാത്ത ശുദ്ധമായ പച്ചക്കറികളാണ്‌ ‘തിരുവോണ’ക്കാലം ഉറപ്പാക്കുന്നത്‌. അതിനായി അഴീക്കോട്‌ ചാൽ കളത്തിൽക്കാവിന് സമീപത്തെ വിശാലമായ വയലിൽ 15 വർഷമായി വിഷരഹിത പച്ചക്കറി ‘തിരുവോണം’ വനിതാ കർഷക കൂട്ടായ്‌മ വിളയിക്കുന്നു. കാർഷിക മേഖലയുടെ പുനരുജ്ജീവനത്തെ അടയാളപ്പെടുത്തുകയാണ് ഇവർ. മണ്ണിൽ പൊന്നുവിളയിച്ച്‌ കാർഷിക സംസ്കൃതി തിരിച്ചുപിടിക്കുകയും രോഗം ക്ഷണിച്ചുവരുത്തുന്ന വിഷമയമായ ഭക്ഷ്യവസ്തുക്കളുടെ ഉപയോഗത്തെ തടയാൻ ജൈവ പച്ചക്കറി ഉൽപ്പാദിപ്പിക്കുകയും ലക്ഷ്യമിട്ട്‌ 2010ൽ പാടം പാട്ടത്തിനെടുത്താണ് കൂട്ടായ്‌മ കൃഷി തുടങ്ങിയത്. ചീര, വെള്ളരി, മത്തൻ, പടവലം, വെണ്ട, തക്കാളി, വഴുതന, കക്കിരി, തലോലിക്ക, പയർ, ചെറുപയർ എന്നിവയാണ് പ്രധാന വിളകൾ. തണ്ണിമത്തനും അഞ്ചര ഏക്കറിൽ നെൽകൃഷിയുമുണ്ട്‌. വിവിധ കുടുംബശ്രീ അയൽക്കൂട്ടങ്ങളിലെ അംഗങ്ങളായ ബീനകുമാരി, യു ഷീബ, എം ടി പ്രജാത, കെ രമ്യ, കെ ദീപ എന്നിവരാണ്‌ നേതൃത്വം. രാവിലെ ആറുമുതൽ ഒമ്പതുവരെയും വൈകിട്ട് നാലുമതൽ ആറുവരെയുമാണ്‌ പരിപാലനം. പരമ്പരാഗതമായി ഉൽപ്പാദിപ്പിക്കുന്നതും കൃഷിഭവൻ മുഖേന കിട്ടുന്ന വിത്തുകളുമാണ് ഉപയോഗിക്കുന്നത്. കോവിഡിൽ പച്ചക്കറികൾ പ്രദേശത്ത് സൗജന്യമായും വിതരണംചെയ്തിരുന്നു. കണ്ണൂർ മാർക്കറ്റിലും കുടുംബശ്രീ ആഴ്ചച്ചന്തകളിലും കൃഷിസ്ഥലത്തും ബുധൻ, വ്യാഴം, വെള്ളി, ശനി ദിവസങ്ങളിൽ കർഷകരുടെ വീടുകൾ കേന്ദ്രീകരിച്ചും വിൽപ്പനയും നടത്തുന്നു.