നിശ്‌ചലം

കണ്ണൂർ

കേന്ദ്രസർക്കാരിന്റെ ജനദ്രോഹ കർഷകദ്രോഹ നയങ്ങൾക്കെതിരായ പണിമുടക്കിൽ പൂർണമനസോടെ പങ്കെടുത്ത്‌ ജില്ലയും. ആശുപത്രികളിലേക്കുള്ളവ ഒഴികെ സ്വകാര്യവാഹനങ്ങളൊന്നും നിരത്തിലിറക്കാതെ ജനങ്ങൾ പണിമുടക്കിൽ പങ്കാളികളായി. നഗര, ഗ്രാമ വ്യത്യാസമില്ലാതെ കടകൾ അടഞ്ഞുകിടന്നു. സർക്കാർ ഓഫീസുകളും സ്വകാര്യ സ്ഥാപനങ്ങളും പ്രവർത്തിച്ചില്ല. സ്‌കൂളുകളും കോളേജുകളും അടഞ്ഞുകിടന്നു. പൊതുമേഖലയിലെയും സഹകരണമേഖലയിലെയും ബാങ്കുകളും പ്രവർത്തിച്ചില്ല. ഗതാഗത മേഖലയിൽ പണിമുടക്ക്‌ പൂർണമായിരുന്നു. സ്വകാര്യ ബസുകളും കെഎസ്‌ആർടിസിയും സർവീസ്‌ നടത്തിയില്ല. ഓട്ടോകളും ടാക്‌സികളും ചരക്കുവാഹനങ്ങളും പണിമുടക്കിൽ അണിനിരന്നു. പണിമുടക്കിൽ പങ്കെടുക്കാത്ത തൊഴിലാളി സംഘടനകളിലെ പ്രവർത്തകരും ജോലി ചെയ്‌തില്ല. ഇൻഷുറൻസ് മേഖലയും നിശ്ചലമായി. മുഴുവൻ ജീവനക്കാരും പണിമുടക്കിയതിനെത്തുടർന്ന് എൽഐസിയുടെ മുഴുവൻ ബ്രാഞ്ച് ഓഫീസുകളും സാറ്റലൈറ്റ് ഓഫീസുകളും അടഞ്ഞുകിടന്നു. പുതുതലമുറ ബാങ്കുകൾ അടക്കമുള്ള സ്വകാര്യ സ്ഥാപനങ്ങളും അടഞ്ഞുകിടന്നു. കർഷകരും കർഷകത്തൊഴിലാളികളും ചുമട്ടുതൊഴിലാളികളും പണിമുടക്കിൽ പങ്കാളികളായി. ജില്ലയിലെ 18 ഏരിയാ കേന്ദ്രങ്ങളിലും നൂറുകണക്കിന് തൊഴിലാളികൾ അണിനിരന്ന പ്രകടനങ്ങളും സമരകേന്ദ്രങ്ങളിൽ പൊതുയോഗങ്ങളും നടന്നു. 226 മേഖലാ കേന്ദ്രങ്ങളിലും പ്രകടനങ്ങളും വിശദീകരണ പൊതുയോഗങ്ങളും നടന്നു. സർവീസ്‌ സംഘടനകളും പ്രകടനത്തിൽ പങ്കാളികളായി. കണ്ണൂർ നഗരത്തിൽ പ്രകടനം ആർഎസ് പോസ്റ്റോഫീസ് പരിസരത്തുനിന്നാരംഭിച്ച്‌ തെക്കിബസാറിലെ സമര കേന്ദ്രത്തിൽ സമാപിച്ചു. പൊതുയോഗം സിഐടിയു സംസ്ഥാന വൈസ് പ്രസിഡന്റ് കെ മനോഹരൻ ഉദ്ഘാടനം ചെയ്തു. താവം ബാലകൃഷ്ണൻ അധ്യക്ഷനായി. ടി വി രാജേഷ്, കാടൻ ബാലകൃഷ്ണൻ, എം ഗംഗാധരൻ, എം കെ ജയരാജൻ, എം ഉണ്ണികൃഷ്ണൻ, അബ്ദുൽ വഹാബ് കണ്ണാടിപ്പറമ്പ്, കെ വി സുമേഷ് എംഎൽഎ, അരക്കൻ ബാലൻ, എ എം സുഷമ, വി രാധാകൃഷ്ണൻ, രാജേഷ് പ്രേം, എം കെ പ്രേംജിത്ത്, സൗന്ദർ രാജൻ, കെ അശോകൻ തുടങ്ങിയവർ സംസാരിച്ചു.