ഭൂരിപക്ഷം കൂട്ടാൻ പിണറായി

പിണറായി

കേരളത്തിന്റെ നവോത്ഥാന ചരിത്രം അടയാളപ്പെടുത്തിയ വിപ്ലവഭൂമിയാണ് പിണറായി. കേരളത്തിലെ കമ്യൂണിസ്റ്റ് മുന്നേറ്റത്തിന് വഴിവിളക്കായ പാറപ്രം സമ്മേളനം നടന്നത് പിണറായി പാറപ്രത്താണ്. കമ്യൂണിസ്റ്റ് നേതാവും പാർലമെന്റേറിയനുമായിരുന്ന എൻ ഇ ബാലറാം, കേരള മുഖ്യമന്ത്രി പിണറായി വിജയൻ തുടങ്ങി ഒട്ടേറെ പ്രഗത്ഭരുടെ നിരയുണ്ട് പിണറായിക്ക് അഭിമാനിക്കാൻ. ഇടതുപക്ഷത്തിന് എന്നും കരുത്തേകിയ പ്രദേശങ്ങൾ ഉൾപ്പെടുന്നതാണ് ജില്ലാ പഞ്ചായത്ത് പിണറായി ഡിവിഷൻ. ഇവിടെ വിജയത്തേക്കാളുമുപരി വൻ ഭൂരിപക്ഷമാണ് എൽഡിഎഫ് പ്രതീക്ഷിക്കുന്നത്. പിണറായി, ധർമടം, മുഴപ്പിലങ്ങാട് പഞ്ചായത്തുകളിലെ 51 വാർഡുകൾ ഉൾപ്പെടുന്നതാണ് ഡിവിഷൻ. ആകെയുള്ള 19 വാർഡുകളിൽ മുഴുവനും നേടി പിണറായി പഞ്ചായത്തും 18 വാർഡുകളിൽ 13 ഉം നേടി ധർമ്മടവും 15 വാർഡിൽ ഏഴും നേടി മുഴപ്പിലങ്ങാട് പഞ്ചായത്തും എൽഡിഎഫ് ഭരിക്കുന്നു. തലശേരി ബ്ലോക്ക്‌ പഞ്ചായത്ത്‌ പരിധിയിലെ ധർമടം, കൂടക്കടവ്, മുഴപ്പിലങ്ങാട്, പാലയാട്, പിണറായി, പാറപ്രം മണ്ഡലങ്ങൾ ഉൾപ്പെടുന്നതാണ് ജില്ലാ പഞ്ചായത്ത് ഡിവിഷൻ. ആകെ 64512 വോട്ടർമാരുണ്ട്‌. നാട്ടുകാരൻകൂടിയായ മുഖ്യമന്ത്രി പിണറായി വിജയന്റെ ഇടപെടലിൽ വന്നിട്ടുള്ള വൻ പദ്ധതികളും സർവ മേഖലകളിലെ വികസനവും ത്രിതല പഞ്ചായത്തുകളുടെ നേതൃത്വത്തിൽ നടത്തിയ വികസന പ്രവർത്തനങ്ങളും ഉയർത്തിയാണ് എൽഡിഎഫ് വോട്ടുതേടുന്നത്. സിപിഐ എമ്മിലെ കെ അനുശ്രീയാണ് എൽഡിഎഫ് സ്ഥാനാർഥി. വിദ്യാർഥികളുടെ അവകാശ പോരാട്ടങ്ങളെ മുന്നിൽനിന്ന് നയിച്ച കരുത്തുമായാണ് അനുശ്രീ തദ്ദേശ തെരഞ്ഞെടുപ്പിൽ പോരാട്ടത്തിനിറങ്ങിയത്. സിപിഐ എം ജില്ലാ കമ്മിറ്റി അംഗവും ഡിവൈഎഫ്ഐ സംസ്ഥാന കമ്മിറ്റി അംഗവുമാണ്. ലോയേഴ്‌സ് കോൺഗ്രസ് സംസ്ഥാന സെക്രട്ടറി ജ്യോതി ജഗദീഷ് ആണ് യുഡി എഫ് സ്ഥാനാർഥി. മഹിളാ മോർച്ച സൗത്ത് ജില്ലാ സെക്രട്ടറി അഖില വിപിനാണ് ബിജെപി സ്ഥാനാർഥി.