ഉദിച്ചുയർന്ന്‌ ഉദയഗിരി

ആലക്കോട് പതിനാറ്‌ ആദിവാസി നഗറുള്ള പതിനാറര കിലോമീറ്റര്‍ കര്‍ണാടക–കേരളാ വനാതിര്‍ത്തി പങ്കിടുന്ന പഞ്ചായത്ത്. ജില്ലയിലെ ഏറ്റവും പിന്നാക്കം നില്‍ക്കുന്ന മലയോരകുടിയേറ്റ കര്‍ഷകരും ആദിവാസി പിന്നാക്ക ജനവിഭാഗങ്ങളും ഉള്‍പ്പെടുന്ന പഞ്ചായത്ത്. ഇ‍ൗ പരിമിതികളെയെല്ലാം അതിജീവിച്ച്‌ കഴിഞ്ഞ നാലര വര്‍ഷത്തെ പ്രവര്‍ത്തന മികവിൽ വികസന രംഗത്ത്‌ ഉദിച്ചുനില്‍ക്കുകയാണ് ഉദയഗിരി പഞ്ചായത്ത്‌. പച്ചക്കറിയിൽ സ്വയം പര്യാപ്തത, കേരഗ്രാമം, ക്ഷീരഗ്രാമം പദ്ധതികള്‍ ഒരേസമയത്ത് നടപ്പാക്കിയതിലെ വിജയം, കാര്‍ഷിക ചന്തകള്‍ക്കായി പുതിയ കെട്ടിടം, വന്യമൃഗ ശല്യം തടയാന്‍ 16.5 കിലോമീറ്റര്‍ നീളത്തിൽ സൗരോര്‍ജ തൂക്കുവേലി, പാല്‍, മുട്ട, മാംസം എന്നിവയിലെ സ്വയംപര്യാപ്തത തുടങ്ങിയവയും ഉദയഗിരിയെ മികവുറ്റതാക്കുന്നു. എല്ലാ വാര്‍ഡുകളിലും വായനശാല, കളിക്കളം പദ്ധതിയും നടപ്പാക്കി. വയോജനങ്ങൾക്കായി കലോത്സവങ്ങള്‍ തുടങ്ങി നിരവധി പദ്ധതികൾ നടപ്പാക്കിയതിന്റെ ഭാഗമായി സംസ്ഥാനത്തെ 20 വയോജന സൗഹൃദ പഞ്ചായത്തുകളില്‍ ഒന്നായി ഉദയഗിരി മാറി. ജില്ലയിലെ ഏറ്റവും വലിയ എംസിഎഫും ഉദയഗിരിയിലാണ്. ഹരിത കര്‍മസേന പ്രവര്‍ത്തനം മെച്ചപ്പെടുത്തിയതിലൂടെ 100 ശതമാനം യൂസര്‍ഫീ കലക്ഷന്‍ നേടാന്‍ സാധിച്ചു. മുഴുവന്‍ വിദ്യാഭ്യാസ സ്ഥാപനങ്ങളിലും പെന്‍ബൂത്ത്. കാര്‍ത്തികപുരം, മണക്കടവ്, ഉദയഗിരി ടൗണുകളുടെ സൗന്ദര്യ വല്‍ക്കരണം, 281 വ്യക്തികത ടോയ്‌ലറ്റുകള്‍ സ്ഥാപിക്കൽ എന്നിവയും നടപ്പാക്കി. എല്ലാ വീടുകളിലും കുടിവെള്ളമെത്തിക്കാൻ ജലജീവന്‍ മിഷന്റെ ഭാഗമായി 70 കോടിയുടെ പദ്ധതി ആസൂത്രണം ചെയ്തു. ഇതിനായി നാലിടത്ത് പഞ്ചായത്ത് സ്ഥലം വാങ്ങി. മുഴുവന്‍ ജലസ്രോതസ്സുകളും ശുചീകരിച്ച് ശുദ്ധജലം ഉറപ്പുവരുത്തി. 123 പഞ്ചായത്ത്‌ റോഡുകൾ 204 എണ്ണമായും വർധിപ്പിച്ചു. പുനരധിവാസ മേഖലയായ ചീക്കാട്, അപ്പര്‍ ചീക്കാട് എന്നിവ ഉള്‍പ്പടെ 16 ആദിവാസി നഗറുകളിലേക്കും ഗതാഗതസൗകര്യം ഒരുക്കി. മുഴുവന്‍ ഭൂവുടമകള്‍ക്കും പട്ടയം ലഭ്യമാക്കി. പിന്നാക്ക മേഖലയിലെ എല്ലാവർക്കും വീടും പണിതുനൽകി. ലൈ ഫ്‌, പിഎംഎവൈ ഭവന പദ്ധതിയിലൂടെ 34 വീടും നിർമിച്ചു. 1.69 കോടി രൂപ ചെലവിൽ മണക്കടവ് പിഎച്ച്സി കുടുംബാരോഗ്യ കേന്ദ്രമായി ഉയർത്തിയതും ഇക്കാലത്താണ്‌.