കൊലക്കേസ്‌ 
പ്രതിക്കുപിന്നാലെ ഒറ്റുകാരനും
ബിജെപി സ്ഥാനാർഥി

Deshabhimani - ദേശാഭിമാനി ദിനപ്പത്രം
avatar
സ്വന്തം ലേഖകൻ

Published on Nov 29, 2025, 02:45 AM | 1 min read

തലശേരി: മത്സ്യത്തൊഴിലാളിയായ കോടിയേരി പുന്നോലിലെ ഹരിദാസൻ വധക്കേസ്‌ പ്രതിക്കൊപ്പം ഒത്താശചെയ്‌ത ഒറ്റുകാരനും ബിജെപി സ്ഥാനാർഥി. ഹരിദാസൻ വധക്കേസിലെ മുഖ്യപ്രതി കെ ലിജേഷാണ്‌ നങ്ങാറത്ത്‌പീടിക വാർഡിലെ ബിജെപി സ്ഥാനാർഥി. ഇതിനുപിന്നാലെ കേസിലെ മറ്റൊരു പ്രതി സുനേഷ്‌ സുരേഷ്‌ബാബുവിനെ ഗോപാലപ്പേട്ട വാർഡിലെയും സ്ഥാനാർഥിയാക്കി. മത്സ്യബന്ധനംകഴിഞ്ഞ്‌ ഹരിദാസൻ ഹാർബറിൽ തിരിച്ചെത്തിയത്‌ ലിജേഷിനെ അറിയിച്ചത്‌ സുനേഷാണ്‌.


ഒന്നിച്ച്‌ ജോലിചെയ്യുന്ന തൊഴിലാളിയെയാണ്‌ ഇയാൾ കൊലയാളിസംഘത്തിന്‌ ഒറ്റുകൊടുത്തത്‌. ജനരോഷത്തെത്തുടർന്ന്‌ ഇയാൾക്ക്‌ മാസങ്ങളോളം നാട്ടിലിറങ്ങാൻ സാധിച്ചിരുന്നില്ല. സ്ഥാനാർഥിവേഷംകെട്ടിച്ച്‌ ഒടുവിൽ ഗോപാലപ്പേട്ടയിൽ ഇറക്കുകയായിരുന്നു. ഇതേവരെ പ്രചാരണം ആരംഭിക്കാത്തതും സംശയാസ്‌പദമാണ്‌.


നിലവിലുള്ള ക‍ൗൺസിലർ ജിഷ ജയചന്ദ്രനാണ്‌ എൽഡിഎഫ്‌ സ്ഥാനാർഥി. മുസ്ലിംലീഗ്‌ സ്ഥാനാർഥിയും മത്സരരംഗത്തുണ്ട്‌. കൊലക്കേസ്‌ പ്രതികളായ രണ്ടുപേരെ സ്ഥാനാർഥികളാക്കി ഇറക്കിയതോടെ ഹരിദാസൻ വധം തീരദേശത്ത്‌ വീണ്ടും സജീവചർച്ചയാവുകയാണ്‌. കൊമ്മൽവയൽ, നങ്ങാറത്ത്‌പീടിക, തലായി, ഗോപാലപ്പേട്ട തുടങ്ങിയ വാർഡുകളിൽ ഹരിദാസൻ വധവും പ്രതികളും ജനകീയ വിചാരണ നേരിടുന്നു.


മുൻ നഗരസഭാ ക‍ൗൺസിലർ പി രാജേഷിനെയും കുടുംബത്തെയും വെട്ടിക്കൊല്ലാൻ ശ്രമിച്ച കേസിലെ പ്രതി പ്രശാന്ത്‌ കൊമ്മൽവയലിലും ബിജെപിക്കായി മത്സരിക്കുന്നുണ്ട്‌. ഇവിടെയും ബിജെപി കടുത്ത എതിർപ്പാണ്‌ നേരിടുന്നത്‌. കൊലയാളികൾ കൂട്ടത്തോടെ ബിജെപിക്കായി ജനവിധിതേടുന്പോഴും മാധ്യമങ്ങൾ പലതും കണ്ണടക്കുകയാണ്‌. ​


വ്യാജവീഡിയോ കേസ്‌: 
ശിക്ഷ ഏറ്റുപറഞ്ഞ്‌ 
ലീഗ്‌ സ്ഥാനാർഥി ​ന്യൂമാഹി ​സിപിഐ എം നേതാവ്‌ കെ കെ ശൈലജക്കെതിരായ വ്യാജ വീഡിയോ കേസിൽ ശിക്ഷിക്കപ്പെട്ടത്‌ ഏറ്റുപറഞ്ഞ്‌ പെരിങ്ങാടി ഗേറ്റ്‌ ഏഴാംവാർഡ്‌ മുസ്ലിംലീഗ്‌ സ്ഥാനാർഥി ടി എച്ച്‌ അസ്ലം. നാമനിർദേശ പത്രികയ്‌ക്കൊപ്പം സമർപ്പിച്ച സത്യവാങ്‌മൂലത്തിലാണ്‌ വ്യാജവീഡിയോ പ്രചരിപ്പിച്ച കേസിൽ വിവിധ വകുപ്പുകൾ പ്രകാരം തലശേരി ജുഡീഷ്യൽ ഒന്നാംക്ലാസ്‌ മജിസ്‌ട്രേട്ട്‌ പിഴയടക്കാൻ ശിക്ഷിച്ച കാര്യം ഏറ്റുപറഞ്ഞത്‌. വ്യാജ വീഡിയോ കേസിൽ മുസ്ലിംലീഗിന്‌ ബന്ധമില്ലെന്ന്‌ ആവർത്തിക്കുന്പോഴാണ്‌ നേതാവിന്റെ കുറ്റസമ്മതം.



deshabhimani section

Related News

View More
0 comments
Sort by

Deshabhimani

Subscribe to our newsletter

Quick Links


Home