കഥ പറഞ്ഞും നൃത്തമാടിയും കഥാകേളി

പയ്യന്നൂർ

കഥാപ്രസംഗ കലയുടെ നൂറാം വർഷത്തിൽ കഥാകേളി എന്ന നൂതനാശയം ശ്രദ്ധേയമാകുന്നു. കാഥികൻ കഥപറയുകയും കഥയ്ക്ക് അനുയോജ്യമായ നാടൻപാട്ടുകളുടെ അകമ്പടിയോടെ നൃത്തംചെയ്യുന്ന നർത്തകിമാരും ഇടയ്ക്ക് നുറങ്ങുവിദ്യകളുമായി വിദൂഷകനും രംഗത്തുവരുന്നതാണ് കഥാകേളി. കഥാപ്രസംഗത്തിന്റെ തനതുരീതികളിൽനിന്ന്‌ വ്യത്യസ്‌മായ ഈ അവതരണം ശ്രദ്ധേയമാകുകയാണ്. കഥാപ്രസംഗരംഗത്ത് 36 വർഷമായി പ്രവർത്തിക്കുന്ന ബാബു കോടഞ്ചേരിയാണ് പുതിയ പരീക്ഷണത്തിന് തയ്യാറായത്. കഥാപ്രസംഗകലയെ കൂടുതൽ ജനകീയമാക്കാൻ ഇതിലൂടെ കഴിയുമെന്ന വിശ്വാസത്തിലാണ് കാഥികൻ. ജന്മി–-കുടിയാൻ കാലഘട്ടത്തിലെ ഒരു കഥാപാത്രം തെയ്യമായിത്തീരുന്ന പ്രമേയമാണ് ചിരുതത്തെയ്യം. തികച്ചും സാങ്കൽപിക തെയ്യമാണിത്. കേരളത്തിലിന്നുവരെ ആരും പരീക്ഷിക്കാത്ത രീതിയിലാണ് കഥാകേളി അവതരിപ്പിക്കുന്നത്. പ്രേമാനന്ദ് ചമ്പാടിന്റെ രചനയ്ക്ക് സുരഭി ഈയ്യക്കാട് സംവിധാനം ഒരുക്കിയിരിക്കുന്നു. ദീപാലംകൃതമായ വേദിയിൽ തെയ്യമായി വേഷമിടുന്നത് വിശാൽ അഭിയും നാടൻപാട്ടിന്റെ അകമ്പടിയിൽ ചടുല നൃത്തവുമായി അമ്പിളി ഷൈജു, മഹിതാ മനോജ്, അനന്യദാസ്, ശിഖാ ദാസ്, പ്രവീണ ഉമേഷ്, നയന എന്നിവരും രംഗത്തവതരിക്കുന്നു. വിദൂഷകനായി സുരഭി ഈയ്യക്കാട് വേഷമിടുന്നു. ചന്ദ്രൻ പണിക്കർ തങ്കയം, ജോയ് പിലാത്തറ എന്നിവർ പക്കമേളമൊരുക്കുന്നു. ദീപ നിയന്ത്രണം രൂപേഷ് ഉദിനൂരും പാടുന്നത് സദൻ കവ്വായിയുമാണ്. ഇന്ത്യൻ നാവിക അക്കാദി ഏഴിമല കേന്ദ്രത്തിൽ എംഇഎസിൽ ജോലിചെയ്യുന്ന ബാബു കോടഞ്ചേരി പയ്യന്നൂർ കൊറ്റിയിലാണ് താമസം. നിരവധി വേദികളിൽ വ്യത്യസ്തമായ കഥകൾ അവതരിപ്പിച്ചു. വടക്കൻപാട്ടിന്റെ ഈണങ്ങളിൽതുടങ്ങി പത്തോളം കഥകൾ അവതരിപ്പിച്ചിട്ടുണ്ട്. സ്‌കൂളിൽ പഠിക്കുമ്പോൾ പ്രൊഫഷണൽ കഥാപ്രസംഗരംഗത്ത്‌ നിറഞ്ഞുനിന്നു. കഥാപ്രസംഗകലയെ നിലനിർത്താൻ തന്നാൽ കഴിയുന്ന പ്രവർത്തനങ്ങളിൽ ഏർപ്പെടുകയാണ് ബാബു കോടഞ്ചേരി.