കോട്ടയത്തിനുണ്ട്‌ ആരോഗ്യപ്പെരുമ

പിണറായി

‘‘ഡോക്ടറില്ല, കാണിച്ചാൽ തന്നെ മരുന്നില്ല. സർക്കാർ ആശുപത്രികളെക്കുറിച്ചൊന്നും ഇന്നിങ്ങനെ പറയാൻ കഴിയില്ല. കുടുംബാരോഗ്യകേന്ദ്രം കാര്യക്ഷമമായതോടെ രാവിലെ മുതൽ വൈകിട്ടുവരെ ഡോക്ടറുണ്ടാവും. മറ്റു സേവനങ്ങളും ലഭ്യമാണ്‌. മരുന്നിനും ക്ഷാമമില്ല. കോട്ടയം പഞ്ചായത്തിലെ കുടുംബാരോഗ്യകേന്ദ്രം ഏതൊരാൾക്കും ഇന്നൊരു ആശ്രയകേന്ദ്രമാണ്‌.’’ എരുവട്ടി പൂളബസാറിലെ ഇടത്തിൽ ഹൗസിൽ വി വിമലയുടെ വാക്കുകളിൽ നിറയുന്നത്‌ കരുതലിന്റെ സ്‌നേഹസ്‌പർശം. കോട്ടയം പഞ്ചായത്തിലെ ആരോഗ്യകേന്ദ്രങ്ങൾ സംസ്ഥാനത്തിന് മാതൃകയായ മികവിന്റെ കേന്ദ്രങ്ങളാണ്. പഞ്ചായത്തിനും ആരോഗ്യ സ്ഥാപനങ്ങൾക്കും ലഭിക്കുന്ന പുരസ്‌കാരങ്ങളും ചെറുതല്ല. ആരോഗ്യമേഖലയില്‍ മികച്ച പ്രകടനം കാഴ്ചവച്ച തദ്ദേശ സ്ഥാപനങ്ങള്‍ക്കുള്ള സര്‍ക്കാരിന്റെ ആര്‍ദ്രകേരളം പുരസ്കാരം തുടർച്ചയായ മൂന്നാം തവണയും കോട്ടയം നേടി. അലോപ്പതി, ആയുർവേദ, യുനാനി, ഹോമിയോ വിഭാഗങ്ങളിൽ പഞ്ചായത്ത് വികസന പദ്ധതിയിൽ ഉൾപ്പെടുത്തി നടത്തിയ മികച്ച പ്രവർത്തനങ്ങളാണ് പഞ്ചായത്തിനെ അവാർഡിന്‌ അർഹമാക്കിയത്. യുനാനി ചികിത്സയുള്ള ജില്ലയിലെ രണ്ട്‌ പഞ്ചായത്തുകളിൽ ഒന്നാണ് കോട്ടയം. മാലിന്യപരിപാലനത്തിന് 
മാതൃക ​സമ്പൂർണ മാലിന്യമുക്ത പഞ്ചായത്തായതിനാൽ മാലിന്യ പരിപാലനത്തിൽ മാതൃകാപരമായ പ്രവർത്തനമാണ്. ജില്ലയിൽ മാലിന്യമുക്തമായി പ്രഖ്യാപിച്ച ആദ്യ പഞ്ചായത്തുകളിൽ ഒന്നാണ്. നൂറു ചതുരശ്രമീറ്റർ വിസ്തീർണമുള്ള എംസിഎഫ് കെട്ടിടം നിർമിച്ചു. ജില്ലയിലെ ആദ്യത്തെ കണ്ടെയ്നർ എംസിഎഫ്, വാർഡുകളിൽ രണ്ടു വീതം മിനി എംസിഎഫും ഓരോന്ന് വീതം ബോട്ടിൽ ബൂത്തുകളും സ്ഥാപിച്ചു. പൊതുയിടങ്ങളിൽ മാലിന്യങ്ങൾ ശേഖരിക്കുന്നതിന്‌ വേസ്റ്റ് ബിന്നുകൾ നൽകി. മാലിന്യ സംസ്കരണം കാര്യക്ഷമമാക്കാൻ ഇലക്ട്രിക് വാഹനങ്ങൾ വാങ്ങി. 28 ഹരിത കർമ്മസേനാംഗങ്ങൾ ഹരിതമിത്രം ആപ്പ് ഉപയോഗിച്ച് വാതിൽപ്പടി ശേഖരണം നടത്തുന്നു. ​ബാല സൗഹൃദം കോട്ടയം ​ബാല സൗഹൃദമായി പ്രഖ്യാപിക്കപ്പെട്ട പഞ്ചായത്താണ്. സംസ്ഥാനത്ത് ആദ്യമായി വില്ലേജ് എഡ്യൂക്കേഷൻ രജിസ്റ്ററും തയ്യാറാക്കി. ജില്ലയിലാദ്യമായി കുട്ടികളുടെ ബജറ്റും കുട്ടികളുടെ വികസനരേഖയും പ്രസിദ്ധീകരിച്ചു. കുട്ടികൾക്കായി പത്തോളം നൂതന പ്രൊജക്ടുകൾ നടപ്പാക്കി. ഒരു വർഷം 35 പദ്ധതികൾ കുട്ടികൾക്കായി നടപ്പാക്കി. കുട്ടികളുടെ പാർക്ക്, ബേബി ഫ്രൻഡ്‌ലി ടോയ്‌ലറ്റുകൾ, സഞ്ചരിക്കുന്ന ബാല ലൈബ്രറി എന്നിവ നിർമിക്കുകയും ഫുട്ബോൾ, കരാട്ടെ, കളരി, യോഗാ പരിശീലനവും നൽകി. വയോജന സൗഹൃദമാക്കുന്നതിന്‌ അയൽക്കൂട്ടം, വാർഡ്, പഞ്ചായത്ത് തല ക്ലബ്ബുകൾ രൂപീകരിച്ചു. വയോജന ഗ്രാമസഭകളും വികസന സെമിനാറുകളും സംഘടിപ്പിച്ചു. 3214 വയോജനങ്ങളാണുള്ളത്. സർവേയിലൂടെ കണ്ടെത്തിയ വയോജനങ്ങൾക്ക് ഹെൽത്ത് കാർഡ് വിതരണംചെയ്തു. ഡിജിറ്റൽ സാക്ഷരതാ പരിശീലനവും ആരംഭിച്ചു. ​ ലൈഫ് ഭവന പദ്ധതി പ്രകാരം 46 കുടുംബങ്ങൾ പുതിയ വീട്ടിൽ താമസമാക്കി. 6 വീടുകളുടെ പണി നടക്കുന്നു. പഞ്ചായത്തിലെ മുഴുവൻ ഗ്രാമീണ റോഡുകളും ഗതാഗതയോഗ്യമാക്കുന്നതിനുള്ള പദ്ധതികൾ നടപ്പാക്കി. പുതിയ റോഡുകൾ നിർമിക്കുന്നതിനുള്ള പദ്ധതികളും ആസൂത്രണംചെയ്തു. കാർഷിക മേഖലയിൽ നാളികേര കൃഷി വികസനം, കുരുമുളക് കൃഷി വ്യാപനം, വാഴ കൃഷി, ഇടവിള കൃഷി, പച്ചക്കറി കൃഷി എന്നിവയ്ക്ക് പ്രാധാന്യം നൽകി. എല്ലാ വാർഡിലും കൃഷിക്കൂട്ടങ്ങൾ രൂപീകരിച്ചു. കുരുമുളക് ഗ്രാമം പദ്ധതി നടപ്പാക്കി. മൃഗസംരക്ഷണ മേഖലയിൽ കറവപ്പശു വിതരണം, ആട് വിതരണം, കോഴി വിതരണം എന്നിവ നടപ്പാക്കി.