കുഞ്ഞിനെ കണ്ട്‌ 
പോയതാണ്‌, പിന്നെ......

കണ്ണൂർ

‘‘ഇളയമകൾ ജനിച്ച്‌ മൂന്നാംദിവസമാണ്‌ അറസ്‌റ്റിലായെന്ന്‌ അറിയുന്നത്‌. കുട്ടിക്ക്‌ കുപ്പായവും സോപ്പും വാങ്ങിത്തന്ന്‌ മറ്റന്നാൾ വരുമെന്നുപറഞ്ഞാണ്‌ പോയത്‌. മകൾക്ക്‌ സുഖമില്ലാതെ ആശുപത്രിയിലായിട്ടും വിട്ടില്ല’’–- അരനൂറ്റാണ്ട് കഴിഞ്ഞിട്ടും അണ്ടത്തോടിലെ റാബിയയുമ്മയുടെ കണ്ണീർ തോർന്നിട്ടില്ല. അർധഫാസിസ്‌റ്റ്‌ ഭരണകൂട ഭീകരത ജയിലറയ്‌ക്കുള്ളിൽ എൻ അബ്ദുള്ളയുടെ ജീവനെടുത്തപ്പോൾ അനാഥമായത് ഒരു കുടുംബമായിരുന്നു. ഏഴും അഞ്ചരയും മൂന്നും വയസ്സുള്ള മക്കളെയും ഒരു കൈക്കുഞ്ഞിനെയും ചേർത്തുപിടിച്ച് ഭർത്താവിനായി കാത്തിരുന്ന ദിവസങ്ങൾ അമ്പതുവർഷത്തിനിപ്പുറവും റാബിയക്ക്‌ മറക്കാനാവില്ല. സിപിഐ എമ്മിന്റെയും സിഐടിയുവിന്റെയും നേതാവായിരുന്നു എൻ അബ്ദുള്ള. മിസ ചുമത്തി എൻ അബ്ദുള്ളയെ 1975 സെപ്തംബർ അവസാനം പൊലീസ് അറസ്റ്റ് ചെയ്തു. ഇളയ മകൾ ഷാഹിന ജനിച്ചിട്ട് മൂന്നുദിവസം കഴിഞ്ഞിട്ടേ ഉണ്ടായിരുന്നുള്ളു. രണ്ടുദിവസം കഴിഞ്ഞ്‌ വരുമെന്ന് പറഞ്ഞുപോയ അബ്ദുള്ളയെ കാത്തിരുന്ന റാബിയ അറിയുന്നത് ഭർത്താവിനെ പൊലീസ് അറസ്റ്റ് ചെയ്തെന്ന വാർത്തയാണ്. ഒന്നുകൊണ്ടും വിഷമിക്കരുത്. പെരുന്നാൾ നന്നായി ആഘോഷിക്കണം. ഞാൻ ഇല്ലാത്ത വിഷമം കുട്ടികളെ അറിയിക്കരുതെന്നുള്ള അബ്ദുള്ളയുടെ കത്താണ് പിന്നീട് റാബിയയെ തേടിയെത്തിയത്. ജയിലിൽപോയി കണ്ടപ്പോഴേക്കെ ആശ്വാസം പകർന്ന് അബ്ദുള്ള റാബിയയെ തിരിച്ചയച്ചു. ഒമ്പതരമാസത്തെ ജയിൽവാസത്തിനിടയിൽ ഇളയമ്മ മരിച്ചിട്ടും മകൾക്ക് അസുഖം ബാധിച്ച് ആശുപത്രിയിൽ പ്രവേശിപ്പിച്ചപ്പോഴും പരോൾ അനുവദിച്ചില്ല. രോഗബാധിതനായിട്ടും മനുഷ്യത്വം മരവിച്ച ഭരണകൂടം പരോൾ നിഷേധിച്ചു. അറസ്റ്റ് ചെയ്യുമ്പോൾ ആരോഗ്യവനായിരുന്ന അബ്ദുള്ളയെ ജയിലിലെ ജീവിതം രോഗിയാക്കി. ആരോഗ്യനില വഷളായിട്ടും വിദഗ്‌ധ ചികിത്സ നൽകിയില്ല. രോഗം മൂർച്ഛിച്ചപ്പോഴാണ് ജില്ലാ ആശുപത്രിയിലെ പ്രിസണേഴ്സ് വാർഡിലേക്ക് മാറ്റിയത്. മരിക്കുന്നതിന്റെ തലേ ദിവസം ആശുപത്രിയിൽ ഭാര്യയും മക്കളും കാണാനെത്തിയപ്പോൾ പൊലീസ് ആദ്യം അനുവാദം നൽകിയില്ല. വൈകിട്ട് അകത്തേക്കുകയറ്റി. ഒന്നുകൊണ്ടും വിഷമിക്കേണ്ട. നിങ്ങളെ പാർടി നോക്കുമെന്ന് പറഞ്ഞാണ് റാബിയയെയും മക്കളെയും അബ്ദുള്ള തിരിച്ചയച്ചത്. 1976 ജൂലായ് 16ന് ജില്ലാ ആശുപത്രിയിൽവച്ചാണ് എൻ അബ്ദുള്ള മരിച്ചത്. അടിയന്തരാവസ്ഥയിൽ മനുഷ്യത്വം മരവിച്ച ഭരണകൂടം ചികിത്സ വൈകിപ്പിച്ച് എൻ അബ്ദുള്ളയെ കൊലപ്പെടുത്തുകയായിരുന്നു. മൃതദേഹം വിട്ടുനൽകണമെന്നും സമാധാനപരമായ സംസ്‌കാരച്ചടങ്ങിന് അവസരമൊരുക്കണമെന്നും ലോക്‌സഭയിലെ പ്രതിപക്ഷ നേതാവ് എ കെ ജി ആവശ്യപ്പെട്ടെങ്കിലും മൃതദേഹം കാണാൻ എത്തിയവരെയും മൗനജാഥ നടത്തിയവരെയും പൊലീസ് തല്ലിച്ചതച്ചു. വിലാപയാത്ര നടത്തിയതിന് വലിയന്നൂരിലും ചൊവ്വയിലും 13 പേരെ പൊലീസ് അറസ്റ്റ് ചെയ്തു.