കളിക്കളത്തിൽ 
താരമാണ്‌ സാനിയ

അഴീക്കോട്

ആത്മവിശ്വാസവും നിശ്ചയദാർഢ്യവും കൈമുതലാക്കി കായികമേഖയിൽ അഴീക്കോട് സ്വദേശി സാനിയയുടെ കുതിപ്പ്. കരാട്ടെ, ജൂഡോ, റസ്‌ലിങ് തുടങ്ങി വിവിധ കായിക മേഖലകളിൽ കഴിവുതെളിയിച്ച സാനിയ തുടർച്ചയായ രണ്ടാംവർഷവും കണ്ണൂർ സർവകലാശാല ഇന്റർ യൂണിവേഴ്സിറ്റി റസ്‌ലിങ് ചാമ്പ്യൻഷിപ്പിൽ സ്വർണംനേടി നാടിന്റെ അഭിമാനമായി. 2023ൽ മുണ്ടയാട് ഇൻഡോർ സ്റ്റേഡിയത്തിൽ നടന്ന ഇന്റർ യൂണിവേഴ്സിറ്റി റസ്‌ലിങ് ചാമ്പ്യൻഷിപ്പിൽ പരിക്കുകളോടെയാണ് സാനിയ മത്സരത്തിന് ഇറങ്ങിയത്. എന്നാൽ വിജയത്തിന്‌ പരിക്ക്‌ തടസമായില്ല. 2024ൽ നടന്ന കണ്ണൂർ സർവകലാശാല ഇന്റർ യൂണിവേഴ്സിറ്റി റസ്‌ലിങ് ചാമ്പ്യൻഷിപ്പിൽകൂടി സ്വർണംനേട്ടം ആവർത്തിച്ച് സാനിയ കൈയടി നേടി. പള്ളിക്കുന്ന് എകെ ഫിറ്റനസ് സെൻററിലും സെൻറ് മൈക്കിൾസ് സ്കൂളിലുമായാണ് പരിശീലനം. പത്താംതരത്തിൽ പഠിക്കുമ്പോൾ ജൂഡോയിൽ ജില്ലാതലത്തിൽ സ്വർണമെഡൽ നേടിട്ടുണ്ട്. ആറാംക്ലാസ് മുതൽ കരാട്ടെ പരിശീലനം നേടിയിരുന്നു. പിന്നീട് ജൂഡോയും യൂണിവേഴ്സിറ്റി തലത്തിൽ എത്തിയപ്പോൾ റസ്‌ലിങ്ങിലും സാനിയ ശ്രദ്ധ കേന്ദ്രീകരിച്ചു. എസ്എൻ കോളേജിലെ ബിഎ ഇംഗ്ലീഷ് അവസാനവർഷ വിദ്യാർഥിയാണ് അഴീക്കോട് നീർക്കടവ് സ്വദേശിയായ സാനിയ. അച്ഛൻ എം സുജിത്തും അമ്മ ടി പി രമ്യയും മികച്ച പിന്തുണയുമായി കൂടെയുണ്ട്‌. ഡിവൈഎഫ്ഐ സംഘടിപ്പിച്ച അനുമോദനത്തിൽ കെ വി സുമേഷ് എംഎൽഎ ഉപഹാരം നൽകി.