കളിക്കളത്തിൽ മിന്നി ലൂർദ് ടീം

സംസ്ഥാന സ്റ്റുഡൻറ് നഴ്സസ് അസോസിയേഷൻ ഫുട്ബോൾ മത്സരത്തിൽ ചാമ്പ്യന്മാരായ ലൂർദ് നഴ്സിങ് കോളേജ് ടീം
നൗഷാദ് നടുവിൽ
Published on Jan 19, 2025, 11:59 PM | 1 min read
കണ്ണൂർ
പ്രൊഫഷണൽ കോഴ്സുകളുള്ള കോളേജിൽ ചേർന്നാൽ കളിക്കളത്തിലെ സ്വപ്നങ്ങൾ മാറ്റിവയ്ക്കണമെന്ന പൊതുധാരണയെ തിരുത്തുകയാണ് തളിപ്പറമ്പിലെ ലൂർദ് എഡ്യുക്കേഷൻ അക്കാദമി. പഠനത്തോടൊപ്പം കലാ കായിക മത്സരങ്ങളിലും കഴിവ് തെളിയിച്ച് സംസ്ഥാനതലത്തിൽ ചാമ്പ്യന്മാരായിരിക്കുകയാണ് ക്യാമ്പസിലെ കുട്ടികൾ. ബാഡ്മിന്റൺ, ഫുട്ബോൾ, ത്രോബോൾ എന്നിവയ്ക്ക് നിറഞ്ഞ പ്രോത്സാഹനമാണ് ക്യാമ്പസ് നൽകുന്നത്. ലൂർദ് നഴ്സിങ് കോളേജിലെ നാലാംവർഷ വിദ്യാർഥികളായ മരിയ ജോളി, ചിഞ്ചു മാർട്ടിൻ എന്നിവർ തുടർച്ചയായ വർഷങ്ങളിൽ ബാഡ്മിന്റണിൽ ദേശീയതലത്തിൽ മത്സരിച്ചപ്പോൾ അഭയ രാജേഷ് നയിക്കുന്ന ഫുട്ബോൾ ടീം തുടർച്ചയായ നാല് വർഷവും സ്റ്റുഡന്റ് നഴ്സസ് അസോസിയേഷൻ സംസ്ഥാനചാമ്പ്യന്മാരാണ്. പ്രഗത്ഭരായ പരിശീലകരെ ലൂർദ് അക്കാദമിയിലെത്തിച്ചാണ് പരിശീലനം നൽകുന്നത്. വിദ്യാർഥികളുടെ കായികക്ഷമത ഉയർത്താൻ കോളേജ് അധികൃതരുടെയും രക്ഷിതാക്കളുടെയും കൂട്ടായ്മയിൽ വിവിധ പരിപാടികളാണ് നടപ്പാക്കുന്നത്. പട്ടുവം ടർഫിൽ സംഘടിപ്പിച്ച ലൂർദ് ഇന്റർ കോളീജിയറ്റ് (ലിസ്റ്റ് ) ചലഞ്ചേഴ്സ് ലീഗ് ശ്രദ്ധനേടി. ലൂർദ് ഇൻസ്റ്റിറ്റ്യൂട്ട് ഓഫ് പാരാമെഡിക്കൽ സയൻസ് ചാമ്പ്യനും ലൂർദ് കോളേജ് ഓഫ് നഴ്സിങ് റണ്ണർ അപ്പുമായി. ഹയർസെക്കൻഡറി വിദ്യാലയങ്ങൾക്കായി സംഘടിപ്പിച്ച ഫുട്ബോൾ ടൂർണമെന്റിൽ ടാഗോർ ജിവിഎച്ച്എസ്എസ് ചാമ്പ്യനും തായിനേരി എസ്എബിടിഎം എച്ച്എസ്എസ് രണ്ടാം സ്ഥാനവും നേടി. ഇന്ത്യൻ ഫുട്ബോൾ താരം സി കെ വിനീത് മുഖ്യാതിഥിയായി പങ്കെടുത്ത പരിപാടിയും കാൽപ്പന്ത് കളിയുടെ ആവേശം വിദ്യാർഥികൾക്ക് പകർന്നു.








0 comments