ഇളകില്ല അഴീക്കോട്‌

അഴീക്കോട്

അലയാഴിയും അഴിമുഖവും പുഴയോരവുമെല്ലാം അതിരിട്ടൊരുക്കിയ വശ്യസുന്ദരവും ഹരിതാഭവുമായ തീരഭൂമിയാണ് അഴീക്കോട്. തീരദേശ വിഭവങ്ങളാലും കാർഷിക വിളകളാലും സമൃദ്ധമായ പ്രദേശം. വാഗ്ഭടാനന്ദഗുരു മുതൽ സുകുമാർ അഴീക്കോടുവരെ നീളുന്ന അഭിമാന നവോത്ഥാന പൈതൃകങ്ങൾ അഴീക്കോടിന് സ്വന്തമാണ്. ജില്ലാ പഞ്ചായത്ത്‌ അഴീക്കോട് ഡിവിഷൻ എന്നും ഇടതുപക്ഷത്തിനൊപ്പം ഉറച്ചുനിന്നതാണ് ചരിത്രം. അഴീക്കോട്, ചിറക്കൽ, വളപട്ടണം പഞ്ചായത്തുകളിലെ 62 വാർഡുകൾ ഉൾപ്പെടുന്നതാണ് ഡിവിഷൻ. നിലവിൽ 23 വാർഡുകളിൽ 16 വാർഡും നേടി ചിറക്കൽ പഞ്ചായത്തും 23 വാർഡിൽ 16 വാർഡും നേടി അഴീക്കോട് പഞ്ചായത്തും എൽഡിഎഫ് ഭരിക്കുന്നു. വളപട്ടണം പഞ്ചായത്തിൽ ലീഗാണ് ഭരിക്കുന്നത്. കണ്ണൂർ ബ്ലോക്ക് പഞ്ചായത്തിലെ അഴീക്കൽ, വൻകുളത്തുവയൽ, തെക്കുഭാഗം, വളപട്ടണം, ചിറക്കൽ, അലവിൽ ഡിവിഷനുകൾ ഉൾപ്പെടുന്നതാണ് ജില്ലാ പഞ്ചായത്ത് അഴീക്കോട് ഡിവിഷൻ. കെ വി സുമേഷ് എംഎൽഎയുടെ നേതൃത്വത്തിൽ നടപ്പാക്കിയ വികസന പ്രവർത്തനങ്ങൾ, പഞ്ചായത്തുകളിലെ സമഗ്ര മുന്നേറ്റം എന്നിവ ജനസമക്ഷം എൽഡിഎഫ് അവതരിപ്പിക്കുമ്പോൾ വൻ സ്വീകാര്യതയാണ് ലഭിക്കുന്നത്. സിപിഐ എമ്മിലെ കെ വി ഷക്കീലാണ് അഴീക്കോട് ഡിവിഷൻ സ്ഥാനാർഥി. സിപിഐ എം വളപട്ടണം ലോക്കൽ സെക്രട്ടറി, ഡിവൈഎഫ്ഐ കണ്ണൂർ ബ്ലോക്ക് വൈസ് പ്രസിഡന്റ്, കണ്ണൂർ ബ്ലോക്ക് പഞ്ചായത്ത് അംഗം എന്നീ നിലകളിൽ നാട്ടുകാർക്ക്‌ സുപരിചിതനാണ്‌ ഷക്കീൽ. സിഎംപിക്കാണ്‌ യുഡിഎഫ്‌ ഇ‍ൗ സീറ്റ്‌ നൽകിയത്‌. സംസ്ഥാന സെക്രട്ടറിയറ്റംഗം സുധീഷ് കടന്നപ്പള്ളിയാണ് സ്ഥാനാർഥി. സി കെ സുരേഷ് വർമയാണ് ബിജെപി സ്ഥാനാർഥി.