മാറ്റത്തിന്​ കാതോർത്ത്​ 
പേരാവൂർ

പേരാവൂർ

മുൻകാലങ്ങളിലെ കൈത്തെറ്റ്​ തിരുത്താനൊരുങ്ങുകയാണ്​ ​പേരാവൂർ ജില്ലാ പഞ്ചായത്ത്​ ഡിവിഷൻ. വലതിൽനിന്ന്​ ഇടതോരം ചേരാൻ വെമ്പൽകൊള്ളുകയാണ്​ പേരാവൂരിന്റെ മനസ്സ്​. ഇവിടെ ഇത്തവണ വിജയക്കൊടി പാറിക്കാനുള്ള കഠിനശ്രമത്തിലാണ്​ എൽഡിഎഫ്​ സ്ഥാനാർഥി നവ്യ സുരേഷ്​. ജില്ലയിൽ ഏറ്റവും കൂടുതൽ ബ്ലോക്ക് ഡിവിഷനുകൾ ഉൾപ്പെട്ട ജില്ലാ പഞ്ചായത്ത് ഡിവിഷനാണ്​ പേരാവൂർ. ഇരിട്ടി ബ്ലോക്കിലെ കീഴ്പ്പള്ളി, വെളിമാനം, ആലയാട്, തില്ലങ്കേരി, പേരാവൂർ ബ്ലോക്കിലെ പാലപ്പുഴ, പേരാവൂർ, മാലൂർ, മുഴക്കുന്ന്, കാക്കയങ്ങാട് എന്നീ ഒമ്പത് ബ്ലോക്ക് ഡിവിഷനുകളാണ്​ ഇതിൽ ഉൾപ്പെടുന്നത്​. 2010-ൽ കൊട്ടിയൂർ ഡിവിഷൻ വിഭജിച്ച് പേരാവൂർ ഡിവിഷൻ രൂപവൽക്കരിച്ചത് മുതൽ കോൺഗ്രസ്‌ മാത്രം വിജയിച്ച ചരിത്രം തിരുത്താനാണ്​ എൽഡിഎഫ്​ ശ്രമം. ഇത്തവണ പേരാവൂരിൽ മാറ്റത്തിന്റെ കാറ്റ്​ വീശി തുടങ്ങിയിട്ടുണ്ട്​. ഡിവിഷൻ വിഭജിച്ചതോടെ കൊട്ടിയൂർ, കേളകം, കണിച്ചാർ പഞ്ചായത്തുകൾ ഉൾപ്പെടുന്ന ബ്ലോക്ക് ഡിവിഷനുകൾ ഇതിൽനിന്ന്​ ഒഴിവായിട്ടുണ്ട്​. പകരം, ആലയാട്, മാലൂർ, മുഴക്കുന്ന്, കാക്കയങ്ങാട് ബ്ലോക്ക് ഡിവിഷനുകൾ കൂട്ടിച്ചേർത്തു. നിലവിൽ പേരാവൂർ ജില്ലാ ഡിവിഷനിലുൾപ്പെടുന്ന ആറളം, തില്ലങ്കേരി, മുഴക്കുന്ന്, പേരാവൂർ, മാലൂർ പഞ്ചായത്തുകൾ എൽഡിഎഫാണ് ഭരിക്കുന്നത്​. വികസനകാര്യത്തിൽ ജില്ലാ പഞ്ചായത്ത്​ മാതൃകയായി വളരുമ്പോഴും അതിനൊപ്പം സഞ്ചരിക്കാൻ പേരാവൂർ ഡിവിഷന്​ കഴിഞ്ഞ കാലങ്ങളിൽ കഴിഞ്ഞിരുന്നില്ല. അതുകൊണ്ടുതന്നെ തെരഞ്ഞെടുപ്പിൽ വികസനം ചർച്ചയാകുമ്പോൾ മറുപടി നൽകാനാകാതെ യുഡിഎഫ്​ വിയർക്കുകയാണ്​. എസ്എഫ്‌ഐ നേതാവ് നവ്യ സുരേഷിനെ രംഗത്തിറക്കിയാണ്​ എൽഡിഎഫ്​ ഡിവിഷനിൽ കനത്ത പോരാട്ടം നടത്തുന്നത്​. നാടുനീളെ ലഭിക്കുന്ന സ്വീകാര്യത നവ്യ സുരേഷിന്​ മുതൽക്കൂട്ടാകുകയാണ്​. എസ്എഫ്‌ഐ പേരാവൂർ ഏരിയാ ജോ.സെക്രട്ടറിയും ഡിവൈഎഫ്‌ഐ പേരാവൂർ സൗത്ത്മേഖലാ വൈസ് പ്രസിഡന്റുമാണ്. സജിത മോഹനനാണ്‌ യുഡിഎഫ്‌ സ്ഥാനാർഥി. ലതികാ സുരേഷാണ്‌ ബിജെപി സ്ഥാനാർഥി.